“Aína ye una reacción ante un sentimientu d’orfandá política”

Esteban González ye unu de los impulsores de Aína, el nuevu partíu soberanista d'esquierdes que'l domingu celebró'l so congresu fundacional.

Recomendados

Diego Díaz Alonso
Diego Díaz Alonso
Historiador y activista social. Escribió en La Nueva España, Les Noticies, Diagonal y Atlántica XXII. Colabora en El Salto y dirige Nortes.

Esteban González Corteguera (Piloña, 1984) ye unu de los impulsores de Aína, el nuevu partíu soberanista d’esquierdes que’l domingu celebró’l so congresu fundacional en Corvera. Médicu nel hospital de Jove, considera qu’agora la prioridá de la nueva organización nun son los pactos, sinón estructurarse y ameyorar n’implantación territorial

¿Con qué sensación sal del congresu fundacional d´Aína?

Con una impresión mui asemeyada a la de les asistentes al congresu, polo que pudi falar de mou más distendíu dempués del actu: ilusión y con sensación de tar abriendo un camín. El lema del congresu yera “Onde soi quien quiero ser”, y esti camín abiertu quier llevanos a esi llugar. Llegar hasta equí foi un camín llargu y de munches hores de trabayu, enllenu de pasinos pequeños ya intentando que toos ellos foren firmes. Siempre apaecen les duldes, pero’l resultáu pagó la pena.

¿Hai güecu electoral pal asturianismu políticu?

Siempre lo creyimos, nun díbemos ponenos a esto si nun lo creyéremos. De fechu hai muncha xente de vocación asturianista verdadera trabayando n’otres formaciones. Aína ye una reacción ante un sentimientu d’orfandá política, de nun tener un referente que representara de forma inequívoca la nuestra idea de progresu y de futuru p’Asturies. Dicho esto, el trabayu que nos espera ye descomanáu pa llegar a la población xeneral col nuestru mensaxe y demostrar que somos persones series, colos pies bien asentaos en suelu de la problemática del país asturianu, y que venimos pa contribuyir a que la vida seya meyor pa les asturianes y p’acabar cola sensación tan recurrente de qu’Asturies nunca llega a ser.

¿Cúales son les prioridades extratéxiques de la nueva organización?

D’esti Congresu Fundacional acaba de surdir una primer Mesa Nacional Provisional que tien por llabor rexistranos como partíu políticu, afitar l’afiliación, dir creando la estructura orgánica y territorial d’Aína y conducir el proyectu, nun plazu máximu de 90 díes, a la Asamblea Nacional na que se debatirán muches otres cuestiones. Tenemos que siguir medrando y enraigonándonos per tol país hasta que la xente de Piloña, por dicir un conceyu, sienta que namás ellos, cola cabeza y el corazón centraos namás na so tierra, puen ser los máximos responsables del so propiu futuru. Lo demás, les cuestiones electorales, por exemplu, dirán analizándose y viéndose dependiendo de los pasos qu’acertemos a dar y la validación que dea la sociedá a esos pasos.

¿Qué errores d´anteriores proyeutos políticos nun quieren repetir?

Escapamos de la priesa de metese yá a la rueda eleutoral con namás un convencimientu y cuatro eslóganes. Cuidamos que lo de verdá importante ye conocer íntimamente la tierra, les sos problemátiques, y que les asturianes nos conozan y consideren que tenemos dalgo qu’aportar, que somos parte de la solución.

“Nun pensamos en camudar les coses con idees pero ensin implantación nel territoriu”

Nun pensamos en camudar les coses con idees pero ensin implantación nel territoriu. Lo que de verdá queremos ye implantar un cambéu cultural, el de la manera d’averase a los problemes d’esti país. Pa ello tenemos que dar forma a una rede de complicidaes con toa mena d’asociaciones y organizaciones civiles de manera que rezumen esa visión nueva nel so aicionar cotidianu. Porque lo que nun queremos ye ser una llista eleutoral a la que votar una vez cada cuatro años. Tenemos vocación integradora d’otres sensibilidaes y proyeutos afines, nun somos dogmáticos. Pero nun abandonamos nin vendemos l’ideariu políticu que nos traxo hasta equí y que mereció la confianza de la xente.

¿Qué posición va tener Aína con Sumar y los proyeutos de confluencia de les izquierdes?

