Hai un dogma -ún de los pocos que son buenos- n’Asturies: ante la dulda, no que a la Medievalidá toca, Josefa Sanz y Francisco Javier Fernández Conde. Avilesina (y cronista de la villa) una, castrillonense l’otru, dambos hestoriadores adelantáronse al so tiempu en munches coses. Una d’elles, ensin facer tampoco bandera d’ello, foi la aplicación d’una perspectiva de xéneru que permitió, nel primeru de los casos, reivindicar la condición de muyer de Fakilo, la propietaria que, nel añu 803, protagonizó el primer documentu conserváu del Reinu d’Asturies con una xenerosa donación pa fundar el monasteriu de Santa María de Lliberdón. Nel segundu, yá en 1975 Fernández Conde estudió una figura imprescindible pala comprensión de la dómina d’Alfonso VII de Lleón no tocante a Asturies, coles sos lluces y solombres: la d’Urraca, ñacía fía bastarda del rei y muerta reina, gobernadora ya… independentista asturiana.
De la momia a la muyer
Los por qués y les circunstancies d’esa condición cabera d’Urraca de ‘rapaza na-na-nacionaliega’ son, sicasí, bastante desconocíos. Pero nun tanto pa xustificar qu’anguaño dellos medios de comunicación, al falar de la momia de la reina, que güei se caltién nun sepulcru de la Catedral de Palencia, faigan solo mención a qu’el cuerpo d’Urraca yera obesu, magar de la delicadeza de les sos manes y pies. Nun solo la propia hestoria d’Urraca da pa un debate hestoriográficu que nin tan nin se-y espera, ayenu como ye al mitu d’Asturies como cuna d’España, sinon tamién la del mesmu enterramientu, güei recién restauráu.
Tóo entama na dómina de les revueltes de Gonzalo Peláez, el mesmu del que diz el cantar que derrotó ‘tres vegaes al mesmu rei de Castiella’. Esi rei yera Alfonso VII, el primeru de los borgoñones que gobernaron en Lleón y que visitó delles vegáes Asturies pa combatir escontra’l rebelde, siempres abellugáu en dalguna de les residencies de los nobles de la so fastera. Ún d’ellos, Pedro Díaz, tenía los sos dominios en Soto d’Ayer, quiciabes dientro de les ruines que güei caltiénense entre Soto y Peḷḷuno, y una fía, Gontrodo Petri, que según les cróniques convirtióse llueu na amante d’Alfonso VII y, al cabu de los meses, na má d’una nena con nome de reina. El de la so güela: Urraca.
L’ascensu de la bastarda real
Non que fora mui sorprendente. La bastardía yera una condición común, y qu’amás, apurría a los reis la posibilidá de xenerar más llazos de xuntanza coles numberoses families nobles que, nun enfrentamientu, pudieren dixebrar el so poder. Esta asunción fáese evidente nel casu d’Urraca, separtada de la madre bien llueu de ñacer, en 1133, y unviada a Galicia pa ser educada cola infanta Sancha, la hermana del padre. Los vínculos familiares son importantes nun tiempu nel qu’un mal matrimoniu podía bien xenerar una guerra, como fora’l casu de la güela homónima d’Urraca con Alfonso I, rei de Pamplona, el so segundu (y erráu) esposu tres del borgoñón. Ellí, en Navarra, taba’l destín de la bastarda asturiana, casada a los once años con García Ramírez, rei por elleición de los nobles y que cuntaba cuasi con tres décades más de vida qu’Urraca. Nun escaeció Urraca la so tierra natal mentres los seis años de matrimoniu, visitando a la madre delles vegáes y faciendo de mecenes de monasterios como’l de San Vicente y, nel tiempo, el de Santa María de la Vega, onde diba morrer, años dempués, Gontrodo. El sepulcru de la amante real alcuéntrase güei nel Museu Arqueolóxicu d’Asturies; y el monasteriu, desapaecíu baxo los cimientos de la hestórica fábrica de la Vega.
Non como na memoria de los próceres d’esa hestoria recién quedó Urraca desaniciada tres de la muerte del rei navarru. En 1150, viuda con malpenes 17 años y una fía de García Ramírez, Urraca vuelve a Asturies, ensin perder la calidá de reina, y col envís de gobernar un territoriu, per otru lláu, llonxanu del poder de Lleón más polo abruptu ya inaccesible que pola distancia. N’Asturies va vivir nun palacio xunto a San Salvador, y ye reina, sí, magar que siempres baxo’l dominiu lleonés, que va seguir siendo del padre hasta la muerte d’esti, en 1157, cuando Urraca sigue entá soltera y gobernando una Asturies con reina, pero ensin autonomía.
Escures lluches pola autonomía
Años dempués de la muerte d’Alfonso VII, Urraca vuelve a casar col noble Álvar Rodríguez de Castro. La reina tien ya 30 años y en Lleón gobierna el so mediu hermanu Fernando II. Ye nesti tiempo (y difícil que lo fora dempués, yá qu’Urraca va morrer moza, en 1179, con namái 45 años) cuando Concha Casado Lobato cree que’l matrimoniu pudo enfrentase a Fernando II na gueta d’una independencia pa Asturies, o, al menos, según dicen les fuentes de la dómina, de que’l rei de Lleón ‘perdiera Asturies’. Nun hai más. El restu de la hestoria piérdese na escuridá de la ausencia de fuentes, magar de qu’hai otres, como la que se caltién nel Archivu Capitular d’Uviéu, qu’aseguren qu’aquella llucha fraternal foi, a la fin, favoratible pa Fernando II; o’l fechu de que Urraca acabare sos díes en Palencia, onde güei, momificada pola sequedá del clima, sigue.
El sepulcru foi descubiertu en 1532, ‘al remover les grades de la capilla del Sacramentu’, según l’acta de la Comisión provincial de Monumentos Hestóricos y Artísticos de Palencia en 1896. Esi añu, como agora, la momia de quien fora reina de Navarra y también, anque solo fora ‘de facto’, d’Asturies, foi inspeccionada; ficiérenlo tamién en 1865, cuando la reina Isabel II donó, pa la conservación del cuerpo d’Urraca, un mantu azul pa la calabre, el forru de velludu y la cubiera de cristal del sepulcru. Nun yera casualidá. Tamién ella, como Urraca, fora una muyer venceyada a un poder que taba, anque por otres causes bien distintes, a puntu de perder. La hestoria, sobremanera la de los reis -que tamién ye la de les reines- acaba venceyándose entre sieglos. El pasáu ye siempres el meyor sofitu del poder.
