Una teoría económica pa l’aldea nuna tierra que presume de metrópolis, ensin asumir la so realidá agropolitana

"Les ciudades pequeñes y intermedies que tán en rellación col campu van tener meyor futuru”, alvirtió Jaime Izquierdo nel CSA L’Apiaderu.

Recomendados

Beatriz Redondo Viado
Beatriz Redondo Viado
Periodista y profesora de secundaria.

Cuánta zuna d’engarrase, ¿eh? Yo de campu, tu de ciudá. O al revés. Como los ratones. Y dende ehí faes una trinchera. Lo que cansa y pa lo poco que val, qu’al final siempre hai víctimes collaterales y el terrenu queda fechu una llaceria. Foi una de les coses que nos vieno a dicir Jaime Izquierdo (Piloña, 1958), llicenciáu en xeoloxía, actualmente Comisionáu pal Retu Demográficu del Gobiernu d’Asturies y autor de bien de publicaciones nes qu’analiza y da propuestes pa un futuru sostenible nesta tierra que pasa por salir de les dicotomíes, del desarrollismu al debalu, del pensamientu de la fórmula máxica (véase polígonu industrial, véase Amazon, véase ocurrencia de parque temáticu) el pasáu 10 de setiembre al Centru Social Autoxestionáu (CSA) L’Apiaderu del Remediu, Nava.

Vieno Izquierdo a presentar el so últimu llibru, La ciudad agropolitana. La aldea cosmopolita (2019, KRK), a un Centru Social Autoxestionáu na zona rural, un espaciu “poco frecuente” n’Asturies, onde too aveza a xirar alredor de les cases de la cultura, pero que sí ye más habitual n’otres xeografíes d’Europa, onde va tiempu que se trabaya n’esborriar les fronteres ente lo urbano y lo rural a la busca d’una simbiosis, una convivencia xusta, ente dambes dos realidaes.

Trátase d’esborriar llindes que tán nel territoriu, pero que nacen del pensamientu: “El pensamientu campesín ye sistémicu, agrosistémicu, y tien en cuenta tolos aspectos de la vida, pero’l pensamiento industrial, el que manda na Universidá y na Alministración Pública ye analíticu y vertical, tiende a segmentalo too y asina tolos conocimientos queden separaos”, apuntaba Izquierdo na presentación d’esti ensayu que quier ser  “un llamáu d’atención nun momentu nel que la Revolución Industrial llega al so fin”. 

El problema d’esti pensamiento industrial acutáu en departamentos ye que torga tener esa visión global que, irónicamente en tiempos de globalización, falla na visión de conxuntu  anque, eso sí, funciona perfectamente según la lóxica d’acumulación capitalista: “L’aldea podía ser la contraposición a l’acumulación capitalista, pero la economía industrial nun ye  quien a ver o figurase otres teories economiques”, cuestionó Izquierdo. Esi pensamiento ta bien enrraigonáu nes escueles y na educación actual, onde l’afán ye dar ales a la xente mozo pa qu’eche a esnalar, escaeciendo que cortar les raíces déxate nortiando ensin tierra, ensin raigañu, ensin saber ónde o cómo aterrizar.

“nun podemos enfotanos en cambiar les flores nuna rotonda cada 15 díis y tener la periferia rural de la ciudá  asilvestrada y acumulando matos”

¿Cómo encariar esti fin de la Revolución Industrial? L’autor de La ciudad agropolitana. La aldea cosmopolita na so reflexón sobre la estructura urbana y rural d’Asturies describe’l panorama nel que nos atopamos y sobre’l qu’hai que trabayar con tol so potencial: “La zona urbana d’Asturies son principalmente tres núcleos, Uviéu, Xixón y Avilés, qu’en realidá son pequeñes urbes arrodiaes de praos; depués tán les villes espardíes per tol territorio, y les aldees. Parte de tola zona rural ye periurbana y  ta venceyada a l’alimentación de la ciudá dende’l so orixe. Y, más allá, cola visión del pensamientu industrial atopamos el paisaxe de la llechi mentolada, la de la zona rural que s’especializó na producción de llechi y ocalitos”.

