Desenterrar el pasáu siempre ye apasionante y más entá si cuentes cola guía de Margarita Fernández Mier, doctora n’historia pola Universidá d’Uviéu (1995) y catedrática d’Historia Medieval nel departamentu d’Historia d’esta mesma institución. Tamién ye directora del grupu d’investigación Llabor, na so denominación nel ámbitu local d’Asturies, que foi medrando hasta reconvertise nel equipu multidisciplincar Social Landscape. De ser de pueblu, de les histories qu’habiten nes fondures de la tierra que pisamos y de la necesidá y l’enfotu en sacar el saber universitariu y científicu a les caleyes faló nel Centru Social Autoxestionáu L’Apiaderu la catedrática d’Historia Medieval nes xornaes Rurales y Vives acabantes de celebrar esti mes d’ochobre.
¿Qué ye’l grupu Llabor?
N’asturianu denominamos a esti grupu Llabor y Social Landscape na Universidá d’Uviéu, al entrar equí investigadores d’otres disciplines. Esti ye un grupu d’investigación nel que participamos yo como directora y una montonera de xente que facemos arqueoloxía, documentamos al campesináu a lo llargo de la historia al traviés de l’arqueoloxía. El problema a la hora d’investigar a un grupu social como’l campesináu ye qu’aparez poco na documentación escrita, sobre too na Edá Media, asina que buscamos otres fontes d’información que nos falen d’esi campesináu. Al traviés d’estes fontes arqueolóxiques podemos facenos una idea d’ónde y cómo vivía esi grupu social.
Margarita Fernández Mier nel Remediu. Semeya: María Arce
Asina, amás de les fontes materiales, nesti paisaxe resiliente d’Asturies, que resiste y s’adapta a los cambios, tenemos en cuenta otres fontes como la toponimia, que la utilizamos muncho pa les reconstrucciones de tipu históricu. Esa resiliencia de los pueblos mantiénse na toponimia, con nomes de llugares que yá se puen topar nel sieglu XII, como nos pasó en Vigaña onde alcontramos un documentu escritu cola toponimia que marcaba les delimitaciones del terrén. Coles prospecciones en superficie, los sondeos y les escavaciones n’área descubrimos los espacios agrícolas, los ganaderos o los domésticos. Al empar, cola arqueobioloxía estudiamos les semilles que semaben o los abonos qu’utilizaben, polo que podemos saber de la so alimentación o de cómo trabayaba’l campesináu.
¿D’ónde surde esti interés por estudiar el campesináu?
Prácticamente toles persones qu’estudiamos nesti campu, alumnáu, exalumnáu, profesoráu…, tenemos dalgún raigañu nel mundu rural y una implicación social col sitiu nel que tamos trabayando. Toos y toes tenemos orixe nesi mundu rural y consideramos que tenemos dalgo qu’apurrir a esti mundu. Nel mio casu soi de San Cloyo y bona parte de les mios investigaciones toi faciéndoles en Vigaña (Balmonte), el pueblu del mio home, onde too se desarrolla en contactu y collaboración cola población d’ellí.
¿Ye entós un apueste pola revalorización del mundu rural?
Dende los años sesenta principió a cuayar con fuercia una visión peyorativa del mundu rural y enrraigonó con fuercia la idea de falta de futuru nesti ámbitu. Ye verdá que nos últimos tiempos ta cambiando un poco esta idea y sobre too ente la xente mozo, que va considerando que sí que tien un sitiu propiu nel mundu rural. Amás, quiciás esta idea garró más fuercia nos últimos tiempos a cuenta de la pandemia. Pola nuestra parte, dende la nuestra posición na Universidá y la nuestra formación, queremos facer esi llabor d’intermediación y xenerar discursos alternativos a esa visión peyorativa del mediu rural.
¿Pue ser esa minusvaloración de lo rural una profecía autocumplida?
Guapamente. Dende los años sesenta hai una política premeditada de separar lo rural y lo urbano, de primar lo urbano penriba de lo rural. Cola idea del desarrollismu franquista qu’arranca nos cincuenta y sigui operando nes décades siguientes desenvuélvense planteamientos que desconocen toles claves del mediu rural, les estratexes de xestión, de gobernanza, d’organización y de cultura, incluyida la llingua asturiana. Hai que reconocer que nesa política trunfaron.
Sicasí, como apunta, parez qu’agora hai “brotes verdes” no tocántenes al mediu rural.
Sí, efectivamente hai brotes verdes, otru cantar ye que los asfixen. Hai xente mozo del mediu rural que ta formada, con carreres, y que quier quedar ehí, que quier siguir tirando poles esplotaciones ganaderes o agrícolas. Esi discursu de fracasu yá nun funciona, el que se queda ye porque quier quedar, porque tien interés y porque s’identifica con esti mediu.
Nel so trabayu pon munchu enfotu en sacar el conocimientu científicu, históricu, a la cai, n’implicar a la xente nel conocimiento científicu y académicu: ¿Ye la forma de que la Universidá salga a la cai?
La Universidá nun sal a la cai pa nada. Yo soi mui de pueblu y la mitá de la mio vida ta nesi pueblu. Tener ehí los raigaños ye importante. Nel casu míu, trabayé muncho tiempu na Universidá de Lleón y ehí impartía Didáctica de la Historia. Asina que vime nel fregáu de formar a los y les maestres que diben poner escuela en primaria de cómo enseñar esta asignatura. Di munches vueltes en cómo facelo y implíqueme cola población más menudo col enfotu de buscar la meyor manera d’allegar el conocimiento históricu a la chavalería de primaria y inclusive de secundaria.
