Estrenu en TPA de ‘La Reválida’, el primer concursu n’asturianu y n’horariu de máxima audiencia

Nel programa, presentáu por María Cotiello, van competir cada selmana tres persones conocíes poniendo a prueba lo que deprendieron cuando diben al colexu

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

A partir d’esti xueves, tres adultos conocíos pol públicu asturianu van sentase cada selmana delantre de los pupitres d’una aula televisiva pa poner a prueba lo que deprendieron, o lo que recuerden, de la so dómina de colexu. Esi ye’l plantegamientu xeneral de La Reválida, un espaciu de la productora uvieína Ondas TV pa TPA que s’estrena pasao mañana, a les diez y media de la nueche, con un datu significativu: ye’l primer concursu n’asturianu y en ‘prime time’ (horariu de máxima audiencia) nos quince años d’hestoria de la televisión pública asturiana.

Les actrices Nerea Vázquez, Cris Puertas o María La Vikinga, los actores Pedro Durán o Alberto Rodríguez, la escritora Pilar Sánchez Vicente, los ex ciclistes Rocío Gamonal y Chechu Rubiera, la gaitera Andrea Joglar, l’acordionista David Varela, la percusionista Leticia Baselgas, el periodista Inaciu Galán, la historiadora Arantza Margolles, la guisandera Viri Fernández, el gastrónomu David Castañón, el mineru xubiláu y promotor de los deportes tradicionales José Álvarez Pola, el radiofonista Miguel Fernandi Burilo o el meteorólogu David Arango son dalgunes de les ventisiete persones que van pasar per La Reválida a lo llargo de los nueve programes que formen esta primer temporada.

David Varela, Leticia Baselgas y Chechu Rubiera, con Paloma Llera y Ángela López.

Esi alumnáu formáu por cares conocíes va enfrentase a cinco estayes nes que va tener que dir respondiendo entrugues y resolviendo pruebes sobre materies incluíes nel temariu de lo qu’anguaño ye Educación Primaria y Educación Secundaria Obligatoria, lo que foi Educación Xeneral Básica y Bachilleratu Unificáu Polivalente o’l primer ciclu de Formación Profesional pal alumnáu menos mozu. De les tres persones participantes en cada programa solo una va llograr superar La Reválida, y esi esfuerzu va tener como recompensa un premiu de material destináu a la entidá social que’l ganador o la ganadora escueya.

El concursu cunta como presentadora cola mierense María Cotiello, una actriz con amplia esperiencia en cine, televisión y teatru dientro y fuera d’Asturies. Ente otros proyectos, trabayó pa la pantalla grande en Las trece rosas, baxo la dirección d’Emilio Martínez Lázaro, y en series de Televisión Española, Cuatro o Antena 3 como 14 de abril. La República, Amar en tiempos revueltos, El Ministerio del Tiempo, Bandolera o Hay alguien ahí. En TPA presentó va cinco años el programa De cai.

Les dos directores, Ángela López y Paloma Fernández, na sala de realización.

Les directores de La Reválida son dos periodistes tamién con llarga esperiencia en televisión, en canales autonómicos y estatales: l’avilesina Paloma Fernández Llera y la xixonesa Ángela López. L’asesor llingüísticu ye’l periodista y escritor Paco Álvarez, redactor de Nortes.

Los nueves programes d’esta primer temporada grabáronse nel mes d’agostu nun espaciu cedíu pol Institutu d’Educación Secundaria Universidá Llaboral, nel que l’equipu de producción recreó una aula con tou detalle. Ente les entidaes collaboradores ta l’Academia de la Llingua Asturiana.

Actualidad

Dejar respuesta

Please enter your comment!
Please enter your name here