Y toos esos escenarios anden a la griesca. Ganadería contra ecoloxismu, mediu rural contra turismu. Y eso nun había ser asina, a xuiciu d’Izquierdo: “Cuando se faló de conservación de la naturaleza namás s’entendió la parte salvaxe y silvestre y nun se valoró la parte de trabayu de conservación de la naturaleza que fae’l campesináu o el propiu valor d’esa intervención cultural y humana na naturaleza. Nun s’acaba de llegar a un planteamientu más complexu”.  Y punxo dos exemplos: el conservacionismu que defende’l llobu dende anuncios nel metru de Madrid, ganando la simpatía y les perres de quien nun quier collaborar nel asesinatu de la madre de Bambi (non, nun ye un llobu, pero entiéndese), y el del sector del pastoréu que defende unos montes “llimpios” de depredadores y que funcionen como “almacenes de carne”, ensin más intervención humana que la de desaniciar tola competencia nun mediu compartíu con otros seres vivos.

Recuperar aspectos de la cultura campesina ye una vía pa iguar estos enguedeyos dende’l puntu de vista de Jaime Izquierdo, garrando como referencia respuestes que yá se dieron dende’l campu: ”Había families campesines especializaes n’evitar  conflictos, los alimañeros, que teníen un carácter anónimu y que miraben pol control de la población animal p’actuar cuando yera necesario. La so idea nun yera acabar col llobu, por exemplu, sinón caltener l’equilibriu”.

 “L’oxetivu ye facer una ciudá responsable col campu, esa diba ser la ciudá agropolitana”

L’oxetivu diba ser “facer una ciudá responsable col campu”, esa diba ser la ciudá agropolitana, mentes qu’agora “les ciudades son mui irresponsables col campu y viémoslo col turismo esti branu”. Turistes que nun entienden qu’esi requexu tan afayadizu p’aparcar en realidá ye la entrada a una finca onde en cualquier momento van a entrar a trabayar col carru, “anque nun tenga puesta la señal de vado permanente”, o el campechanismu colonizador que nun respeta al habitante en so casa: “Eso de preguntar cuánto ganao tien a cualquier paisanu que te topes pela caleya sería como si él te preguntara cuántes perres tienes nel bancu. Y eso él nun lo fae”.

Un turismu rural qu’espoxigó cola pandemia y al empar medraron les rocees énte l’urbanita, bien de veces cargáu d’inorancia sobre’l terrenu que pisa, y la población del mediu rural. Sicasí, el turismo rural ye un sector que n’Asturies, según Izquierdo, tien puntos positivos a valorar: “Mentes qu’en Canarias el 40% del PIB vien del turismu y esos beneficios van directamente a les multinacionales, n’Asturies el turismu rural supón el 8% del PIB, pero va a pequeños propietarios. Y amás lo que se busca nel turismu rural d’equí ye lo rural, esos alimentos que vienen de la tierra que ta ehí al pie y una forma de vida, eso ye lo qu’hai que revalorizar”.

Mentanto, n’Asturies nun se fae otro que falar del área metropolitana “pero n’Asturies somos más campu que ciudá -y d’ehí vien l’apueste pol términu rexón agropolitana-, esta realidá nun s’asume”. Sí lo faen en sitios como Avignon, en Francia, remarcó Izquierdo, onde un porcentaxe curiosu del consumu d’alimentos  vien de la zona rural más cercana y onde s’incide na necesidá de consumir productos de temporada y locales. El resultáu: el conteníu d’una nevera n’Avignon nun tendrá nada tener que ver col que se pue topar nuna nevera na cai Uría d’Uviéu que guapamente ye calcada a otra nun pisu de Nueva York (igual va ser neso no único que se parecen, por munches ínfules de nun saber qué son les madreñes que se dean na capitalina carbayona).

Paradigmático d’esta separación ente lo urbano y lo rural, indicó Izquierdo, ye la presencia habitual d’una media de seis persones faciendo trabayos de xardinería na rotonda de la Plaza d’América d’Uviéu o soplando fueyes nel parque San Francisco, con una concepción barroco-palaciega de lo verde de va 200 años atrás: “Tenemos que repensar la xardinería urbana, nun podemos enfotanos en cambiar les flores nuna rotonda cada 15 díis y tener la periferia rural de la ciudá  asilvestrada y acumulando matos, cuando se podíen tar abriendo espacios pa güertes, esbrozando, podando…  Pero claro, pa siquiera figurase facer eso tienes que conocer el campu y acabar con esa mentalidá que va años s’espeyaba nes palabres d’un insigne illustre  n’Uviéu  que dicía con sorna aquello de `lo que nos faltaba, vaques y güertes´. Ello ye que parez ser qu’Uviéu quier ser la ciudá que sigui durmiendo la siesta…”, llamentó l’autor de La ciudad agropolitana. La aldea cosmopolita.

