El grupu de Podemos-Equo nel Ayuntamientu de Xixón propón que nes fiestes de la Selmana Grande d’esti añu’l paséu de Begoña acueya non solo casetes d’hostelería sinón tamién d’entidaes representantives del texíu asociativu del conceyu. La propuesta planteóla esta mañana en rueda de prensa’l conceyal Juan Chaves, qu’esplicó que “cuidamos que la hostelería ha de ser la principal protagonista, pero non la única na xestión de les casetes”, y dixo que’l modelu de casetes que ta previsto que s’estrene en Xixón esti branu nun ha de ser “esi hacia’l que paez que va Uviéu, sinón del que vien Uviéu”, en referencia al intentu del equipu de gobiernu derechista de la capital asturiana de desaniciar la presencia de colectivos sociales nos chiringuitos de San Mateo.
Podemos-Equo Xixón quier arriquecer el modelu de casetes festives de la Selmana Grande previstu para esti mes d’agostu incorporando al mesmu “al texíu asociativu de la ciudá, con una xestión mista” na que tengan presencia entidaes sociales de toa triba. L’edil de la coalición morada y verde dixo que “al ser el primer añu en que vamos tener esti modelu de casetes hosteleres queremos que las entidaes ciudadanes puedan xestionar tamién dalgunes d’eses casetes. Nun tien por qué ser dientro d’eses dieciséis que planteaba’l sector hosteleru, sinón que se pueden aumentar mesmamente a venti”.
Juan Chaves aseguró que “la hostelería nesti añu d’andanciu sufrió sobremanera, y yo creo que’l nuestru grupu municipal foi’l que más propuestes llevó d’apoyu al sector hosteleru, pero nun ye menos cierto que les entidaes sociales, culturales, deportives, xuveniles y vecinales sufrieron un amenorgamientu de l’actividad y la perda d’ingresos y de puestos de trabayu”. Na so opinión, Xixón ye un conceyu “participativu, comprometíu, y creemos que se pueden proyectar esos valores nuna xestión de les casetes que complemente la oferta del sector hosteleru”.
