Conecta con nosotras

Opinión

Siguir avanzando

Podemos Asturies debería facer tolos esfuercios por propiciar una mayoría progresista sólida y estable na Xunta Xeneral.

Xunta Xeneral. Semeya: Iván G. Fernández.

Más peligroso que mitificar el pasáu ye ignoralu. Pa les organizaciones, como pa les persones, ye conveniente reflexonar y analizar la nuestra trayectoria, non pa regodease no que fuimos sinón pa tener claru cuál ye’l camín y los suaños que nos motiven pa siguir avanzando.

Hai seis años, Podemos supo recoyer les demandes, les reivindicaciones y les ilusiones de la ciudadanía movilizao, constituyéndose na ferramienta pa llevar eses lluches a les instituciones, col oxetivu espresu d’ameyorar la vida de la xente. Yeren tiempos del bipartidismu y la corrupción, de la indignación pol esmantelamientu del estáu social, con una sensación xeneralizada de que les instituciones y los partíos políticos nun taben al serviciu de la xente, sinón de les élites financieres y económiques en complicidá col poder establecíu.

Nel 2015, Podemos Asturies entró con fuercia na Xunta Xeneral y nos Conceyos, pasando a xugar un papel determinante na política asturiana: defendiendo y reivindicando lo público; denunciando y sacando a la lluz múltiples casos de corrupción; acompañando y dando voz a lluches sociales y llaborales; o señalando a los culpables del saquéu. Nesti ciclu impugnatoriu, Podemos Asturies demostró ser la ferramienta necesaria y útil pa la mayoría social asturiana.

Les circunstancies cambiaron en múltiples aspectos, sociales, políticos o económicos, dalgún d’ellos impensable namás hai unos pocos meses. Ye necesario nesti tiempu pensar y volver la vista atrás un momentu, entender cómo lleguemos hasta equí pa poder decidir cuál tien de ser el nuestru papel nun escenariu políticu nuevu, que ta condicionáu por factores diversos: los resultaos electorales del añu pasáu n’Asturies; la entrada de Unidas Podemos nel gobiernu de coalición del Estáu español; o la COVID-19, la peor pandemia nun sieglu, con un impactu económicu y social que nos lleva a la mayor crisis de la historia reciente d’Asturies. Y too esto nun contestu nel que muncha xente tovía nun consiguió salir de la crisis anterior del 2008.

Pensamos que, énte esta situación escepcional, Podemos Asturies debería facer tolos esfuercios por propiciar una mayoría progresista sólida y estable na Xunta Xeneral, tomando como referencia’l programa qu’acordaron PSOE y UP pa la conformación del gobiernu del Estáu español. Esti acuerdu nun ye’l nuestru programa políticu, pero sí podría ser la base de la que partir nun pactu de reconstrucción n’Asturies, una fueya de ruta poderosa que contemplando un paradigma distintu pueda articular midíes dende lo público, construyendo un escudu social y económicu que protexa y ponga nel centru la vida de los asturianos y les asturianes.

El gobiernu de coalición ye l’exemplu de que, con convicción, diálogu, tenacidá, constancia y audacia, ye posible que les fuercies polítiques progresistes algamen los acuerdos que necesita y esixe la mayoría social. Asturies nun pue permitise ser la escepción nun escenariu d’entendimientu ente les fuercies progresistes y les izquierdes. En Podemos Asturies debemos planteanos cuál debería ser el nuestru papel nestos momentos. La llealtá a los principios que crearon la nuestra organización nun pasa por repetir táctiques o estratexes, ignorando los cambios qu’asocedieron y asoceden constantemente al nuestru alredor. Nestos momentos, votantes y simpatizantes nun van entender que nun faigamos tolos esfuercios posibles pol diálogu y la negociación, por llegar a pactos y acuerdos que condicionen de manera significativa les polítiques sociales y económiques en beneficiu de la mayoría social asturiana. Creemos que la nuestra obligación ye facer tolo necesario pa llogralo, porque vinimos a la política pa ser útiles a la xente.

Antón Díaz y Miguel Lago

Militantes de PODEMOS Asturies y Somos Siero.

Haz click para comentar

Responder

Tu dirección de correo electrónico no será publicada. Los campos obligatorios están marcados con *

Lo más leído

“La educación no es una prioridad para el gobierno de Canteli”

Entrevistas

“¡Abre un puto libro!”

Cultura

“Queremos carril bici, no carril basura”

Actualidad

“Almeida miente sobre los chiringuitos” afirma La Folixaria

Actualidad

Asociación Cultural Nortes de Asturias © 2020 · Centradas en la periferia

Nortes en redes