El “Samaín” nun ye tradicional n’Asturies. Tampoco lo ye “L’anguleru”, el míticu marineru que trai los regalos a los neños en Nadal. Pero dambes son reapropiaciones asturianes bien nuestres, reellaboraciones feches dende Asturies de fenómenos más vieyos que’l mundu (una fiesta de los muertos l’ún, un solsticiu d’hibiernu l’otru). Reellaboraciones que mos ponen como una cultura en movimientu, anovadora (tolo anovador que pue ser reellaborar o adaptar un mitu, que tampoco ye inventar la pólvora) y creativa.
Les cultures, na mio opinión, muerren cuando dexen de ser creatives. La música propia d’un país muerre cuando cai no “tradicional”, la lliteratura cuando cai no “costumista”, la llingua cuando cai no “llitúrxico” (pensái llitúrxico nel sentíu ampliu y vais entender qué quiero dicir con ello). Pasa lo mesmo coles fiestes: Si queremos ser, tenemos que selo con proyeición de futuru, si queremos esistir, tenemos qu’abrazar les anovaciones que se produxeron nes últimes décades. Y sí, esto implica munches veces el mestizaxe cultural, el trayer fenómenos d’otros llugares y reellaboralos dende equí, pensándolos nós.
Eso ye reellaborar una tradición, reescribila, refacela, da-y forma nueva a eses alpargates pa que nos entren meyor nel pie, que yá crecimos
Si anguaño se celebra’l Nadal en tolos países occidentales col puxu que tien (probablemente seya la fiesta que se celebra con más fuercia de toes), tien muncho más que ver cola anovación que cola tradición: les lluces navidiegues (la electricidá ye del sieglu XIX), los árboles de navidá (otra importación, bien guapa), les hestories de reis magos/papás noeles que si bien podíen esistir, nun teníen la forma actual, el Príncipe Aliatar n’Asturies (daqué que vieno en plenu franquismu) o, n’España, les uves de Nuechevieya, que son de los años 20 del sieglu pasáu. Llanzo la entruga: ¿Qué tien que ver el Nadal occidental de 2023 col de 1723? Bien poco; por eso lu festexamos la mayoría; porque ye prestoso, y gústanos facer y recibir regalos y decorar la casa anque nun pertenezamos a nenguna relixón.
Lo importante y lo difícil tamién ye caltener esi equilibriu (dacuando fráxil) ente introducir elementos prestosos que vienen de fuera y nun renunciar a la propia tradición nuestra. Los axentes culturales, ello ye, tolos qu’ellaboren cultura (y esto va dende un cantante y un escritor hasta una comisión de fiestes d’un conceyu; pos toos tán faciendo lo mesmo), tienen per delantre’l retu de consiguir facer concasar los elementos prestosos colos tradicionales, ellaborar productos culturales (y les fiestes son ún) que seyan propios, que seyan un desendolcu propiu de la nuesa cultura anque tean trescalaos d’influencies ayenes que nun faen más qu’arriquecelos y facelos más prestosos y atractivos. En música vémoslo bien. La música “tradicional asturiana” la nuesa (Nueche d’Ánimes) nun val pa baillase nuna discoteca como sí valen otres (los Halloweens); hasta que llegó un puntu que se llama Rodrigo Cuevas y que fixo música claramente asturiana pero claramente baillable (el nuesu Samaín).
Ye, en definitiva, un exerciciu de síntesis: ¿Qué nun funciona d’esta fiesta/lliteratura/música/cine/mitoloxía que fai que seya más atractiva pa la xente la fiesta/lliteratura/música/mitoloxía/cine foriatu? Esi exerciciu ye la tresformación de la vieya y aburrida nueche d’ánimes onde vaciábemos nabos y que nun mos diz nada a los que vivimos nesti sieglu colos elementos prestosos del Halloween (les llambionaes, lo d’antroxase…) y otros que creemos agora (y esto ta por facer) nun nuevu Samaín que ye dalgo nuevo, nuevo y llibre que nós creamos. Non de la nada, qué va, sinón colo meyor de la vieya Nueche d’Ánimes y esbillando lo más prestoso del Halloween. Eso ye reellaborar una tradición, reescribila, refacela, da-y forma nueva a eses alpargates pa que nos entren meyor nel pie, que yá crecimos. Por eso a min, personalmente, cualquier reellaboración asturiana de la cultura paezme bona siempre y cuando los valores que tresmita seyan bonos y, a dicir verdá, nun veo nada malo en comer llambionaes y antroxase de seres horrorosos. Al contrario, ye bien prestoso. Asina que pela mio parte, ¡Puxa*’l Samaín!
*“Puxa” ye una reellaboración llingüística y anovación de los años 70, una espresión que s’introduz nesa dómina porque la xente considera que les tradicionales nun valíen pa tresmitir lo qu’ellos queríen. Ye una anovación, otra de tantes, tan válida como les demás, tan guapa porque ye una cultura y una llingua creativa y anovadora que se piensa a sigo mesma y qu’esporpolla.
