La Radio del Principáu d’Asturies (RPA) estrena a partir del próximu llunes, 1 de febreru, Al Son, un nuevu espaciu que va facer repasu de los movimientos y tendencies que se dieron na música asturiana nos últimos 40 años, dende 1974, momentu nel que se considera que naz l’asturianismu modernu, hasta l’actualidá. El cantante Xune Elipe será la voz d’esti programa, que contará cola collaboración de Lena Elipe y del periodista y músicu Xicu Ariza.
El nuevu programa, a lo llargo de los sos 50 capítulos, va tratar les diferentes propuestes sonores que se dieron n’Asturies nestes cuatro décades, dende la tonada moderna, hasta’l rock, pasando pel folk o les músiques urbanes y les fusiones. Canción d’autor, nuevu canciu, sones pa la reciella, pop llariegu, bandes de gaites o nueves tendencies serán dalgunos de los munchos temes trataos.
Va emitise tolos llunes a partir de les 23.30 hores
Per l’estudiu van pasar cada selmana dellos protagonistes de la música actual pa que dean a conocer el so trabayu. El programa cuenta tamién con trés seiciones: Sonoteca (hemeroteca sonora onde se recueyen fechos o datos llamativos de la música asturiana), Versiones (onde se recueyen adaptaciones de cantares foranos por artistes del país, o temes asturianos versionaos por músicos de fuera) y Nomes de la Música Asturiana (ficha sobre les principales figures y bandes de la música asturiana).
Al Son ye un espaciu emitíu por RPA y producíu por Goxe Producciones. Va emitise tolos llunes a partir les 23.30 hores.
