Ye difícil atopar les pallabres afayadices cuando falta una persona. La misión ye tovía más imposible cuando esa persona ye, amás, un referente. Una referente, nesti casu. Voi dexar que seya mio güela, la Peranchín a la que tanto quería, esa que tanto la conoció, quien describa a Anita Sirgo. “Nun yera como la mayoría. Yera de les de verdá.”
Nun hai manera de quita-y la razón, Anita yera diferente. Sí, yera de les de verdá. De les que nun duldaron en dar la cara nes situaciones más complicaes, de les que defendieron en tou momentu a quien más lo necesitaba. De les que tuvieron, quiciás non siempre pero sí nes más de les ocasiones, nel llau correutu de la hestoria.
Que formara parte d’esi grupu de les auténtiques –exerciendo como la cabezalera, atrévome a dicir- nun significa que quixere más a les sos sigles (les del Partíu Comunista y les de les Comisiones Obreres) que les sos compañeres y compañeros. Tampoco nun se refier a que militare toa una vida neses organizaciones, xugándose la salú y la propia vida tantos y tantos años. Non, Anita yera de les de verdá porque nun-y daba más ser la primera o la última. Porque nun tenía problema en sacrificase ella en favor d’otra persona, importaba bien poco que nin siquier la conociera. Yera de les de verdá porque con más d’ochenta años siguía glayando polos derechos de les muyeres, porque siguía llevantando’l puñu delantre de la catedral d’Uviéu pa esixir que Vesuvius nun zarrare dexando a los trabayadores na cai. Qué fácil –y hasta entendible- diba ser quedar calentina y cómoda en dalgún salón d’actos recibiendo aplausos y homenaxes. Y sí, tamién los recibió, de xuru que menos de los merecíos (porque ye imposible cumplir con una figura como la d’ella), pero nun dexó de defender nes places un futuru dignu pa la nuestra sociedá. Presente siempre que la salú-y lo permitió, colos sos abrazos fuertes nos que tresmitía enerxía, colos sos ánimos a que la mocedá nun se rindiere y garrare’l testigu.
La semeya vital d’Anita amuesa la so bondá
Nun yera perfeuta, naide nun lo ye. Pero la forma de ser de les persones refléxase na so manera d’actuar. Y la manera d’actuar d’Anita yera vivir pa los demás, siendo la güela asturiana que na Fiesta del PCE trabayaba tanto –o más- que cualesquier mocina de venti años. La vida nun foi xusta con Anita, nun la trató bien. Foi cruel en dalgunes ocasiones. Y ella, en cuenta escoyer les salíes fáciles, garró siempre’l camín del compromisu. La semeya vital d’Anita amuesa la so bondá. Yera una santa, anque en poques ilesies lo quixeron entender.
Van dexándonos los referentes, pero hai que llevantar la cabeza y el puñu y siguir hacia alantre. Nun podemos permitir que trunfen esos discursos qu’ella tanto tarrecía. Debésmos-ylo a Anita, tamién a munches otres. A toes eses persones que, como ella, yeren anónimes y acabaron grabando, gracies a la llucha y el compromisu, a la entrega y a la calidá humana, los sos nomes na eternidá. Porque Anita yá ye eterna, a tolos niveles. El feminismu, el comunismu, el sindicalismu, la izquierda en xeneral, tamien la reivindicación llingüística; nun esiste movimientu que defenda un futuru meyor que nun tenga a Anita como referente a siguir, como figura a estudiar.
Na Cuenca Minera –con mayúscules- nun tenemos dioses propios a los que rezar. Queremos más cuntar con persones de carne y güesu, con errores y aciertos, a les que poder asemeyanos. Y nesta tierra cuasi mítica, cuasi llexendaria, Anita Sirgo yera una d’eses heroínes que siempre lluchó por conquistar l’Olimpu. Esta Cuenca nuestra tien el so rostru como bandera.
Oxalá queden munches Perruques como ella.
