Reforma l’estatutu y cultura política: ente lo estratéxico y lo tolerable

Ta nes nueses manes dotanos d’estructures polítiques que piensen dende Asturies y p’Asturies, poniendo nel centru los derechos sociales de la mayoría de la población. ¿Sedremos dalgún día quién a ello?

Recomendados

Iyán Glez.
Iyán Glez.
Iyán Glez, (1985, Uviéu) // Xeólogu, docente de secundaria y militante soberanista

N’Asturies llevamos cuatro décades y media lluchando pola recuperación llingüística, como parte de munches otres lluches venceyaes a l’autoestima coleutiva y los derechos de les asturianes y asturianos. Dende que Conceyu Bable nos ‘70 afitare un modelu d’idioma pal futuru y plantegare una llucha sociopolítica en tolos ámbitos -institucionales, asociativos, sindicales, vecinales…- la reivindicación nun dexó siquiera un añu de tar presente nes cais y nos medios afitando un “nós” asturianu que, tamién, truxo esta -probetaya- autonomía ensin desendolcar. Sicasí, nel últimu par de décades esta llucha pol idioma ta enfocada dende un puntu de vista de los derechos individuales –yo tengo “derechu a poder vivir n’asturianu”, a “recibir escolarización”, a “tener conteníos audiovisuales nos medios”-, como si’l suxetu políticu que carez la opresión y la violenta sostitución llingüística fuere individual y non coleutivu: el pueblu asturianu, al que-y llanten un idioma d’estáu al traviés de constituciones, escuela, medios y estructures públiques y privaes.

Nesti sen, el fracasu de les negociaciones pa reformar l’estatutu ya incluyir nelli la oficialidá -y otres munches midíes de gran urxencia política- dexa delles cuestiones enriba la mesa. A priori, paecía que nesti procesín diba haber dos organizaciones –Izquierda Unida y Podemos Asturies– pa les que, dempués de muncha brenga interna y esterna, la cuestión llingüística taba integrada dafechu en programes y yera una reivindicación como les demás. Per otru llau, el movimientu de reivindicación llingüística diba tener que facer por convencer a otros dos actores -la FSA-PSOE y Foro Asturias– que, tres movese de les sos postures históriques antiasturianes -nel primer casu- y, a la posible busca d’un espaciu propiu al marxe de la derecha ultraespañolista -nel segundu- tendríen qu’allegase a posiciones favoratibles. Nesti cortexu ente “convencíos” y “convencibles” paecía que diba tar el xuegu.

“El fracasu de les negociaciones pa reformar l’estatutu ya incluyir nelli la oficialidá dexa delles cuestiones enriba la mesa”

Sicasí, lo que ye estratéxico pal asturianismu y les sos espresiones sociopolítiques nestos cuarenta y picu años, non necesariamente lo ye pal restu d’espacios políticos. La negociación tuércese cuando Foro introduz la cláusula de los 3/5 pa l’aprobación d’una llei d’oficialidá -que yera una bomba de reloxería a detonar nun futuru próximu– y, especialmente, cuando condiciona los alcuerdos en materia de derechos llingüísticos a cuestiones fiscales, determinadamente empobinaes a favorecer a les rentes altes -claro ta-. Nesi contestu, la propuesta de los 3/5 ye asumida por tolos actores y, nel casu de la fiscalidá, xenérase un bloquéu evidente, al introducir cuestiones que nada tienen que ver col idioma nin cola reforma l’estatutu. Nel descuentu, Podemos Asturies ufre una propuesta de desbloquéu que ye aceutada por Foro y la FSA observa la xugada en silenciu, esperando a la reaición d’IU que zarra les puertes a cualquier contrapropuesta -como si la fiscalidá d’anguaño fuere perfeuta, inmeyorable-, xenerando como reaición que’l partíu de Barbón cuerra al mesmu espaciu, marcando la xugada d’IU y dexando n’órsai a Podemos, que fixere l’esfuerzu por movese del espaciu de confort. El mesmu día, paradóxicamente, PSOE, Podemos, IU + confluencies pautaben cola connivencia de la CEOE y el votu de les dereches de Ciudadanos, UPN y PDeCat una pseudorreforma llaboral que dexaba pa prau la derogación llevada nos programes eleutorales de los impulsores de la mesma. Y equí ye onde apaecen conceutos políticos interesantes a la d’analizar qué ye pa caún de los partíos la cuestión llingüística, estremando mui bien lo estratéxico y lo tolerable.

Pa una gran parte del espectru políticu n’Asturies la cuestión llingüística, como tolo que tien que ver cola meyora del autogobiernu, ye dalgo tolerable: asúmese, recuéyese, nun se prautica na vida diaria de les organizaciones y, poques gracies, tampoco atopamos avances granibles nes instituciones cogobernaes pola FSA, nin Podemos, nin Izquierda Unida. Nun vamos atopar conceyos gobernaos por estes fuerces nos que la presencia del asturianu tea equiparada cola del castellán, siquiera mínimamente, nin estes organizaciones prautiquen internamente un usu siquiera comparable cuantitativa nin muncho menos cualitativamente.

