Trés muyeres encargaránse a partir d’agora de la vocería llocal de Podemos nos trés conceyos más poblaos d’Asturies (Xixón, Uviéu y Avilés). En Xixón, la ciudá más poblada y con más militantes, Alejandra Tejón salió escoyida nes votaciones. Trabayadora del Serviciu d’Atención a Domiciliu y sindicalista de la CSI, el so nome impúnxose al de les otres dos aspirantes, la conceyala Laura Tuero y la exconceyala Estefanía Puente. Tejón, representante del “sector críticu” llogró un 54% de los votos. Tejón yá anunció la so decisión d’integrar a la ex eurodiputada Estefanía Torres y a la ex conceyala Lorena Montes, asina como al trabayador de Duro Felguera y sindalista de CSI Rubén Alonso.
Nogueiro defende una alianza electoral con IU n’Uviéu
N’Uviéu Lluisa Nogueiro, apoyada pol ex secretariu xeneral de Podemos na capital, Daniel Latorre, y la vocera de Somos Uviéu, Ana Taboada, nun tuvo competencia nes votaciones. Maestra d’oficiu, y vinculada al mundu del asociacionismu, la nueva vocera manifestóse a favor d’esplorar una alianza ente la formación morada ya IU, que nes pasaes elecciones municipales quedó fuera del Conceyu.
N’Avilés Tania González, ex eurodiputada de Podemos y líder de Cambia Avilés, va siguir al frente del partíu. La Villa del Adelantáu, onde Podemos confluyó con IU, ye la población na que l’espaciu de Uníes Podemos llogró meyores resultaos nes pasaes elecciones, quedando como segunda fuerza detrás del PSOE.
20 agrupaciones llocales escoyeron les sos voceríes
Un total de 20 poblaciones escoyeron voceros llocales. En Siero les votaciones van tener llugar el 28 y 29 de payares, y en Cangues van ser en xineru. Corvera y Llanera van funcionar de manera asamblearia, al traviés d’un plenariu. Esta ye la llista nel restu de conceyos asturianos.
Ayer: José Castañón
Castrillón: David Alaguero
Castropol-Cuaña: Gustavo Álvarez Rico
Navia: Óscar Manuel Fernández-Campoamor
Pravia: Jorge Álvarez González
Cuideiru: Sonia Busto
Salas: José Antonio Fernández Garrido
Mieres: Manuel Alberto Vicente
Llangréu: Rosa Prieto
L.lena: Carlos Blanco
Llaviana: Miguel Francisco González Villar
Llanes: Diego Ruiz de la Peña
Parres: Mariví Ugedo
SMRA: Rosario Linares Salas
Villaviciosa: José Fernando Díaz García
Gozón: Jorge Luis Soto Ripoll
Tapia: Nuria Campos Castro
