“Dende La Llegra entamamos esta campaña de recoyía de donaciones pa poder acarrear los gastos del caberu ataque que tuvimos nel Llar la nueche del 30 d’avientu nel que frayeron la verxa faciendo palanca con un tablón y tamién frayeron una de les ventanes” señalen en un comunicáu del centru social soberanista.
Fundáu en 2014 tres el pieslle del CSOA La Madreña, La Llegra funciona como espaciu cultural y de xuntanza y trabayu de colectivos.
El llocal entama agora una campaña de solidaridá económica pa facer frente a los daños de l’agresión: “Son munchos los ataques que tuvimos estos caberos años: esborriar el mural delles vegaes, pintaes xenófobes, facistes y machistes, rotura de cristales, atascamientu de la pesllera… Nun van ser con nós compañeres y compañeros. Cola unidá y solidaridá popular vamos facer frente a los gastos d’estos ataques cobardes durante les nueches. Por eso pidímoste cualquier collaboración económica pa siguir alantre y que naide nos abocane”.
Dende el llocal habiliten esta campaña.
