Nel plenu que se celebró güei nel conceyu de Xixón, los grupos PSOE, Foro Asturias, PP, IU-Convocatoria por Asturies y Podemos —esto ye, toos menos VOX— aprobaron la moción presentada dende la iniciativa «Música n’asturianu SÍ».
Esta moción presentóla l’agrupación de músicos, empreses y asociaciones venceyaes a la música asturiana. Foi la respuesta del sector a les declaraciones de Sara Álvarez-Rouco, conceyala de festexos de VOX, que dixo hai unes selmanes que tenía la intención de torgar les actuaciones musicales n’asturianu.
Nuna nota de prensa difundida pola iniciativa «Música n’asturianu SÍ», esta agrupación allégrase de que «la proyección artística y la promoción del asturianu seyan un puntu d’alcuentru y consensu de la gran mayoría de la corporación municipal», yá qu’esti consensu reflexa a una «sociedá xixonesa y asturiana que ve con arguyu y normalidá la so llingua asturiana, frente aquellos qu’inventaron un conflictu y quieren dividir a la sociedá creando problemes onde nun los había».
Nel plenu del conceyu de Xixón que tuvo llugar güei y onde se presentó la moción, intervieno en nome de la iniciativa la cantante y contrabaxista Mapi Quintana. Esta intervención foi posible gracies a l’Asociación Grana n’Alcordanza de Yolanda Huergo —una de les entidaes qu’apoyó la iniciativa «Música n’asturianu SÍ» xunta la Caxa Músicxs, la Sociedad Cultural Gijonesa, l’Atenéu Obreru de Xixón y la Sociedad Cultural Gesto—.
Nel so discursu, Mapi Quintana, que fai parte de la banda de Rodrigo Cuevas y ta acabante de llanzar dos discos nuevos, foi quien a esfacer «los argumentos contrarios a la llibertá d’espresión y a la llingua asturiana y destacó la importancia d’apoyar más la cultura asturiana pol valor social, cultural y económicu que xenera».
Cola aprobación d’esta moción nun se desautoricen namás les idees de VOX, sinón que, acordies colos promotores de la iniciativa, algámase «l’efectu contrariu» al que buscaba’l partíu d’ultraderecha, «porque’l testu aprobáu implica un compromisu en programar en Xixón más actividaes de cultura n’asturianu».
