A traviés d’un cuartu de centenar de miniespacios, que van percorrer la programación de RPA a lo llargo de tola Selmana de les Lletres Asturianes, la radio pública asturiana va rindir homenaxe al escritor y artista mierense Nel Amaro, al que ta dedicada esti añu la gran fiesta de la lliteratura n’asturianu, qu’entama’l llunes próximu. Con guión del cantante y productor cultural avilesín Xune Elipe y la realización de Goxe Producciones, les pieces van emitise tolos díes depués de los boletinos informativos de les 11, 13, 16, 17 y 18 hores.
Eses píldores radiofóniques va tar centraes nes vanguardies artístiques y creatives asturianes. Nelles va tratase non solo la obra y vida de Nel Amaro (1946-2011), “sinón otros munchos aspectos de la cultura underground del nuestru país, como la lliteratura de xéneru, la creación musical alternativa, el mundu de los fancinos n’asturianu, el spoken word o la creación sonora d’autor”, anuncien dende Goxe. Destaquen del autor homenaxáu esti añu na Selmana de les Lletres que “ta consideráu un promotor y divulgador de les distintes vanguardies artístiques y culturales del país, con especial atención a lo underground o alternativo. La so obra, variada y mui orixinal, ye un bon exemplu de cómo la llingua asturiana foi incorporándose a ambientes artísticos de los qu’históricamente tuvo aislada”.
