Un garrapiellu de persones del movimientu asturianu de solidaridá cola causa zapatista pintaron güei nel barriu de Nuevu Xixón un mural d’acoyida a los miembros del Escuadrón 421 del Exércitu Zapatista de Lliberación Nacional (EZLN) que llegaron va unos díes a Vigo nuna travesía tresoceánica nel barcu rebautizáu como La Montaña pa llevar a cau una xira per Europa. El mural fízose, con consentimientu del vecindariu, nuna muria del parque Avelino Vidal a lo llargo de tres hores de trabayu y cola mano d’obra altruísta de neñes y neños, mocedá y persones mayores.
A resultes d’esta visita del Escuadrón 421 ta reactivándose’l movimientu del solidaridá col EZLN, nel que participen, ente otres persones, activistes de lo que foi la Plataforma Asturiana de Solidaridá de Chiapas, que nos años 90 unvió ayuda económica y material, cooperantes y observadores a esi estáu mexicanu tres el llevantamientu armáu que protagonizó l’indixenismu chiapanecu, que cuntaba con esponentes como la comandanta Ramona o’l subcomandante Marcos.
Les siete muyeres y homes que viaxaron a bordu de La Montaña nuna travesía que zarpó del puertu mexicanu d’Isla Mujeres’l 2 de mayu son l’avanzada de la ‘invasión’ zapatista d’Europa (siguen el rumbu contrariu de los conquistadores europeos qu’invadieron les sos tierres va más de mediu mileniu). Ún d’esos grupos que van dir llegando a Europa tien previsto visitar Asturies, onde va ser acoyíu pol movimientu de solidaridá col zapatismu.
Per otru llau, nos locales de Cambalache y Manglar (dambos asitiaos na cai Martínez Vigil, n’Uviéu) empieza güei un ciclu de cine documental zapatista que va allargase hasta’l 7 de xunetu, cola proyección de tres cintes: El fuego y la palabra, de Revista rebeldía; Corazón del tiempo, d’Alberto Cortes, y Caminantes, de Fernando León de Aranoa.
