Conecta con nosotras

Actualidad

Va dir por ti, Yoli

Ehí siempre taba Yoli, con esa sonrisa que nos vien a l’alcordanza cuando pensamos nella.

Dexónos Yolanda González Huergo, Yoli, la nuestra compañera na Xunta pola Defensa de la Llingua Asturiana. Yoli entró na organización a últimos de los años noventa y convirtió la llucha pola oficialidá nún de los sos (munchos) compromisos sociales. La so formación como xurista foi una gran ayuda nes nuestres iniciatives nesi ámbitu: dende aquelles primeres campañes de denuncies al Gobiernu asturianu por nun respetar la toponimia oficial hasta les sos suxerencies con otros espertos na propuesta de reforma del artículu cuartu del Estatutu d’Autonomía que presentemos a los grupos parllamentarios de la Xunta Xeneral. Tamién representó munchos años a la nuestra asociación nel Conseyu Asesor de la Llingua Asturiana de Xixón.


Foron estos dalgunos de los asuntos nos que tuvo en primer llinia. Pero la so presencia tamién taba nos conceyos onde planificábemos los caminos nuevos qu’había qu’abrir na reivindicación, nes manifestaciones tres de la pancarta o nos conciertos tres de la barra. Ehí siempre taba Yoli, con esa sonrisa que nos vien a l’alcordanza cuando pensamos nella. Una sonrisa qu’aguantaba hores y hores naquelles nueches llargues poniendo botelles de sidra y cerveces ente l’estreldu de la música nel Conciertu pola Oficialidá.

Y ye qu’una de les munches coses bones que tenía Yoli ye que nunca taba ehí por figurar. Taba por convencimientu nuna llucha que ye xusta y que tien munches xeres abiertes, anque les más de les veces la xente dende fuera piense que se faen soles y anque naide te lo empondere. Dende repartir cartelos hasta entamar los Premios Andrés Solar, que na última edición preparó cola so pareya, Rubén, con un mimu especial: la Xunta decidió da-y un homenaxe a la familia d’Andrés Solar, depués de tantos años collaborando con nós. Yoli y Rubén, como tolos años, falaron cola familia y llevaron al llombu tola organización del actu. Too eso a pesar de que la enfermedá yá pesaba. Miramos la semeya d’aquel día y vémosla nel mediu, arrodiada d’amigos y amigues, sonriendo.

Los sos munchos compromisos políticos y sociales nunca la desvincularon de la Xunta pola Defensa de la Llingua Asturiana. Sicasí, cuando asumió una responsabilidá política, Yoli foi fiel a los principios d’apartidismu de la Xunta: siguió trabayando como la que más, pero nun segundu planu y ensin interés nengún por salir na semeya. Esta yera otra de les grandeces de Yoli: la capacidá pa conciliar, pa construyir organización, pa saber tar en cada momentu onde tenía que tar ensin esperar nada empara. Namás l’allegría de cuando les coses (la manifestación, el conciertu, la concentración…) salen bien.

Esti xueves, cuando la noticia que nunca quiximos que llegara saltó a los medios, foron munches les muestres de respetu y de recuerdu. Nesti tiempu de confrontación política hubo xente que nun-y dio más el momentu pel que pasábemos familares, amigos y compañeros de llucha o militancia. Ensin saber nada del compromisu vital de Yoli, cargaron coles maneres más mezquines en contra d’aquelles personalidaes polítiques que quixeron mostrar el pésame na llingua qu’ella siempre defendió. Ensin sabelo, Yoli dio la so última batalla: la so trayectoria, la so tolerancia y el so exemplu rescamplaron frente a aquellos que faen de la intolerancia y el despreciu la so manera de ver la vida. Nós tamos del llau que siempre foi y va ser el de Yoli.

Yoli, tovía nun nos facemos a la idea de siguir alantre ensin ti, pero yá lo diximos namás enteranos de que yá nun tabes: cuando volvamos a la xera vamos tener mui presente na nuestra alcordanza’l to exemplu. Depués de saber la noticia, pensemos qu’esi futuru pol que tanto lluchasti, y que va llegar seguro, va ser tamién gracies al to llabor. Cuando llegue, Yoli, ten claro que va dir por ti.

Comentarios
Advertisement

Lo más leído

“Los hijos no son de los padres ni del Estado, son de TikTok e Instagram”

Entrevistas

Expropiadores anarquistas: “Los Solidarios” de la Transición

Cultura

¿Qué hay del anarquismo hoy?

Cultura

“Aceptar el plan de ajustes de Montoro supuso renunciar a hacer inauguraciones el último año de mandato”

Entrevistas

Asociación Cultural Nortes de Asturias © 2020 · Centradas en la periferia

Nortes en redes