La banda de rock Dixebra creóse un 6 de xineru de 1987. D’entós p’acá, nun dexaron de tocar nin un solu añu anque, eso sí, el so soníu, composición y lletres foron cambiando a midida que pasaben los años. Dende unes lletres que podemos meter nel asturianismu políticu más radical y un soníu más punk, el grupu de rock avilesín foi evolucionando hasta abrir les temátiques y camudar d’estilu, evolucionando hasta otru estilu muncho más mestizu, variáu y con infinidá de matices, nel qu’entren toa clas d’influyencies: ska, reggae, funk, rap, metal, folk…
A lo llargo d’estos 35 años, convirtiéronse nuna referefencia del panorama musical asturianu. Conciertos, discos, xires per Asturies y fuera d’Asturies convirtiéronlos nún de los grupos más destacaos del panorama musical asturianu. Pioneros, por casu, nel emplegu de la gaita nuna formación de Rock, foron y son una inspiración pa munchos otros grupos de rock n’asturianu que vinieron detrás.
A pesar de tola evolución, hai coses que nun cambiaron en Dixebra y que’l propiu grupu resume en trés premises básiques: L’emplegu esclusivu de la llingua asturiana, lletres comprometíes y descriptives de la realidá asturiana, y utilización de la gaita y elementos de la tradición sonora asturiana.
Cantares míticos
Delles de les sos composiciones tiénense convertío en verdaderos himnos y reflexen como naide la realidá social, llaboral, política o cultural d’esta tierra, como ye’l casu de «Rapaza nacionaliega», «Nun llores», «Mañana fría», «La danza», «Canciu d’amor», «Tía Nemesia», «Indios», «Don Vito» y munches otres. Tanto ye asina que, aseguren dende’l grupu, “puede siguise la historia recién d’Asturies al traviés de les lletres”, nes que suelen facer referencia a munchos de los acontecimientos y socedíos que se desarrollaron nos últimos trenta años. Amás, el so compromisu y solidaridá llevólos a tocar desinteresadamente por causes y colectivos como la insumisión, contra el paru y la probeza, los despidíos de Duro Felguera, el sector naval, la oficialidá del asturianu, la minería, contra la guerra n’Irak o n’apoyu de represaliaos por movilizaciones socio-llaborales.
Internacionales
Curtíos en milenta conciertos, fixéronse con un merecíu prestixu como poseyedores d’ún de los meyores directos que se pueden ver n’Asturies. Nesti tiempu percorrieron prácticamente tola xeografía asturiana, amás de bien de salíes fuera d’ella (con incidencia bultable en llugares como Euskal Herria, Galicia o Cantabria), llegando a tocar tamién per Europa (Bretaña, Occitania, Valonia, Laponia, etc). Hai que destacar que foron el primer grupu de rock asturianu en participar nel afamáu Festival Intercélticu de Lorient o nel Liet International. Otra manera, el so llabor discográficu llevólos a la publicación d’una quincena de discos.
Propuestes pal XXXV aniversariu
Pa festexar esti XXXV Aniversariu, el grupu Dixebra va entamar una serie d’actividaes y iniciatives que van durar tol añu 2022. Tán yá rematando lo que va ser el so próximu trabayu, un discu-llibru tituláu Ente la niebla, con venti temes orixinales que xiren alredor de la historia de les clases populares asturianes; na primavera va inaugurase una esposición sobre la so trayectoria y tolo qu’arrodia a la filosofía de la banda; van facer una xira na que s’inclúin dellos conciertos especiales; hai previsto tamién la producción d’un documental y, como remate, ún de los sos fundadores y cantante, Xune Elipe, va publicar un llibru sobre’l contestu y circunstancies nes que Dixebra tuvo que desenvolver el so llabor. De too ello van dir dando anuncia y información completa a midida que s’acerque’l momentu precisu.
