El sábadu 23 de setiembre, la villa de L’Infiestu va recibir a seis grupos de tol estáu, que recuperen y interpreten música tradicional, pal Primer Alcuentru de Folclor de L’Infiestu. Esti eventu, organizáu por La Benéfica, entama de magar les 12:30 hores y los seis grupos, que vienen de Zamora, Cáceres, Málaga o Albacete, van actuar en llugares estremaos de la villa.
L’alcuentru nun busca recrear n’escenarios o pente medies de traxes del país la música tradicional, sinón empatar con una manera popular de vivila: asina, la música va poder sentise nes cais, nes places y nos chigres de la capital piloñesa, pa que caún pueda compartir el mou en que s’entiende la música tradicional ne so territoriu.
Los grupos participantes son La Ronda de Motilleja (Motilleja, Albacete); la Panda de Verdiales “Santón Pitar” (Málaga); Los Peropaleros (Villanueva de la Vera, Cáceres); Asociación Etnográfica Bajo Duero (Zamora); Ringorrango (Zamora); y el grupo Xeitu (Asturies).
L’alcuentru va tener llugar de magar les 12:30 y hasta les 14:30 pela mañana, y de tarde, dende les 20:00 hasta’l cierre. La entrada ye llibre.
