El partíu soberanista asturianu alcordó ayeri, na so Asamblea Nacional Estraordinaria, nun presentase a les elecciones del 23 de xunetu. De la mesma manera qu’Aína refugó ser una opción nos pasaos comicios autonómicos y llocales del 28 de mayu pa preparar meyor la so estratexa política y afitar más les redes de trabayu nos conceyos, agora la so Asamblea votó por unanimidá nun presentase a les elecciones estatales.
Pela cueta, Aína sí aprobó delles acciones no que fai a los comicios del 23 de xunetu, según tresmite nun comunicáu, como «llamar a la participación política de la sociedá pa defender los derechos d’Asturies y de les clases populares» pente medies de la votación pero tamién de la movilización; «marcar una postura colectiva de qué puntos básicos tendríen que defender les y los cargos electos que vaigan a representar a Asturies nel Congresu y nel Senáu»; siguir construyendo una propuesta política pa les elecciones de 2027 a partir de los 30 puntos alcordaos del so programa políticu; o organizar un actu públicu pal 8 de setiembre.
