Esti 2020 Misiva cumplen 10 años faciendo punk-rock y pa celebralo embárquense nel so proyectu más ambiciosu: poner música a un curtiumetraxe. Esti vienres 24 d’abril estrenaron na so canal de YouTube ‘L’Últimu Aliendu’, obra de calter “post-apocalíptica” qu’entemez el bon facer de Titi Muñoz -reputáu realizador asturianu ganador d’un premiu AMAS en 2019 na estaya de meyor videuclip- y el d’esta banda moscona -con cuatro discos al so llombu y que tocó en prestixosos festivales como’l Resurrection Fest y el Tsunami Xixón-.
‘L’Últimu Aliendu’ ta formáu por trés nuevos cantares –”Esclavos del Momentu”, “Héroes Ensin Nome” y “Qu’Arda’l Sol”-, toos ellos cantaos n’asturianu dafechu y con un mensaxe de denuncia social y optimista a la par; mui afayadizos pa estos tiempos que tamos viviendo. Musicalmente reflexen la madurez de Misiva, con un soníu más rockeru, pero ensin perder de referencia el punk-rock d’influyencia anglosaxona que los caracteriza. Grabaos nos OVNI Estudios de Pablo Martínez (Desakato) y masterizaos n’Estaos Xuníos por Brad Boatright, estos temes asoleyaron tamién en forma d’EP el sábadu 25 en toles plataformes dixitales.
Con esti estrenu, Misiva entamen a celebrar el so décimu aniversariu. La banda programara una proyección d’esta “roadmovie” nel Teatru Filarmónica d’Uviéu, pero a cuenta de la crisis del COVID-19 tuvieron que cancelala. YouTube foi la plataforma na qu’estrenaron el videu pa compartilu con tola xente que ta sufriendo’l confinamientu. Dempués llegará’l conciertu especial de celebración, programáu pal 4 de setiembre na sala Tribeca d’Uviéu y nel que van actuar xunto a Amplify.
