N’agostu de 1917 una fuelga xeneral revolucionaria facía cimblar l’edificiu podre de la I Restauración n’España entera. Sicasí, el réxime foi quien a arreblagar pel desafíu del movimientu obreru con una represión feroz, que n‘Asturies foi especialmente curiosa al ser esti ún de los focos principales de la fuelga tanto pola duración (una selmana) como pol nivel de siguimientu de la mesma.
Ente los fugaos de la represión gubernamental taba un cabezaleru socialista de 29 años, Ramón González Peña, que garraría munchu más protagonismu nel movimientu obreru asturianu y español nes décades posteriores. Escapáu pelos montes de Piloña, y afamiáu depués de díis comiendo lo mínimo, acabó averándose a un pueblu de la parroquia de Sebares (Piloña) debatiéndose ente la necesidá de percanciar alimentu y el mieu a que lu denunciaren a la guardia civil. Quixo la suerte que’l primer campesín que topó fuera un vieyu que taba lleendo un llibru de Pi y Margall, cosa que sirvió pa entamar la conversación. Llegó un momentu en que González Peña acabó preguntándo-y al paisanu si yera republicanu, a lo qu’él contestó: “Yo soi de Pi”, indicando asina non solo’l so republicanismu federalista, sinon la so devoción pol dirixente políticu y pensador español del sieglu XIX que más respetu y almiración xeneró en propios y estraños.
Cuento too esto como antoxana a estes lletres sobre Eladio Carreño como forma de desplicar el títulu del artículu: Eladio Carreño Valdés, mélicu, periodista y políticu republicanu, nun yera solo eses coses, yera tamién l’home de Pi y Margall n’Asturies, el propagandista de les idees del Apóstol, que yera como llamaben al expresidente de la I República los sos partidarios, y el brazu executor de la so estratexa política de reconstrucción del partíu republicanu federal na llarga nueche pa la democracia que foi la Restauración. Pi y Margall ye anguaño tan desconocíu como conocíu y respetáu yera anantes de la Guerra Civil, anque podemos dicir que d’unos años p’acá hubo un ciertu intentu de rescatar la so obra y les sos idees, tanto por pura xusticia historiográfica como por posibilidá d’orientación política nel siempre esbariosu debate sobre la hipotética organización federal o federalizante del Reinu d’España. En tou casu, si pa Pi sí hai un ciertu intentu de rehabilitación doctrinal y política, Eladio Carreño sigue siendo un gran desconocíu non solo pal gran públicu asturianu, sinon tamién pa los sectores más politizaos, incluyendo los que teoricamente-y seríen más cercanos ideolóxicamente. Estes lletres son un intentu de dar a conocer la so figura y obra.
Eladio Carreño Valdés nació n’Avilés un 17 de febreru de 1834, siendo’l décimosegundu de los trece fíos d’una familia de la pequena burguesía del país. Siendo poco más qu’un rapacín emigró a Cuba, onde yá vivía ún de los sos hermanos y estudió Melecina y Ciruxía na Universidá de La Habana, exerciendo ellí la so carrera y trabayando tamién de profesor suplente na facultá. Casáu en 1864 con Nieves del Pozo, al otru añu yá ta de vuelta n’Asturies, concretamente en Xixón, onde empieza militar nos círculos democráticos, ca vez más revueltos énte la escayencia de la monarquía de Sabel II. Yá en 1865 ye coautor d’una obra satírica estrenada nel teatru Dindurra onde apaecen dos pollinos coronaos, xenerando gran escándalu ente los sectores conservadores de la ciudá. Participa activamente na insurrección cívico-militar de setiembre de 1868 qu’echa del tronu a los Borbones y en xineru de 1869 funda’l so primer periódicu, el selmanariu La República Española. Cuando’l Partíu Democráticu se tresforme nel Partíu Democráticu Republicanu Federal, Carreño yá va tar ehí, participando dende’l primer momentu de la corriente qu’encabeza Pi y Margall, autodefinida como socialista y qu’exerce de tapón ente los benévolos y los intransixentes. Anque se negó ser candidatu a diputáu nes primeres eleiciones del sexeniu democráticu, cuando llegue en 1873 la República como resultáu de l’abdicación d’Amadeo I Eladio Carreño acabará siendo alcalde de Xixón y diputáu provincial.
“Participa activamente na insurrección cívico-militar de setiembre de 1868 qu’echa del tronu a los Borbones y en xineru de 1869 funda’l so primer periódicu”
La restauración borbónica de 1874, que supon la marxinación política y electoral de los republicanos hasta que’l nuevu réxime tea bien afitáu, nun paralelismu evidente col procesu de transición un sieglu depués, fai que bona parte d’aquellos revolucionarios del 68 deserten del campu democráticu hacia les agües tranquiles del lliberalismu turnista. Los propios republicanos acaben dando llugar a dellos partíos, casi toos encabezaos por un expresidente del sexeniu. El Partíu Republicanu Democráticu Federal resurde en 1882, cuando se permite la so llegalización, y Carreño va tar al frente d’él n’Asturies hasta la so muerte. Previamente a eso vémoslu unos años anantes intentando una fórmula llegal pa poder presentase a la llucha política, la Unión Democrática, y fundando dellos periódicos, que combina col exerciciu de la melecina al serviciu de les clases populares: en 1877 ye El Productor Asturiano, como más p’alantre será La Región Asturiana, El Fuete (nome que se-y da en Cuba a una especie de cibiella) y el Boletín Federal.
