La nueche del vienres en Santolaya de Cabranes foi pal baille y la música tradicional. El Trasiegu Fest entamó xunto col grupu folklóricu Trebeyu una nueche «en mayanza» onde dalgunos de los sones y bailes del repertoriu tradicional asturianu tuvieron presentes.
Esta iniciativa axuntó, d’esti mou, les populares nueches en danza, onde se fai por vivir el baille tradicional asturianu d’una manera non folclorizante, cola vindicación de la cultura sidrera que propón esti festival entamáu na Comarca de la Sidra, y que nesti casu tuvo protagonizáu por Trebeyu.
D’esta manera, alredor de 200 persones axuntáronse na plaza del conceyu cabraniegu nuna xornada nocherniega que significó l’empiezu de dos díes de música asturiana alredor de la cultura sidrera asturiana contemporánea y qu’atraxo a xente de tolos puntos d’Asturies ya inclusive de fuera de les llendes asturianes.
El sábadu foi’l turnu de la nueche musical de magar les 18:30 hores colos grupos Luis Núñez y los Folganzanes, Algaire, La Tarrancha y Llevólu’l Sumiciu, que punxeron el ramu a la estancia del Trasiegu Fest en Cabranes y que conformen cuasi una antoloxía de los estilos musicales con más puxu na escena asturiana, dende la electrónica contemporánea del dúu de productores y DJs Llevólu’l Sumiciu al ska de La Tarrancha, pasando pel pop n’asturianu de Luis Núñez y los Folganzanes y el folk anováu d’Algaire, el grupu ganador del premiu Loïc Raison de música celta nel festival de Lorient nel branu de 2022.
Estes nun foron, sicasí, les úniques actividaes del día: hebo tamién una «performance sidrera» y teatru de cai, y el grupu musical Los Gascones amenizó bona parte de la xornada. Un mercáu artesanu y gastrónomicu foi otra de les propuestes más reseñables de les qu’entamó’l festival de nueva creación al rodiu de la cultura sidrera asturiana.
El domingu, el Trasiegu Fest treslladóse al últimu de los conceyos que visita, Bimenes, onde Mestura y David Varela punxeron música pa la reciella y, onde tuvo llugar un pieslle nel que los asistentes pudieron asistir a un taller de cocina sidreru, asina como a una tastia de sidres de gala.