Too ello a resultes de la falta d’una teoría económica de l’aldea que sí que s’acolumbró dende’l pensamientu anarquista nos anicios de la Revolución Industrial y que llamaba a mirar pola tierra en cuenta d’entrar a la fábrica, recordó Izquierdo. Una teoría económica que ta a tiempu de reformulase “enantes de que’l cambiu climáticu nos lleve al colapsu qu’acompaña a tolos grandes cambios históricos, que se pueden allargar cien años y que pel mediu dexen miles de muertes, anque nun les veamos na media páxina qu’esos cambios históricos ocupen nos llibros d’Historia”.

Esa reformulación pa una teoría económica de l’aldea pasa por cuatro puntos, espunxo: el primeru, la recuperación del sistema agroecolóxicu local, nel qu’hai una visión sistémica de la ganadería, l’agricultura y lo forestal, en cuenta de la división actual que lleva a los desequilibrios que vemos nel paisaxe y na economía; el segundu, l’autonomía enerxética, que diba ser posible al paicer d’Izquierdo, anque’l mayor pilancu diba ser la llexislación vixente y la burocracia; el terceru, el que los servicios agrosistémicos tengan la so recompensa en cuantes que s’ocupen del cuidáu forestal, mirando polo control de los incendios o pol mantenimientu de caminos,  lo qu’había revertir na propia aldea; y p’acabar, el carácter emprendedor de la xente que vive nes aldees, tola xente que llega nuevo y que conforma l’aldea cosmopolita: “Rodrigo Cuevas xenera’l so propiu mundu dende l’aldea y dende la so propia concepción de la mesma. Eso yá ta pasando, esa composición diferente de lo rural yá empezó y hai que saber aprovechalo buscando l’equilibriu ente quien vive n’aldea y quien vive de l’aldea”.

Dende l’añu pasáu trabáyase nesta llinia en Mual, un pueblín de Cangas del Narcea, onde l’asociación vecinal se punxo en contactu con Izquierdo pa construyir dende lo rural: “Pa eso necsitamos comunidá y colo primero qu’empezamos foi con una concertación parcelaria ente pequeñes propiedades pa ser quien a producir alimentos que van a abastecer a una rede, que se conforma col vínculu que se caltién ente quien queda nel pueblu y quien ta fuera, les y los fiyos que tovía vuelven al pueblu y s’involucren nel proyectu”. Tamién hai que tener en cuenta l’autoestima y el valor a lo que se produz, “el famosu fabón de Mual, por exemplu, qu’entá nun existe como marca, pero ye namás cosa de ponese a falar d’él”. Y pa xestionar too ello, había falta d’una cooperativa de xente mozo que caltuviera’l proyectu: “Ye necesaria una comunidá interxenaracional pa mantener los vínculos y pa que la propia comunidá t’atienda: el pueblu tien de ser un sitiu nel que vivir tola vida”.

La pólvora ta descubierta, anque la mirada cortoplacista de les polítiques urbanístiques y económiques nun sean quien a vela. Falta tamién l’análisis dende’l puntu de vista de xéneru en too ello, como señaló na charla Sandra Dema, profesora de la Universidá d’Uviéu. Pela so parte, Jaime Izquierdo pon el so granín d’arena y, dende’l so “insistencialismu”, lleva años encamentando, coles ferramientes del rigor, l’análisis y la reflexón, que ye tiempu de garrar el camín pel que yá s’arrancó en bien de sitios d’Europa: “Hai que dar un pesu mayor a lo rural; Ye hora de que s’entienda que les ciudades pequeñes y intermedies que tán en rellación col campu van tener meyor futuru. Si nun revertimos el modelu actual, nun vamos vivir”.

Actualidad

Dejar respuesta

Please enter your comment!
Please enter your name here