“Trabayé, trabayo y voi trabayar pa que nel futuru naide tenga de ser activista pol asturianu y l’eonaviegu”

El Día de Les Lletres valió pa nomar académicos de la llingua de númberu y d’honor a Lisardo Lombardía y a Inaciu Galán.

Recomendados

Nicolás Bardio
Nicolás Bardio
Es politólogo, escritor y creador de juegos de rol.

Nun yera’l Campoamor, pero tampoco un aula de la universidá pa mui poca xente. L’actu de les Lletres y la vida de l’Academia de la Llingua van recuperando adulces el ritmu d’otru tiempu y si bien ye verdá que’l Presidente de l’ALLA yá mos adelantó que la UABRA d’esti añu sigue siendo telemática; l’actu de les lletres volvió a intentar recuperar la envergadura que tenía enantes. A la llegada, los asistentes al actu, ente los que taba’l presidente asturiano Adrián Barbón, recibieron un númberu de Lliteratura, la revista lliteraria qu’edita l’Academia de la Llingua, y unes “letres de pan”, unos panes de lleche con forma de lletra y, dientro, unes cuantes pallabres del diccionariu. Una forma guapa y bien fartona de cellebrar un día tan importante.

Xosé Antón González Riaño y Adrián Barbón. Semeya: Iván G. Fernández

L’actu entamó a la hora con un pieza musical a la gaita de Xuacu Amieva pa siguir darréu la llectura de l’acta de nomamientu de los dos nuevos académicos: Lisardo Lombardía (honoríficu) y Inaciu Galán (de númberu). Darréu, el Presidente de l’ALLA, Xosé Antón González Riaño, entregó-yos l’emblema de la institución y fixeron dos discursos. El de Lisardo Lombardía tuvo cargáu d’emotividá y de recuerdu a les pallabres del poeta valdesán Fernán Coronas: “Au tán los mieus asturianos, au tán las Asturias mías”. Tamién, fixo Lombardía referencies a la falta de prioridá de la cuestión de la oficialidá nos partíos negociadores de la reforma estatutaria.

Lisardo Lombardía. Semeya: Iván G. Fernández

Depués, llegó-y el turnu a Inaciu Galán, el primer académicu millennial que tien la institución, que recordó a munches de les persones que yá nun taben y que trabayaren pola Academia, que recordó’l día en que, con namás 17 años entrare na Academia a facer la prueba de conocencia y que citó, tamién, al diputáu de Foro Asturias, presnete nel Actu, Adrián Pumares, al que-y pidió esplícitamente que dea un pasu alantre por tener él la responsabilidá del futuru del idioma. Otra de les coses que solliñó Inaciu Galán foi qu’él yera un activista porque nun-y quedaba más remediu que selo por mor de la falta de derechos llingüísticos que carez la población d’Asturies. L’académicu, que tamién s’espresó n’eonaviego dixo que “trabayé, trabayo y voi trabayar pa que nel futuru naide tenga de ser activista pol asturianu y l’eonaviegu.”. Amás, fixo referencia a la necesidá de tender pontes con otros territorios como Lleón o Miranda onde l’asturianu “yera tamién la llingua propia” y que, nesa situación, “Asturies, como llugar onde menos mal taba l’idioma, había asumir la so responsabilidá”.

Xosé Antón González Riaño. Semeya: Iván G. Fernández

Darréu, el Presidente de l’Academia garró la pallabra pa facer el so tradicional discursu nel que faló que “más que culpables había que buscar responsables”, y nel que fixo un gran apueste por deprender de los errores y poder facer na próxima llexislatura lo que nun se pudo facer nesta. “L’Academia nun va dase. Los asturianos y les asturianes nun van dase” Pidió xenerosidá y altor de mires y fixo autocrítica: De los partíos dixo que-yos faltó esi dexar el cálculu electoral cuando tocaba falar de la oficialidá, del asturianismu que nun foi quien a conectar coles bases d’estos partíos y de l’Academia que tampoco consiguió’l so oxetivu. Con un llamáu a consiguir la oficialidá, el Presidente finó’l discursu.

Xuacu Amieva. Semeya: Iván G. Fernández

Depués, hebo un recital de poesíes y una actuación del grupu de punk-rock Misiva depués de la que, de nueves, Xuacu Amieva punxo’l ramu al día de les lletres cola interpretación, con tol públicu de pies, del himnu d’Asturies “Asturies, Patria querida”.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí