Puntu y final pa diez años de trabayu materializáos en cuatro tomos “de trés quilos, 562 gramos” en total, como afinó ayeri’l periodista Javier Cuervo nel vermú celebráu na Llibrería Matadero Uno pa despidir la obra d’Alfonso Zapico ‘La Balada del Norte’. El debuxante asturianu, anque afincáu en Francia, trabaya yá nel so prósimu proyectu, una hestoria sobre l’esiliu español nel país vecín.
Ellí (vive n’Angoulême, onde enseña castellán), diz, la hestoria de la Revolución d’Ochobre nun ye bien conocida, pero cuando se cunta aína atopa comparanza cola Comuña de París, la insurreición que nel sieglu XIX tiró abaxo la columna Vendôme y aupó al pueblu al poder. Son narraciones, cuntaba Zapico, paraleles porque, col telón de fondu de lo universal, traten de seres humanos “a los que la Hestoria lleva per delantre”.
L’autor tuvo acompañáu na so presentación por Javier Cuervo y Aitana Castaño, con quien collaboró en ‘Los niños de humo y ‘Carboneras’. Comparten eses obres con ‘La Balada del Norte’ la localización, Montecorvo, “una especie de Macondo imaxinariu de la Cuenca” que consigue averar al llector a “les hestories pequenes que t’averen a la gran Historia”.
De les parés de la llibrería, abarrotada pa recibir a Zapico, colgaben reproducciones limitaes y certificaes de la so obra, que los visitantes pueden mercar a un preciu de 52 euros y que fueron espuestes gracies a la collaboración cola Galería Color3arte. Una circunstancia que sirve pa recordar qu’esti llunes, na Sala de Cómic d’Avilés, va tamién a inaugurase la esposición ‘Las baladas de Zapico’. Acábase ‘La balada del Norte’, pero l’autor de Blimea alcuéntrase nel so meyor momentu.
