Esti domingu 14 d’agostu finalizó la 51 edición de Festival Intercélticu de Lorient. Como tolos años, contó con presencia asturiana al traviés d’una delegación compuesta por persones y instituciones del país, representación especialmente importante ya qu’esti añu’l festival dedicábase a Asturies.
Pa los que que nun seyan mui conscientes de les dimensiones del eventu, el Festival Interceltique de Lorient cumplió 2022 51 años y los primeros datos que da la organización pa la edición d’aguaño ye qu’algamaron los 900.000 visitantes, cifra record. La so relevancia tamién puede vese como la retransmisión televisiva d’eventos del festival lleguen al 15 % de share.
P’Asturies esti edición yera especial, cada añu el festival dedícase a una de les naciones celtes participantes, y 2022 yera’l añu d’Asturies, dalgo que pasa cada 7 o 10 años ye dicir, una especie de xubiléu del celtismu européu. La presencia asturiana concretábase en que la organización del festival contrató a una riestra de grupos asturianos pa qu’actuaren nel festival, y pola so parte’l gobiernu del Principáu tenía qu’entamar una carpa con actuaciones musicales, un stand de turismu y un chigre asturianu na plaza central del festival. De mano, esi yera’l proyectu. Del resultáu de too esto hai, siempre lu hai, bastante debate, colo que voi dar la mio visión depués de pasar unos díes nel festival y conocer dalgo d’esti ámbitu.
“El proyectu del Principáu yera, de mano, ambiciosu, asina lo plantegó”
El proyectu del Principáu yera, de mano, ambiciosu, asina lo plantegó. Una bona presencia musical, cultural y lliteraria arriendes d’una bona imaxe como país pa llamar l’atención y aprovechar la presencia y la inversión fecha. El casu ye que’l resultáu final tien unos cuantos claroscuros, que tengo pa min, convién comentar y precisar.
La presencia muslcal nel festival, tanto la que dependía del propiu festival como del Principáu, tenía muncho pesu. Nomes más nuevos o más vieyos conformaron una ufierta grande y, sobre too variada. Va non tantos años nun se podía imaxinar qu’Asturies podía llevar a Lorient una delegación cola variedá y calidá que se llevó. Esto ye un llogru de la comunidá musical asturiana y un aciertu de la Conseyería. Con too y con ello, sí s’echó en falta la presencia de la canción asturiana, que pola so particularidá siempre llama muncho l’atención uquiera la lleves.
La carpa qu’agospió los conciertos de los grupos que llevaba’l Principáu cumplía colo esperao, por tamañu, calidá de soníu y comodidaes, y como’l públicu del festival ye mui agradecíu, cualquier actuación na carpa atropaba muncha atención, públicu y bon ambiente. Nun hai qu’escaecer que la “zona d’Asturies” al estilu “fan zone” taba situada nun espaciu privilexiáu dentro’l festival.
Onde tengo pa min surdió la decepción ye na presencia de promoción turística y la imaxe que se proyectó. Del proyectu ambiciosu que se tenía, y me consta que se tenía, pasamos a un puestu de turismu con poca personalidá, curtia de materiales afechiscos, ensín coherencia estética y una barra bastante probe en comparanza col chigre asturianu que se ponía otros años. La propia prensa bretona nel so diariu Le Télégramme califica la presencia de la zona d’asturies como “floxa” y “ensin ambiente”.
El comentariu ente muchos de los participante veteranos yera de “pero qué ye esto”. Poro, ensin entrar en más detalle, convién qu’entendamos qué pasó y sobre too por qué, pa poder meyorar pa otros años pero basándonos n’nálisis rigurosos.
Lo primero que se podría pensar ye que’l gobiernu del Principáu y la conseyería de Berta Piñán pasó, nun dio importancia al eventu y poro se ven esos aspectos tan meyorables. Pero’l casu ye nun ye asina, la inversión foi de 200.000 €, una cantidá bien curiosa dientro del presupuestu de la conseyería, pero sobre too, la presencia institucional foi la más alta hasta la fecha. El presidente del Principáu Adrián Barbón, la conseyera de Cultura y una bona riestra d’alcaldes de la comarca la sidra echaron varios díes nel festival, lo que ye una preba clara d’implicación. Naide quier dir a un sitiu a presumir de país y topase con problemes pa facer una semeya curiosa nel so propiu stand.
La comparación que siempre se fae, y esti añu con más intensidá, foi la presencia de la carpa galega. Con un puestu hosteleru con productu galego que tuvo muncho ésitu, mancó a munchos ver qué ambiente había ellí en comparanza cola Asturies fan zone. Pero equí hai que saber un tema importante. El gobiernu gallegu nun apostó por Lorient, polo menos esti añu, el responsable de la delegación galega nel Festival, Pablo Seoane, déxalo mui claro, la Consellería de Cultura nun s’implicó “en nada”. La presencia musical de Galicia nel festival foi la que contrata directamente’l Festival, ensin sofitu de la Xunta de Galicia, y el local hosteleru ye una iniciativa puramente privada que ve na instalación del so chigre una oportunidá de negociu.
¿Y qué pasó n’Asturies entós? Pues que’l Principáu sacó hasta 3 veces una convocatoria pa qu’una empresa garrara’l proyectu de poner el chigre ellí, con condiciones meyores que n’años anteriores, y naide se presentó. Asina, el proyectu qu’había quedó tocáu. Hai qu’entender que nun festival como esti la presencia hostelera ye mui importante, y más p’Asturies que tien na gastronomía un de los sos atractivos diferenciadores. Encuantes falló esa pata, la presencia de promoción turística fizo bastante agua. Personalmente creo que munches persones podíen entrar per un llau de la plaza y salir per otru y nun enterase de qu’ellí taba la carpa d’Asturies.
¿La falta d’interés del sector priváu esculpa al gobiernu del resultáu? Non. El principáu ye’l responsable de les coses, pa bien y pa mal, y la so responsabilidá yera que pudiéremos marchar toos d’ellí con bon sabor de boca. Pero convién que sepamos por qué´pasen les coses pa nun facer análisis equivocaos. Que Galicia lo faiga d’una manera o d’otra nun tiene que nos influenciar más allá de deprender d’esperiencies. Asturies tiene una oportunidá en Lorient d’atraer l’atención d’una comunidá mui grande, pudiendo sacar la cabeza n’Europa d’una manera que’l esquema promoción del gobiernu español nun nos permite. Si podemos tener una imaxe y un discursu basáu nuna reflesión sobre les nuestres fortaleces diferenciadores, podremos dir a cualesquier sitiu del mundu y sedremos más atractivos pa la inciativa empresarial pa que s’involucre en proyectos. Lo que tien qu’haber ye una cocherencia y planificación que permita qu’ondequiera que vayamos sepamos qué queremos contar y como facelo.
Yá ye triste que pa ensiñase al mundu, Asturies tenga que se disfrazar d’Astérix y Obélix y facer la pantomima esta de les naciones celtes. Pero más triste ye nun ser a montar un chigre en condiciones nuna plaza de Bretaña. Bona música nun fadremos, pero, como diz Lora, en chigres somos una puta potencia. Un gobiernín que nun ye capaz a montar una tabierna, nun va ser capaz a facer nada curioso. Y tamos viéndolo día a día, señores Barbón y Piñán.
Soria celta. Hispania delenda. Salutem plurimam.
Quiciabes una profesionalización del sector musical asturianu pudiera impulsar la presencia internacional nestos eventos. Hai que dar un pasu alante y dexar atrás el asociacionismu. Nesto tamién tien que trabayar l´alministración.
Nun pues ser que Asturies nun sepa montar un chigre en un festival. De otra cosa no sabremos pero de chigres somos expertos. El problema lo tenemos con los políticos asturianos q no son capaces ni de montar un buen chigre.
Les naciones celtes y el celtismu ye un inventu de marketing