Xaime Martínez nuevu coordinador de conteníos n’asturianu de NORTES

NORTES refuerza’l so apueste pola llingua asturiana cola incorporación al so equipu de Xaime Martínez. Martínez (Uviéu, 1993), nuevu coordinador de conteníos n’asturianu del dixital, ye escritor, filólogu y músicu de pop. Tien escrito llibros mesmo en castellanu que n’asturiano, como’l poemariu Cuerpos perdidos en las morgues (Ultramarinos, 2018), col que ganó’l Premio Nacional de Poesía Joven «Miguel Hernández», o la novela La fuercia o les 4 epifaníes de Martín Feito (Hoja de Lata, 2021). Amás, publicó dos discos xunta’l grupu La Bande y Ósculos d’agua nel Imperiu Asturianu (Araz, 2018), un llibru-discu en solitariu. Foi cofundador de la revista de lliteratura moza Oculta Lit y tien collaborao con medios como CTXT, PlayGround, Rolling Stone o La Nueva España.

Aumentar la presencia del asturianu en NORTES y “enanchar el mundu de la cultura n’asturianu pente medies de conteníos d’actualidá, pero tamién históricos, sociolóxicos o lliterarios, que collaboren cola autonomía del pensamientu asturianu” son les prioridaes de Martínez, que se va encargar mesmo de la producción de conteníos d’actualidá, entrevistes y reportaxes, que de coordinar les collaboraciones n’asturianu d’otros autores y autoras.