La Vega: utilidá pública frente a especulación

¿Sería descartable qu'una parte de los terrenes de La Vega tuvieren un usu residencial? Non necesariamente, pero con otres intensidaes y condiciones.

Recomendados

Javier Álvarez Villa
Javier Álvarez Villa
Funcionario del Cuerpo Superior de Administradores del Principado de Asturias. Miembro del Conceyu por Otra Función Pública n´Asturies.

20 de xineru de 2020, Comisión de Defensa del Congresu de los Diputaos. La ministra Margarita Robles comparez pa responder a dellos pidimientos d’información y entrugues de grupos parlamentarios, ente elles, les que-y formula’l diputáu de Foro Asturies Isidro Martínez Oblanca sobro’l protocolu d’intenciones que’l Ministeriu roblara col Conceyu d’Uviéu pa la cesión de los terrenes de l’antigua fábrica d’armes de La Vega, na que-y encamentaba a tomar en consideración criterios d’interés públicu percima de los puramente urbanísticos.

Na so respuesta, la Sra. Robles dixo qu’el so Ministeriu taba pendiente de que’l Conceyu d’Uviéu afitara la so posición definitiva tres el cambéu del gobiernu municipal. No que fai a ello, la ministra concretó cuál yera la política del Ministeriu de Defensa en relación colos bienes de dominiu públicu que yá nun taben n’usu, estremando ente aquellos casos nos qu’otres Alministraciones Públiques proponíen una finalidá o destín públicu pa ellos, nos que la cesión facíase per aciu d´una concesión alministrativa, poniendo como exemplu la fábrica d’armes d’A Coruña; de los que llamó “actuaciones urbanístiques”, nos qu’el Ministerio de Defensa esixía’l pagu del preciu de mercáu.

Adrián Barbón, Margarita Robles y Alfredo Canteli. Fuente: Gobierno de Asturias

Camentamos que lo que Margarita Robles quería esplicar, utilizando términos d’estricta técnica urbanística, ye que la solución qu’ufiertaba’l Ministeriu de Defensa pa la cesión de los bienes en desusu de la so propiedá dependía de qu’el so aprovechamientu fuera o non llucrativu. Si l’aprovechamientu del suelu nun yera llucrativu, esto ye, si la edificabilidá que’l planiamientu urbanísticu atribuyía-y destinábase a usos de titularidá pública, escluyíos del tráficu xurídicu priváu –  nel casu, de la fábrica d’armes d’A Coruña, un polu industrial y tecnolóxicu dedicáu a les tecnoloxíes de la información y de la comunicación (TIC), promovíu pola Universidá -, el Ministeriu de Defensa dexaba’l so usu a l’Alministración Pública promotora al traviés d’una concesión alministrativa.

Si, otra manera, pretendía dedicase a aprovechamientos llucrativos, esto ye, a aquellos que son susceptibles d’apropiación privada y, polo tanto, de xenerar plusvalíes a favor de particulares – la vivienda ye un exemplu característicu y nel Protocolu de La Vega prevense 100.000 m2 pa esti usu -, entós el Ministeriu esixía a cambéu’l pagu del preciu de mercáu.

“¿Por qué entós l’enfotu nos 100.000 m2 d’usu residencial? Vaigamos a los clásicos, cui prodest: ¿quién sal beneficiáu?”

La cuestión entós pasa por resolver quién decide y por qué motivos los usos de los terrenes de la fábrica de La Vega. Si cola normativa urbanística vixente na Comunidá Autónoma asturiana ye perfechamente posible dedicar esi suelu a equipamientos de titularidá pública non llucrativos, con usos estremaos y complementarios como son los educativos, culturales, sanitarios, asistenciales, alministrativos, d’ociu y otros análogos, colo que podía llograse la cesión por concesión alministrativa del Ministeriu de Defensa; ¿d’ónde naz l’interés pa construyir mil viviendes y a qué respuende?

De mano, ye’l Conceyu d’Uviéu’l que dispón de la potestá pa decidir sobro los usos de La Vega per aciu del planiamientu urbanísticu municipal, en cuantes que´l impulsu del plan y la so aprobación definitiva ye de la so estricta competencia. Pero’l Gobiernu de la Comunidá Autónoma nun ye un convidáu de piedra, como quier faer creer el presidente Barbón, cuándo afirma que la so posición va poder variar en función de quien mande nel Conceyu, nuna adaptación con menos gracia de la delirante frase de Groucho Marx: “Estos son los mios principios, si nun-y gusten, tengo otros”

La Vega. Semeya: David Aguilar Sánchez

Otra manera, la Comunidá Autónoma tien d’informar antes de l’aprobación definitiva’l plan xeneral que regule los usos de La Vega y el so informe va ser preceptivu y venceyante no que se refier a tutelar los intereses supramunicipales, ente los cualos, resulten especialmente relevantes los de la protección d’un perimportante patrimoniu históricu, artísticu y cultural, en riesgu de frayáse coles actuaciones previstes nel Protocolu.

¿Por qué entós l’enfotu nos 100.000 m2 d’usu residencial? Vaigamos a los clásicos, cui prodest: ¿quién sal beneficiáu?

De xuru, el Ministeriu de Defensa, como reconoz paladinamente nel Protocolu robláu: el so fin ye llograr los recursos precisos pa faer vidable’l desenvolvimientu de los Planes d’Inversión de les Fuerces Armaes.

Y, cola mesma claridá, los operadores inmobiliarios que van algamar los beneficios económicos nel procesu de producción de les mil viviendes y usos privaos complementarios,  col sofitu indispensable de les inversiones públiques nes dotaciones del ámbitu.

¿Sería descartable, sía que non, qu’una parte de los terrenes de La Vega tuvieren un usu residencial? Non necesariamente, pero con otres intensidaes y en condiciones bien distintes.

Nesti asuntu la ciudadanía d’Uviéu tien inda enforma que dicir.

Actualidad

DEJA UNA RESPUESTA

Por favor ingrese su comentario!
Por favor ingrese su nombre aquí