Por un suxetu políticu al serviciu de los intereses d’Asturies

Un primer pasu hacia esi nuevu espaciu ye la llista Somos Asturies nes primaries de Podemos.

Recomendados

Xune Elipe
Xune Elipe
Músicu, cantante del grupu de rock "Dixebra" y activista en defensa de la llingua asturiana

Dende hai un tiempu vien falándose en determinaos ámbitos de la necesidá de construyir un suxetu políticu esclusivamente asturianu que sirva al interés de les clases populares y trabayadores del país y d’ésti nes sos necesidaes xenerales. A lo llargo de les últimes cuatro décades l’asturianismu intentólo n’infinidá d’ocasiones ensin éxitu, más allá d’algamar un diputáu cola coalición ente Unidá Nacionalista Asturiana y el Partíu Asturianista (1991) y esti últimu otru en solitario (1995) con una propuesta de calter tresversal qu’evolucionó hacia posiciones neolliberales y conservadores. Esta situación de fracasu continuáu y impotencia xeneró un estáu d’ánimu ente l’asturianismu que lu llevó a la frustración y la resignación. Anguaño, les persones y colectivos que nos reclamamos d’esa cultura política alcontrámonos espreganciaos en distintos proyectos o organizaciones nel meyor de los casos, o directamente fuera de toa actividá política. Pero, a cada vuelta, faise más necesaria una ferramienta d’esi calter que traya un aire nuevo a l’atmósfera política d’esta tierra; la entrada nel xuegu parllamentariu d’una opción progresista d’obediencia únicamente asturiana toi convenciu de que diba cambiar el tableru y facer modificar les posiciones al restu de fuercies.

Ábrese agora un tiempu nuevu de primaries en Podemos Asturies pa configurar la llista cola qu’afrontar les elecciones autonómiques del próximu mes de mayu. Nesi procesu una serie de persones a les que conozo dende hai bien de tiempu, a les que veo trabayar incansablemente y a les que-yos teo apreciu, animáronme en delles ocasiones a participar, pero siempre decliné la ufierta. Doi agora’l pasu depués d’una reflexón fonda y en viendo la importancia que van tener los comicios a la Xunta Xeneral, nos que según los resultaos que se dean les polítiques dirixíes a les persones y el devenir del país pueden ser mui distintes. Na llexislatura que vien ye mui necesario forciar a la FSA a abrir en serio la reforma del Estatutu d’Autonomía, la nuestra máxima norma llegal, un testu que muestra signos claros d’avieyamientu y que precisa d’un anovamientu que lu actualice y lu convierta nuna ferramienta amañosa pa l’Asturies del sieglu XXI. Hai qu’avanzar nel autogobiernu, blindar les polítiques sociales, asumir nueves competencies o completar les qu’hai, vertebrar el territoriu, frenar la despoblación, retener el talentu mozu y, por supuestu, protexer cola oficialidá los derechos civiles de los y les falantes de les llingües propies. En too ello l’Estatutu d’Autonomía ye fundamental y ésti nun puede siguir más tiempu ensin afrontar esa reforma imprescindible, hai que se poner a ello dende’l primer momentu de la llexislatura próxima.

Somos Asturies. Semeya: Luis Sevilla

La llista na que decidí incluir el mio nome, aceptó’l deséu que-yos tresmití de que dende la llealtá pudiere mantener un calter «independiente», que s’abriera a la sociedá y que superara la fase d’engarradiella interna. Ye imprescindible buscar perfiles nuevos que xeneren consensu y que s’integren nel proyectu, l’oxetivu final ha ser la creación d’un frente ampliu asturianu con funcionamientu independiente y ensin nengún tipu d’intervencionismu foranu, pero que pueda llegar a alcuerdos con otres fuercies estatales. La dispersión de votos ye un factor absolutamente negativu y de vital importancia nes próximes elecciones autonómiques, nes que dependiendo de les mayoríes que salgan d’elles esa necesaria y deseada reforma estatutaria va poder dase o non. Un primer pasu hacia esi nuevu suxetu políticu asturianu ye la llista Somos Asturies, que recupera non solo’l nome sinón l’espíritu d’aquellos años d’esperanza y ilusión; una candidatura na que nos integramos persones que reflexamos esa sociedá asturiana que nun se resigna nin baxa los brazos, que venimos de cultures polítiques distintes pero creemos na unidá y el llabor conxuntu, qu’apostamos por un modelu organizativu abiertu, plural y asturianu, ensin vixilancia nin tutela esterior. Los y les asturianistes, caún y caúna dende les sos posiciones, hemos empezar a pensar de manera colectiva, independientemente del llugar o organización na que se tea, hemos crear redes y texer complicidaes que nos permitar algamar intereses comunes; utilizando terminoloxía vintage diríamos ‘unidá d’acción’.

Doi esti pasu con esi enfotu, na creyencia sincera de que tovía tamos a tiempu de reconventir l’estáu de desánimu, d’acabar coles guerres fratricíes y cambiar la situación al nuestru favor. Soi de la opinión de que les persones públiques que nun venimos estrictamente de la política y que dicimos tener unos valores, ye nos momentos difíciles nos que debemos mostrar el nuestru compromisu de manera real y efectiva. Yo fáigolo agora, otra vuelta, al traviés de Somos Asturies.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí