Jorge Pueyo (Fonz, Uesca, 1995) foi ratificáu, el martes 13 de xunu, pol Consello Nazional de Chunta Aragonesista (CHA) con un 90% de los votos pa ser el cabezaleru de Sumar pa les elecciones xenerales del 23 de xunetu por Zaragoza.
Esti abogáu de 28 años lleva munchu tiempu venceyáu al asociacionismu, a los movimientos de reivindicación llingüística d’Aragón y a la Chunta Aragonesista, pero ye conocíu sobre manera por ser el presentador del late-night n’aragonés A escampar la boira, que s’emite na televisión autonómica Aragón TV y que fai un llabor notable de divulgación de les llingües propies de la comunidá —el programa permitió, por exemplu, sentir a la periodista Thais Villas falando na variedá del catalán que se parlla na so llocalidá natal, Fraga (Uesca)—.
Jorge Pueyo, que tien collaborao en programes de la televisión aragonesa como Charrín charrán y que tamién ye escritor, foi’l creador d’unos telediarios breves n’aragonés que, de magar 2021, xubía a les redes sociales. El candidatu, según declaró nuna entrevista concedida ayeri a El Periódico de Aragón, nun s’agota nel so aragonesismu, sinón que defende una política ecoloxista, progresista y feminista, y amosó esmolecimientu pola situación paralela de desigualdá llegal del asturianu y l’aragonés.
A la entruga del periodista pola intención del partíu Vox de suprimir l’Academia d’a Luenga Aragonesa, Jorge Pueyo afirmaba que va lluchar «en el Congreso desde el primer momento contra el trasvase y contra ese asimilacionismo cultural que nos quieren imponer». El candidatu reconocía que «las competencias en educación dependen de la comunidad autónoma, así que lo que podemos hacer en Madrid es posicionarnos a favor de la cooficialidad de las lenguas del estado, como el asturiano o el aragonés. O garantizar el cumplimiento de la Carta Europea de los Derechos Humanos, donde se incluye la protección de todas las lenguas».
