El corredor ultramaratonianu de montaña Fernando González Rodríguez va presentar esti vienres, a les siete de la tarde, na antigua Escuela de Comerciu de Xixón (na cai Francisco Tomás y Valiente) el so llibru 10.306. Dientro del Tor des Glaciers, nel que recueye les sos esperiencies na preba deportiva del mesmu nome, que disputó nel Val d’Outa o Valle d’Aosta, nos Alpes, con un percorríu de más de 450 kilómetros en poco más de siete díes.
Esti deportista xixonés, trabayador portuariu y sindicalista, completó va unos años el retu del Grand Slam Marathon, que consiste en facer de principiu a fin una preba con una distancia igual o superior a un maratón (42,195 kilómetros) en caún de los siete continentes y subcontinentes del planeta y nel Polu Norte. El títulu del mentáu llibru, un diariu autoeditáu n’edición billingüe asturianu-castellanu, fai referencia al tiempu que-y llevó completar la carrera de montaña Tors des Glaciers: 10.306 minutos.
