Mientres aliendes hai vida

Ye factible, con voluntá real de tresformación, la creación d'un espaciu políticu qu'abrace a toa una sociedá asturiana que tuvo peleando por resistir a nun morrer

Recomendados

Paez que n’Asturies tamos viendo dellos movimientos que dan cierta esperanza. Nun sabemos si porque les eleiciones averen y a tol mundiu-y entra la urxencia, o porque de manera efectiva vamos esbrozando’l monte d’artos y escayos varios que mos enfrentaben, o xeneraben suspicacies constantes ente sectores, o mesmamente ente persones.

Siempres pensé que la desconfianza yera un activu emocional del capitalismu enormemente poderosu. Asina que cuantos más llazos de confianza seyamos quien a entetexer. Cuantos más abrazaos y abrazaes mos sintamos pol “otru”, meyor daremos los pasos necesarios pa dir tresformando Asturies y los nuesos conceyos; nuna tierra con futuru pa les que colaron, pa les que tán, y les que vendrán.

Paecióme una bona noticia que dende estremaes estayes se tovieren llanzando mensaxes d’unidá nel Conceyu d’Uviéu. Una unidá non como mantra, sinón en base a puntos comunes que los y les vecines d’Uviéu entienden como fundamentales p’afrontar los desaxustes y desquiciamientos continuaos del cantelismu: La Vega, El Naranco, Santullano, Les Fiestes de San Matéu, El Terracismu… Delles costiones que puen perfechamente articular l’entamu d’un movimientu ciertamente vecinal y popular, ciertamente municipalista.

Y asina vi con enfotu la propuesta que paez encabezar Belén Suárez Prieto. Qu’espero puea atropar  les esperiencies polítiques de base que lleven peleando por un Uviéu meyor dende distintes posiciones, pero que comparten una base fundamental: La de construyir un mundiu a comuña, a xunteta; nel que la convivencia y el bientar coleutivu tean en centru. Onde de manera efectiva se viva nun Conceyu: Esto ye nuna comunidá de xentes diverses que s’apoyen y s’acompañen nel caminar de la vida.

Vi con interés que dende Asturianistes por Bimenes pensaren dar un saltu axitador de calter autonómicu, anque paeciere cuásique un movimientu dignu d’epopeya clásica. Paezme interesante que se llogren articular a mediu plazu propuestes que cunten con aquelles agrupaciones independientes que faen una política municipalista, y claro ta, colos sos erros y aciertos. Nun sé si finalmente darán el pasu, pero sedría una magnífica noticia que participaran en dalgún momentu d’un proyeutu políticu asturianu que toviere los sos raigaños y los fundamentos principales na so base territorial hestórcia: Los Conceyos.

Igualmente sentí que’l recién creyáu proyeutu d’Aína daba un soplu d’eire fresco a la política asturiana. Porque más alló de ser un movimientu que ta acabantes de nacer, tamién ye verdá que parte de posiciones autónomes. Onde los y les sos miembros tienen un trabayu de llucha social detrás, que los avala como compañeros y compañeres de llucha esmolecíes polo común.

Nel propiu Podemos Asturies, la candidatura qu’encabeza Covadonga Tomé pienso que tamién ye potente. En primer llugar, pa esi propiu espaciu políticu. En segundu, pa lo que se quiera y pueda encadarmar dempués. Cunta con delles persones qu’amosaron na so mesma traxectoria, fuera y dientro de la política institucional, ser quien a creyar simpatíes compartíes y articular propuestes  qu’atropaben distintes estayes de la sociedá con cultures polítiques diferentes: Persones como Laura Tuero, que dexó en Xixón el pelleyu, y fexo una xera fantástica como vocera. Abúltame una persona claramente de consensu con una capacidá trabayu y una humildá y honestidá más que necesaries. Andrés Ron, que pesie a los movimientos inhabilitadores de ciertes llinies orgániques, lo cierto ye que ye’l responsable d’articular nel occidente asturianu una propuesta que fuere más alló de la FSA. Asina foi cómo se convirtió en diputáu del Occidente, y asina foi como ganó -de facto- les primaries orgániques de Podemos Asturies. Y por nun m’enguedeyar más con ello, mentaría a Xune Elipe. Pamidea ye una figura a destacar en munches estayes. Pero creyo que la principal ye la so independencia más alló de les sigles, o más alló de les sos participaciones específiques n’espacios peridentificaos. Pameque sentimos una pulsión asemeyada de querer retroalimentar espacios que consideramos positivos, pero que nun son únicos. Y ye que ye precisamente esa querencia por trescender a la propia ferramienta la que m’abulta más interesante, y la más afayadiza pa xenerar a posteriori aliances. Porque ensin esa querencia de la trescendencia del propiu preséu, se pue cayer fácilmente nel fanatismu, o terminar considerando o simplemente aplicando la conciencia de que’l mediu se convirtió irremediablemente nuna fin en sí mesma.

Per otra parte, les últimes noticies n’Izquierda Xunida danme igualmente esperanza. La de buscar una alianza amplia y plural que refuercie, nesi casu, les sos sigles hestóriques, y refuercie con ello al espaciu políticu que vaiga surdiendo pali que pali. Tal paez, que s’abren puertes d’oportunidá pa encadarmar un espaciu realmente novedosu, que non nuevu, pues les persones yá esistíen y yá participaben de lluches que de fechu son comunes. Quinxere saber, nesi sen, qué opinión tendrá Izquierda Asturiana, güei coalligada a Izquierda Xunida. Pero pamidea’l papel en Mieres ye cuanto menos d’interés. Una formación política que ta mui venceyada al republicanismu municipalista y federal de Pi i Maragall, y qu’evidentemente pue aportar, como de xuru aportó na so alianza con IX.

Lo cierto ye que lleendo los principios rectores de toles estayes polítiques y namái faciendo referencia a estos mesmos, y les sos propuestes elleutorales, esisten munches más inquietúes comunes que desalcuentros. Poro, ye factible, con voluntá real de tresformación, la creación d’un espaciu políticu qu’abrace a toa una sociedá asturiana que tuvo peleando por resistir a nun morrer. Seya no productivo, seya no cultural, o no netamente político. Y pesie a les polítiques constantes de desamntelamientu del too dafechu, siempres quedará un requexín de lluz del qu’abrir una bona resquiebra, que permita facer una Asturies que nun seya namái qu’un bon decoráu pa campañes publicitaries baleres; o un eslogan de grandonismu baratu independientemente de la fecha que se decida escoyer pa ello.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí