Navidá o Solsticiu: que la Historia nun t’amargue la fartura

Recomendados

David Artime
David Artime
Periodista y escritor. En 2009, ganó el premio de narrativa en lengua asturiana de la editorial Trabe con la novela "La Bufanda", en la que aborda el mundo de los ultras de fútbol.

Negar que les Navidaes son les fiestes del solsticiu d’iviernu que bien de pueblos de l’antigüedá celebraben y que los cristianos nun tuvieron más remediu qu’apadrinar como propies paez cada día que pasa más complicao. Datos y análisis d’historiadores y espertos nun falten pa recalcar la clara relación que la supuesta conmemoración del nacimientu del mesíes tien cola Saturnalia romana y el Yule de los pueblos xermánicos, ente otres munches cites astronómiques del calendariu que teníen llugar nes civilizaciones d’aquella época nel Hemisferiu Norte.

La derecha mediática y política tomó esti asuntu fai algunos años como un campu de batalla nel que desarrollar otra más de les sos avezaes guerres dialéctiques, p’acusar a la izquierda de querer “descristianizar” la Navidá. L’últimu episodiu foi l’alusión a les “fiestes del afectu” que’l presidente del Gobiernu, Pedro Sánchez, fizo nuna intervención parlamentaria. Na so respuesta, el responsable del PP, Pablo Casado, reprochó-y que-y costara tanto felicitar la Navidá, “que ye’l nacimientu de Jesús, nun país cristianu”.

Pedro Sánchez desató una polémica al referise a les “fiestes del afectu”

Dellos medios de dereches ficiéronse ecu de la discusión, dando voz, por supuesto, a la correspondiente riestra de mensaxes en Twitter poniendo pingando al presidente del Executivu estatal por nun usar la palabra “Navidá“, algo que consideren un ataque a los cristianos.

Amás de tola polémica xenerada en twitter, el diariu El Español publicaba un reportaxe sobre los supuestos intentos de la izquierda por descristianizar la Navidá, y pa ello falaba con dalgunos espertos: un miembru de l’Asociación Católica de Propagandistes y un filósofu de la Universidá de Navarra, vinculada al Opus Dei.

NIN ATEOS NIN COMUNISTES

Pocos díes antes un diputáu de Vox, David Arranz proponía qu’estes fiestes “namás que se desplacen y celebren reuniones los creyentes, y non los ateos, comunistes o podemites. Celébrase la Navidá, el nacimientu del fíu de Dios”. Nun tardó n’esborriar el mensaxe argumentando que yera en sen irónicu pero, como suel pasar, les redes nun tuvieron piedá con él.

Captura del tuit del diputáu de Vox David Arranz.

Pela so parte la COPE, la cadena de la Conferencia Episcopal, dedicó una emisión y un artículu na so web al significáu de la Navidá. El sacerdote y periodista Josetxo Vera esplicaba que lo que se celebra ye “el nacimientu de Jesucristo, una persona especial, Dios Todopoderoso“. La razón de celebrase’l 25 d’avientu ye, según esti relixosu, que los cristianos consideraron que’l Sol Invictu, que ye lo que se celebraba nel imperiu romanu esa mesma fecha, yera precisamente Jesucristo.

Nos medios conservadores cures y filósofos vinculaos al Opus faen los sos análisis

La mesma cadena católica reconoz por tanto que la fecha de les Navidaes fízose coincidir con celebraciones paganes anteriores. Otra cosa son les motivaciones d’esa coincidencia. L’añu pasáu per estes feches, esta canal de radio emitía otru reportaxe nel qu’Ángel Barahona, doctor en Filosofía, mencionaba que les celebraciones paganes incluyíen los sacrificios. La cristianización d’esta folixa conllevaría’l final d’estes práctiques polo que podría entendese como un agradecimientu a los cristianos por acabar con elles.

Les filigranes pa intentar reivindicar el sen cristianu de la Navidá son variaes. Otres webs d’entidaes relixoses más minoritaries lleguen hasta a plantear que foi la folixa del Sol Invictu la que se fizo coincidir col nacimientu de Jesús, el 25 d’avientu.

Los Saturnales (1783), d’Antoine-François Callet. Muséu del Louvre.

LA FOLIXA DEL SOLSTICIU Y LOS DIOSES ANTIGUOS

Pero trátase d’un quiero y nun pueo. Análisis y estudios sobren. Too paez indicar que foi nel sieglu IV cuando’l papa Julio I fixó la fecha del 25 d’avientu como’l nacimientu de Jesús, pa facela coincidir cola celebración pagana. Per estes feches d’avientu munches cultures antigües celebraben nacimientos de dioses, coincidendo col solsticiu d’iviernu, la nueche más llarga del añu, y a partir de la cual los díes entamen a crecer (por eso se celebra’l nacimientu de la lluz y de la vida). El sol invictu taba vinculáu al nacimientu d’Apolu (mientres que les saturnalies, que teníen llugar unos díes antes referíense al Dios Saturnu), pero tamién al dios persa Mitra, heredáu na mitoloxía romana, y al dios nórdicu Frey, o nel imperiu azteca al dios mexica Huitzilopochtli.

El casu nórdicu ye probablemente’l más paradigmáticu. Lo mesmo en Dinamarca, Suecia que Noruega la navidá llámase Jul, que vien del xermánicu Jule, como se llamaba a la celebración del solsticiu d’iviernu anterior a la cristianización. Güei tovía, Feliz Navidá dizse God Jul en suecu, en noruegu y en danés. El personaxe de Papá Noel tien el so orixe nuna historia mitolóxica, según la cual per esti periodu’l dios Odín percorría los cielos nel so trinéu y repartía regalos ente los neños.

Actualidad

Dejar respuesta

Please enter your comment!
Please enter your name here