El “Muselón” o la metástasis d’un réxime

Na ampliación hebio un sobrocostu de 250 millones €, que, de forma fraudulenta, quinxeron financiase colos fondos europeos.

Recomendados

Mariano Suárez
Mariano Suárez
Mayestru de Llingua Asturiana demientres 12 años, incluyendo los Centros-Pilotu pal enseñu l’asturianu (1984-1990). Espertu Universitariu en Filoloxía Asturiana, pola Universidá d’Uviéu. Ex cordinaor de la Secretaría de Llingua y Cultura de SUATEA, miembru del Secretariáu d’Asturies de SUATEA y miembru del Secretariáu Confederal de la Confederación STEs. Miembru de la Xunta Executiva d’Andecha Astur.

Asturies, y con ella toles compañeres d’Andecha Astur, tienen estos díes la satisfación del trabayu bien fechu y el deber cumplíu, viendo cómu l’Audiencia Nacional española xulga un casu especial: el de los 21 acusaos de participar nel fraude cometíu nes obres d’ampliación del puertu d’El Musel, en Xixón. Poques vegaes se puen defender los intereses d’Asturies y la so clas trabayaora sentando nel banquillu a los responsables del mayor fraude cometíu pol PSOE n’Asturies, 250 millones €.

Ye’l xuiciu a un réxime, el que llantó la hermandá FSA-PSOE-SOMA-UGT n’Asturies demientres les caberes décades. Ye, sobro too, un xuiciu al réxime d’Álvarez Areces, heredáu por Adrián Barbón. Ye la evidencia de cómu les redes clientelares coles que’l PSOE controla Asturies se financien vampirizando presupuestos públicos. Nun ye casualidá que la gobernanza del PSOE n’Asturies yá fore calificá pol Tribunal Supremu de corrución sistémica. Poro, el casu d’El Muselón evidencia la metástasis d’un réxime.

El proyeutu d’ampliación d’El Musel foi ún de los proyeutos faraónicos del megalomaníacu Areces (La Llaboral, Niemeyer, Calatrava…). Inecesariu, porque’l tráficu portuariu nun xustificaba un superpuertu. Inasumible medioambientalmente, porque trayía apareyaes otres consecuencies desastroses pa la ciudá (regasificaora, desmonte l’Altu Aboñu, la Zalia…). Pero’l réxime necesitaba facer obres grandones nes que se marafundiaben y “perdíen” millones d’euros públicos; porque l’entramáu de redes clientelares coles que’l PSOE controla Asturies ye costosu y les perres pa financialo hai que sacales de dalgún llau.

Na ampliación d’El Musel hebio un sobrocostu de 250 millones €, que, de forma fraudulenta, quinxeron financiase colos fondos europeos que permitieron la obra, ocultando a la Xunión Europea la condición de sobrocostu d’esa cantidá. Compañeres d’Andecha Astur recibieron avisos y menacies del réxime pola so intención de llevar el casu a tribunales. Foi inútil, porque si dalgo tien demostrao Andecha Astur ye que’l nuesu enfotu’n defender los intereses d’Asturies y la so clas trabayaora tórgamos ser cómplices de la casta, del réxime. Poro, en 2009 denunciemos el fraude énte la Oficina Europea de Llucha Escontra’l Fraude (OLAF), al traviés del eurodiputáu Mikel Irujo, de la coallición Europa de los Pueblos, de la que formábamos parte.

Gracies al compromisu firme d’aquelles compañeres d’Andecha Astur conocióse, en 2014, l’informe de la OLAF, una confirmación oficial y contundente de fasta qué puntu’l réxime d’Areces y el PSOE n’Asturies taba sofitáu na corrución a gran escala.

L’informe falaba de fraude y citaba, ente otres irregularidaes, un sobrocostu de 250 millones € xeneráu pola Autoridá Portuaria y les empreses, debíu al medru non autorizáu de beneficios empresariales y gastos xenerales; amás de toa clas de torgues pa que la OLAF acediere a rexistros cuntables y documentación fiscal. L’informe desixía tornar a Bruseles 198 millones € d’aídes abonaes, al tiempu que paralizaba’l pagu de 49’5 millones € pendientes. Y afitaba qu’estos fechos podríen ser delitu acordies col Códigu Penal español.

“Güei, gracies a la denuncia d’Andecha Astur, xúlgase a 21 reponsables políticos y empresariales por supuestos delitos de fraude y prevaricación”

Güei, gracies a la denuncia d’Andecha Astur, xúlgase a 21 reponsables políticos y empresariales por supuestos delitos de fraude y prevaricación. Al nuesu paicer, la FSA-PSOE ye xestora y responsable política del fraude.Y el principal texeor de la trama ye l’ausente Álvarez Areces, comu responsable que foi del Gobiernu y cacique qu’exercía na Autoridá Portuaria de Xixón.

Ello nun pue estrañar. Yá’l Tribunal de Cuentes, fiscalizando los fondos mineros, señaló la falta control nos años 2006-2017, denunciando que 1.786 millones € tuvieron destín opacu ya irregular. Afitó, amás, que bona parte los fondos desapaeció ensin llegar a executase les midíes a les que se dedicaben. Un Istitutu de Reestructuración de la Minería del Carbón y Desenrollu Alternativu de les Comarques Mineres, encargáu de xestionar los fondos mineros, que nun tenía los recursos téunicos y homanos necesarios pa la so fonción. Falta d’execución del 47% de les aídes ente 1998-2005, nengún plan mineru firmáu ente 2013-2018, descontrol, discrecionalidá, irregularidaes, incumplimientu requisitos y condiciones, falta siguimientu… son dalgunos de los términos recoyíos naquel informe.

La Sindicatura Cuentes d’Asturies, nel so informe sobro 2018, atopó prebes de que’l Gobiernu d’Adrián Barbón cometía toa clas d’irregularidaes y fasta posibles delitos de xestión: boicotéu del llabor de la Sindicatura, falta de contabilidá correcha, doble contabilidá nos fondos mineros, espedientes de créitu ensin valor llegal, ocultación de contratos menores, incumplimientu nel siguimientu los contratos, etc.

Puerto del Musel FOTO: Iván G. Fernández

Y en 2019 el Tribunal Supremu dianosticó lo que pasa n’Asturies na sentencia del casu Riopedre-PSOE, prebando que nos años del presidente Areces “quedó sostancialmente corrompíu’l procedimientu d’axudicación de contratos de suministru y d’obres en varies Conseyeríes”. Afitó “que se llantó de facto un sistema d’axudicación de los contratos conveníos cola Alministración qu’afeutaba a tol sistema de la Comunidá Autónoma y non sólo al padremuñu d’ésta”, pola comisión de delitos de cohechu, malversación, prevaricación y falsedá; polo que, en términos políticos, puen definise aquellos años de mala gobernanza comu de corrución sistémica.

El casu d’El Musel nun ye una situación nuea, nin desconocía. Poro, abulta normal que les istituciones xudiciales y de fiscalización españoles señalaren la situación de corrución sistémica del réxime politicu que representa’l “Principado”.

Asturies sufre un réxime afeutáu pola metástasis de la corrución. Poro, Andecha Astur comprométese a trabayar con aquella parte la sociedá asturiana, mayoritario, que considera urxente tomar midíes esceicionales p’atayar esta degradación política, ética y económica. Nesi camín tuvimos y taremos siempres.

Actualidad

1 COMENTARIO