Los tiempos nun coinciden pa otros y pa nosotros. Tampoco les prioridaes. Anguaño, Aína ye una Mesa Nacional Provisional y un grupu, curiosu a too esto, d’inscritos. La Mesa Nacional Provisional va tener unos tres meses frenéticos, llocos d’actividá, pa rexistranos como partíu políticu, iniciar los procesos d’afiliación de los inscritos y de los que quieran sumase al proyectu, y danos toles estructures estatutaries y orgániques necesaries. Tamién va organizamos territorialmente, abrinos a tola sociedá asturiana y ellaborar propuestes concretes y exhaustives. Podemos tener más o menos afinidaes con delles organizaciones polítiques. Pero primero tenemos que tener mui claro y definío, pa nosotros y pal conxuntu la sociedá, cuál ye’l nuestru programa, les nuestres prioridaes, el nuestru camín más inmediatu. En resume: tamos en casa afatándomos; cuando lleguemos a la pista de baille que nos presta, pensaremos en compañeres de danza o en baillar a lo suelto.

¿Sedrá la próxima llexislaura la de la oficialidá?

La oficialidá sedrá porque’l pueblu asturianu ta cada vez más convencíu de la so importancia. Les razones polítiques poles que, teniendo a una mayoría favoratible, nun s’acometió dan pa díes y díes d’alderique. Pero por resumir, ¿pue llegar la cooficialidá la próxima llexislatura? Ye fácil que sí. Pero si nun llega esta, va llegar la siguiente, de xuru. Y dende Aína aportaremos lo máximo que podamos, ensin esceiciones.

¿Qué tendría que tener la reforma del estatutu amás de la oficialidá?

Nun sé si date una respuesta cenciella o pidite que me tengas paciencia mientres escribo un llibru sobre les coses que tien que tener y nun tien l’Estatutu. Somos una autonomía con un estatutu de quinta división que por nun tener nun tien nin la capacidá pa convocar eleiciones cuando lo necesite’l país. Al Estatutu d’Autonomía d’Asturies falta-y cuasi too pa poder facer polítiques de verdá en vez de poner los parches que nos dexen poner dende Madrid. Con esti Estatutu, el presidente d’Asturies nun ye un políticu, ye un xestor de fondos d’esta sucursal del Estáu.

Esteban González. Semeya: David Aguilar Sánchez

Nuna primer reforma tien que salir la oficialidá de les dos llingües tradicionales d’Asturies y, quiciás, dalgún tema electoral como les circunscripciones o la capacidá de convocar eleiciones llibremente si asina lo consideren les fuercies polítiques que participen na negociación. Depués tien de siguir un análisis de les necesidaes y de los recursos que se necesiten pa satisfaceles hasta dir algamando competencies y aperios que nos permitan pensar, decidir y incidir nel nuestru propiu futuru.

¿Ú va´l futuru económicu de l´Asturies del sieglu XXI?

Pela diversificación. Yá sufrimos en pelleyu propiu les consecuencies de los monocultivos. Les élites agora tán afalando otru monocultivu p’Asturies: el del turismu. El turismu tien un techu n’Asturies y los trabayos son precarios y los sueldos malos, amás de ser una actividá estacional. Asturies tien munchos recursos descuidaos unes veces, ignoraos otres o inclusive despreciaos. Descuídase un capital humanu altamente preparáu; ignórense recursos propios como la composición, característiques y posibilidaes de la nuestra descomanada masa forestal, por dicir; despréciase la enorme riqueza y posibilidaes de la nuestra cultura y les nuestres llingües cola que construyir una industria cultural potente nesti sieglu de la era de la información. Tamién s’escaez y/o desprecia’l llabor que tien que tener la Universidá asturiana, como másima casa de conocimientu sobre tolo qu’integra esti país. Hai munches actividaes y munches formes d’averase a elles, siempres dende la preservación del entornu y la capacidá pa decidir por nosotros mesmos el qué, el cómo y l’hacia ónde.

Actualidad

2 COMENTARIOS

  1. SUERTE rapazos:
    Agora fai falta que, de verdá, pongáis delantre les necesidaes del país de les necesidaes de la isquierda internacionalista.
    Nun ahí qu’escaecer a los palestinos,non, pero nun podemos dexar de mirar primero polos nuesos hermanos de Ribeseya o la Puela.

    Si ye más importante la coleutivización de la tierra que xenerar riqueza sostenible pa toes y toos, aína va a ser otru alón políticu…aína.

DEJA UNA RESPUESTA

Por favor ingrese su comentario!
Por favor ingrese su nombre aquí