La Confederación Nacional del Trabayu (CNT), la Confederación Xeneral del Trabayu (CGT) y el Sindicatu Unitariu y Autónomu de Trabayadores de la Enseñanza d’Asturies (SUATEA) van conmemorar el Primeru de Mayu con una concentración conxunta esti sábadu, a les doce del mediodía, nos Xardinos del Náuticu, en Xixón. Les tres organizaciones sindicales denuncien que la pandemia de coronavirus abrió una crisis social que ta afondando “les graves desigualdaes esistentes na sociedá, agudizaes yá por cuenta de la crisis anterior de 2008 y de les que la sociedá nun se recuperara tovía”.
CGT, CNT y SUATEA espresen el so compromisu “cola busca de salides que faigan que nun seyamos la misma xente de siempre la que paguemos les consecuencies”. Esti Primeru de Mayu van poner l’acentu, ente otres cuestiones, nos “problemas referíos a la defensa del sector públicu en numberosos ámbitos de trabayu que consideramos esenciales: sanidá, educación, cuidaos a persones dependientes, etcétera”. Faen un llamamientu “al conxuntu de la clase trabayadora pa que participe na concentración que va tener llugar el sábadu”, na que, añaden, van garantizase les midíes de seguridá sanitaria vixentes.
