Aína dio a conocer el pasáu vienres, coincidiendo col entamu de la campaña eleutoral, l’avance del so primer programa políticu. La formación asturianista y d’izquierdes decidiera nuna Asamblea Nacional celebrada en febreru nun se presentar a les eleiciones del próximu 28M.
El partíu asoleyó un documentu de 30 llinies programátiques desenvueltes al rodiu de les seis Estayes de Trabayu que vertebren el llabor del partíu: Recuperación económica y demográfica, Territoriu y ruralidá, Xusticia social y servicios públicos, Feminismu y derechos sociales, Identidá y desarrollu cultural y Cercanía democrática y soberaníes.
Aína da un pasu más na definición del so proyeutu políticu, “basáu na xusticia social, la igualdá y el potenciamientu de les soberaníes como vía pa construyir un futuru dignu pensáu dende Asturies y p’Asturies”. Con too, el documentu programáticu qu’agora se presenta constitúi “namás una propuesta d’orientación política, na que la formación quier siguir afondando en comuña col texíu social asturianu col envís de poder ufrir na viniente cita eleutoral una alternativa madurada, tresformadora ya ilusionante”. Nesti sen, l’eslogan emplegáu pol partíu pa esta campaña ye toa una declaración de les sos intenciones “Esta ye la última vez que nun nos presentamos a unes eleiciones”.
El partíu prepárase pal so primer mitín
Xunto cola publicación del programa, Aína dio anuncia de la celebración del so primer mitín. Va a ser el próximu domingu día 21 na uvieína Sala Gong, asitiada na cai Julián Cañedo, a les 12:30 hores del meudía. Nesti actu, el partiu va aprovechar pa presentar el documentu políticu énte la so militancia, simpatizantes y públicu en xeneral que quiera averase.