En 1881 conviértese, con otros republicanos nomaos d’estracción burguesa, en fundador del Atenéu Obreru de Xixón. Eladio Carreño ye l’alma mater del proyectu, formando la comisión promotora qu’algama los recursos abondos pa ponela en marcha. Cuando l’atenéu yá ye una rialidá, Carreño y la xunda directiva provisional dimite y encamienta a los socios a que, d’ehí en delantre, conste nos estatutos que la directiva del Atenéu ha de tar siempre en manes de trabayadores manuales, como forma de safase d’una tutela burguesa que se ve innecesaria y inaceptable. Por raro que paezca, el primer movimientu obreru organizáu n’Asturies nun va ser anarquista nin socialista, sinon republicanu federal.
La formación del Atenéu xixonés dase nun contestu políticu mui enrarecíu por un debate políticu que marca al conceyu per dellos años: l’ampliación del puertu de la ciudá, que quedara pequenu y que taba onde ta agora’l puertu deportivu, y que tien dos posibles alternatives. Un sector de la burguesía local defende l’ampliación del puertu yá existente. Son los apagadoristes. Otru, facer unu nuevu na zona d’El Musel. Son los muselistes. Como la mayor parte del republicanismu local apostó pol apagadorismu, atendiendo a los intereses inmobiliarios de los propietarios de la zona, y Carreño apostó pola obra nueva d’El Musel, coincidiendo nesi plantegamientu con Alejandro Pidal, el gran cacique conservador d’Asturies, va recibir per años l’acusación de ser una marioneta del caciquismu, un falsu republicanu, un carlista antroxáu y una recatafila más d’axetivos colos que los republianos locales van tar años dándose unos a otros hasta qu’El Musel foi una rialidá incontestable.
En 1883 el PRDF, pa escenificar el so proyectu federalista, encamienta a les distintes secciones del partíu a que fagan proyectos de constitución pa los futuros estaos de la federación, como forma d’escenificar el pautu federal que lleve a la nueva república y a una nueva constitución. Resultáu d’esi trabayu colectivu, pero dirixíu por Eladio Carreño, a quien toos reconocieron la so condición de padre del mesmu, ye’l proyectu de Constitución Federal del Estáu Asturianu, ún de los primeros que la campaña. Esi proyectu de constitución podemos suponer que tea basáu nun anterior del propiu Carreño de 1873, del que desconocemos el conteníu y del que namás sabemos que lu hubo porque se cita nos obituarios que-y fixeron cuando morrió. Pero’l de 1883 sí lu tenemos, y lo que vemos ehí ye un modelu de federación a mitá de camín ente’l suizu y el norteamericanu, dándo-y al estáu asturianu plena soberanía en materia de fiscalidá y de xusticia, ente otres coses. Carreño nun va ellaborar una obra teórica propia, igual que casi tolos dirixentes de les esquierdes asturianes del últimu sieglu y mediu. Él yera, más qu’un pensador, un propagandista. Él nun ellaboraba teoría, aplicaba les de Pi y Margall. Nun diseñaba estratexa, desendolaba les del partíu. Yera, polo tanto, un discípulu del apóstol. Yera l’home de Pi n’Asturies.
Los años finales de Carreño serán los del reconocimientu xeneral de la masa republicana, que diba masivamente a velu nos mítines de los Campos Elíseos de Xixón, pero los d’una gran penuria física y económica, teniendo que lu mantener compañeros de partíu meyor asitiaos económicamente, como Felipe Valdés. Yá en 1897-98, cuando entame una nueva campaña autonomista cola publicación de les bases pa una Constitución asturiana, el nome de Carreño va tar en boca de los sos promotores como una referencia ineludible del federalismu asturianu. Él yá nun va tar nesa campaña, tando yá mui fastidiáu de salú, pero mandará mensaxes de saludu a los mítines autonomistes. Muerre n’agostu de 1901, unos meses anantes de Pi y Margall, y el so intierru foi una demostración masiva d’afectu de les clases populares, que vieron n’él al mélicu de los probes, al organizador de los trabayadores y al propagandista de la llibre federación. La polémica dirá con él hasta’l cimenteriu, al sentise voces de protesta por face-y un intierru católicu al mayor enemigu de la reacción n’Asturies.
Güei namás lu recuerda una cai na so ciudá adoptiva de Xixón. Nada n’Avilés, el so conceyu natal, o nel restu d’Asturies. Igual agora, nesti 150 aniversariu de la I República, nun taba de más recordar que la Memoria Democrática nun ye solo la del sieglu XX. Vagar yá vagaba.
