L’escritor Antón García (Tuña, 1960) va volver a ser el responsable de les polítiques llingüístiques del Gobiernu autonómicu d’Adrián Barbón na llexislatura que da comienzu. Asina, les iniciatives qu’entamaron na pasada llexislatura dientro de la Conseyería de Cultura, Política Llingüística y turismu de Berta Piñán van tener continuidá agora na Viceconseyería de Cultura, Política Llingüística y Deportes que dirixe la tamién escritora Vanessa Gutiérrez y que depende directamente de Presidencia.
Sicasí, nesti nuevu periodu amiéstense a les funciones del director xeneral les d’acción cultural. Ello empata con dellos de los proyectos de Política Llingüística na anterior llexislatura, como «Asturies, cultura en rede». Esta iniciativa foi’l frutu del trabayu a comuña ente la Dirección Xeneral y RECREA (la sociedá pública de xestión y promoción turística y cultural) y dio llugar a una rede d’espectáculos y talleres artísticos que se programaron n’estremaos conceyos d’Asturies.
Amás, otros de los proyectos más visibles de la Dirección Xeneral foron Falamos, un programa d’enseñanza non reglada de les llingües asturiana y gallego-asturiana pa persones adultes desenvueltu pola Federación Asturiana de Conceyos; los convenios con instituciones estremaes, como l’Institutu Cervantes, pa la promoción esterior del asturianu; o’l festival de cultura n’asturianu Reguerada Fest.
Antón García ye una de les voces más destacaes de la segunda xeneración del Surdimientu asturianu gracies a noveles como El viaxe, poemarios como Estoriu y ensayos lliterarios como De cachu en criba, y el so llabor como editor foi indispensable pal desendolcu de la lliteratura asturiana, que nun puede entendese ensin editoriales como Tsibros del Frou, Trabe o Saltadera.
