L’asociación Romería Cuir foi fundada’l 12 d’avientu de 2023 col oxetivu d’entamar un eventu nel que se dean la mano la ruralidá, el deporte, la diversidá, el folclor, los lligueros, la esencia reivindicativa y l’alegría de xuntase.
“Les persones LGTBIQ+ necesitamos espacios de socialización reales ya inclusivos que vayan acullá de discoteques o aplicaciones de contactos per medios dixitales. Son necesaries formes de socializar que nun tean atravesaes pel consumismu y les dinámiques urbanes. Con esti oxetivu l’asociación ta organizando l’eventu homónimu, la Romería Cuir, que quier ser un campamentu deportivu y una romería inclusiva onde la diversión, la cultura y l’espectáculu seyan los protagonistes” señalen en un comunicao.
Romería Cuir, como eventu inclusivu, tien los sos oríxenes nel 2021 y busca apurrir visibilidá al colectivu. El campamentu va desendolcase nel conceyu Parres. La so capital, Les Arriondes va convertise nel centru d’acoyida pa toles persones que vengan a esfrutar de les actividaes deportives grupales, comal Descensu en piragües del ríu Seya, o’l senderismu, y el resto d’actos del programa festivu: “Tanto’l deporte como’l restu d’actividaes programaes (escalada, fútbol femenín, xuegos tradicionales, talleres…) ayuden a crear amistaes y texer redes ente asociaciones y grupos deportivos inclusivos. Too ello nun mediu rural amable y seguru pa toles persones, ensin discriminación dala, tanto dientro como fuera del colectivu. Ye un evento que nun exclúi a naide y que da visibilidá al colectivu nel rural asturianu”
“Con esti apueste queremos contribuyir a afitar la imaxe d’Asturies como destín seguru pa les persones LGTBIQ+ y da-y al colectivu, a nivel estatal, un espaciu deportivu y d’ociu alternativu, entá difícil d’atopar” señalen dende Romería Cuir.