Ye mui necesario salir d’esos edificios tan guapos que tenemos y entrar en contactu cola sociedá. Na Universidá avezamos a vivir pendientes de la competitividá de proyección esterior a la que la propia institución nos lleva, escaeciendo el propiu territoriui nel que tamos y más el mundu rural. Pa muestra, na Universidá d’Uviéu nun hai una llinia clara d’estudios rurales, fueron abandonándose o prácticamente desapaecieron. Esta situación ye mui distinta n’otros países, como pue ser Inglatera o el sur de Francia, onde se tomen mui en cuenta estos estudios y se sofiten y faen espoxigar dende les mesmes instituciones académiques.
“Asturies, paraísu natural” ye l’eslogan col que se viende esti territoriu fuera. ¿Cuánto tien de natural y cuánto de cultural?
Esi eslogan funcionó turísticamente, pero tamién significa echar a la xente del so territoriu. Asturies nun ye un paraísu natural sinon antropizáu, fechu polo ser humanu. Efectivamente ye un paisaxe mui aprovechable turísticamente, pero tien que ver cola mano del ser humanu. En cuenta de centranos en vender esbardos y llobos habíemos saber valorar esi paisaxe como resultáu de la tresformación humana a lo llargo de la historia, que ye lo que nosotros facemos. Dende les nuestres investigaciones, a lo primero falábemos de paisaxe cultural, pero’l mesmu términu de paisaxe significa tresformación del mediu natural.
¿Qué-y diz el nuestru territorio dende’l pasáu al futuru?
De mano ayúdanos a conocenos un poco meyor. N’Asturies el conocimientu y lo que se conoz a nivel xeneral céntrase n’Alta Edá Media, que coincide cola monarquía asturiana y lo único que sabemos ye de los reis. Lo que queremos saber ye qué hai más allá d’esa estructura política. Por poner un casu: na ilesia de Valdediós, ¿quién diba a misa con Alfonso III? Y nes otres ilesies tamién, tal parez qu’eses ilesies taben vacies a nun ser pol monarca y el cura. Hai qu’enanchar esta visión tradicional y mirar al campesináu, qu’hasta la Revolución Industrial yera’l 95 por ciento de la población y, sicasí, nun sabemos prácticamente nada d’esi grupu social. La historia que nos cuenten ta mediatizada polos grandes rellatos, por toos esos mitos covadonguistes que nun nos dexen facer una verdadera historia social.
¿Qué podemos deprender d’esti trabayu arqueolóxicu que tán faciendo?
Hasta agora, cuando se facía investigación sobre’l campesináu y los señores entendíase que los cambios y les innovaciones teníen que ver colos señores, pero munches de les tresformaciones tienen que ver col conocimientu del campesináu y non colos señores. Esto llévanos a revalorizar les decisiones del campesináu, la agency, que se diz agora, la so capacidá d’axencia, la so autonomía y les formes de xestión que tresformaron el territorio y la vida. La xente que trabaya nel mundu rural conoz mui bien el terrén nel que se mueve, tien los sos propios códigos de gobernanza y sobre eso tenemos que llevantar perspectives de futuru, nun se pue facer tabula rasa.
Una característica fundamental del so trabayu en Vigaña ye la implicación col propiu pueblu. ¿Cuál ye’l trucu p’allegar el conocimiento científicu a la xente del pueblu?
Nel nuestru proyectu, al acabar les escavaciones entamamos unos talleres nos que buscamos la implicación de tola xente del pueblu col oxetivu de llegar a un equilibrio ente’l conocimientu local y el científicu. Tendemos a pensar que’l conocimientu científicu ta penriba del basáu na esperiencia, esos saberes de tener bien claro cuál ye’l terrén nel que se pue plantar, buscar materiales, construyir… Asina que nos talleres buscamos la participación de la xente qu’apurre’l so saber al conocimiento científicu que vamos xenerando a cuenta de les escavaciones. Dende teitar, llevantar una cabaña o facer pan nun fornu de los d’enantes.
Tamién incide nel papel de la escuela nesti cambiu de visión del mundu rural.
El profesoráu tien una responsabilidá grande nesti sentíu, en nun contribuyir a enanchar la distancia ente la realidá que vive l’alumnáu a diario y lo qu’apriende na escuela. Hemos d’avezanos a transitar con naturalidá’l camín de lo local a lo global y viceversa, lo global nun pue facenos perder la perspectiva de la realidá qu’habitamos.
En Vigaña tenemos un proyectu cola escuela de Balmonte que naz con esti enfotu d’enseñar a los y les rapacines la so propia historia, a tener una visión crítica y a conocer el método cientifícu dende la base. Pa eso buscamos temátiques alredor de l’arqueoloxía y dende ehí fáese’l proyectu didácticu de la escuela. El primer añu centrámonos nel monasteriu medieval qu’hai en Balmonte y dende ehí fiximos una montonera de talleres: cerámica, escavación…Al final los y les neñes fixeron una conferencia na que compartieron tolo que deprendieron. Asina revalorizamos al empar les humanidaes faciendo al alumnáu entender el método científicu al travies de les ciencies sociales ensin arrequexalu non científico puro y duro.