Pa la galaxa asturianista, un movimientu eminentemente progresista, con cuatro xeneraciones yá de militantes que participen, amás de nel llingüísticu, en movilizaciones sociopolítiques de toa triba, la cuestión llingüística nun ye dalgo prioritario por repunancia: yelo estratéxicamente. Al aviesu que lo plantegao históricamente poles organizaciones estatales n’Asturies, el reconocimientu de la oficialidá del asturianu y del gallego-asturiano ye dalgo que tien una importancia material clave pa desendolcar una cultura política nueva n’Asturies que nos saque de la exa histórica del autonomismu de tercera y nos incluya na exa GALEUSCAT. Sábenlo bien los enemigos d’ella: nun se trata namás d’una cuestión de derechos individuales o d’amor pola llingüística; ye ún de los pegollos, xunto con otros de corte económicu y territorial, so los que construyir una nueva hexemonía que, cola autoestima del pueblu asturianu por bandera, defenda los intereses económicos, sociales y nacionales d’esi suxetu n’oposición a los del gran capital, la globalización y les formes que garren estos nel estáu y n’Asturies.

Y ye qu’a la hora d’encuadrar y clasificar el sistema políticu asturianu, quiciabes al que más se vien asemeyando nel contestu estatal ye al d’Andalucía: ta conformáu por una serie d’organizaciones sindicales y polítiques con fondu arraigu social históricu, venceyáu a les izquierdes clásiques veníes a social-lliberales, que vienen gobernando los nuesos países. Al tiempu, esiste una fonda identidá propia, que nun cuaya en proyeutos políticos propios y estables nel tiempu pero que ta presente n’amplios seutores sociales o sindicales, xenerando un texíu y una identificación (proto)nacional importante. De la mesma manera, esiste un espaciu pa les dereches qu’en poques ocasiones algama’l poder, nun siendo en crisis de réxime como la que provocaría l’apaición de Foro n’Asturies tres l’arecismu o la qu’anguaño vive Andalucía con Moreno Bonilla y la ultraderecha.

Manifestación pola oficialidá. Foto: Iván G. Fernández

Sobra dicir qu’esti cambiu de cultura política n’Asturies, llevaría arreyao una fonda tresformación d’equilibrios. Per un llau, ye una complicación pa una derecha cavernaria que vería argayar l’usu d’una parte de la historia d’esta tierra como exa xustificadora y vertebradora de la nacencia del so suxetu políticu estrapayador de cultures y derechos. D’otra banda, los territorios que desendolquen una cultura política propia son, anguaño, sitios nos que les dereches garren formes non eminentemente franquistes y, en munchos casos, enfoques incluso republicanos. Asina, les intenciones de votu pa la ultraderecha en GALEUSCAT son mui baxes como consecuencia del propiu sistema políticu d’esos territorios, nos que l’anti-autonomismu ye una barrera que, si ye bandera de la ultraderecha, nun la garra namás qu’una minoría. Qué dicir, tamién, de la posibilidá de reconfiguración d’un espaciu políticu de la izquierda n’Asturies nel qu’otres organizaciones perdieren puxu xenerador de discursu, tamién, empapáu de cierres categoriales.

Plantegábase n’Asturies l’alderique en términos de “oficialidá” y “fiscalidá xusta”, cuando lo qu’había enriba la mesa yera “cultura política nueva” o siguir na “autonomía ensin autonomismu” que siquiera nos permite apellar a una axencia tributaria propia y a la capacidá recaldatoria asturiana, p’axeitala a les carauterístiques propies de cara a facela más xusta y repartidora de la riqueza. Va pa cinco décades nes que conocemos hasta ónde nos lleva la vía del auto-odiu anti-autonomista mentanto otros territorios espurrieron social, cultural y económicamente de la mano del soberanismu. Va pa cinco décades que nos venden que, nel debate ente cuestión social y cuestión nacional, hai qu’apostar polo primero a cambiu de nun tener enxamás lo segundo, como si fueren incompatibles y como si esta estratexa fixere del nuesu país un paraísu socialista y non un ermu industrial. Dícennos, dende les izquierdes y sindicatos del réxime, que pa tar nun conseyu de ministros en plena ofensiva otanista, pa nun derogar la llei mordaza, pa maquillar la reforma llaboral o pa tragar con una harmonización fiscal viniente… La política del pautu y la negociación ye útil. Amuésense, estes izquierdes del réxime, como gatinos énte la CEOE pa lo que consideren estratéxico -amosar una reforma tímida de les polítiques del PP de Rajoy- mentanto que pa lo que consideren tolerable asoleyen tol so músculu ideolóxicu, contradictoriu pa con tola so llínia política entreguista de décades n’Asturies y nel estáu. Xestos políticos a coste cero, vamos. Al tiempu, los discursos políticos más retrógrados y nacionalistes españoles caltrien na nuesa sociedá, ensin tol combate nel tarrén social y cultural que se podía tar dando dende una identidá solidaria ya integradora como ye l’asturiana, que ye muria de contención antifascista n’otres naciones del estáu.

Nes vinientes eleiciones van tornar a picar p’afalanos a votalos énte la enésima ofensiva fascista -que lo sedrá-. Van falanos de servicios públicos, de república, de derechos sociales, d’oficialidá y tamién de federalismu y autogobiernu… Pero sabemos dende hai bien de tiempu qu’hai temes centrales pal Modelu Asturies polos qu’enxamás van movese un milímetru del discursu de lo tolerable que, si cai solo, nun m’opongo, pero que si hai que se mover por ello, ye que tampoco me convencía tanto.

Ta nes nueses manes dotanos d’estructures polítiques que piensen dende Asturies y p’Asturies, poniendo nel centru los derechos sociales de la mayoría de la población. ¿Sedremos dalgún día quién a ello?

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí