Ye inevitable que les elecciones al parlamentu gallegu del día 18 de febreru tengan más llectures que les propiamente en clave gallega. Dao que la mayor parte de les fuercies polítiques presentes na campaña gallega son d’ámbitu estatal ye lóxico facer análisis sobre cómo esos resultaos pueden afectar a eses fuercies, y dao qu’eses mesmes fuercies son les hexemóniques n’Asturies les llectures asturianes son imprescindibles. Pero non solo por eso: l’éxitu electoral del BNG, que s’afita non yá como segunda fuercia política del país vecín sinon como única alternativa a la derecha, tamién apurre pistes sobre per ónde debería enfilar la esquierda asturiana.
Porque ye de la esquierda de lo que vamos falar equí. De los resutaos de les esquierdes que se presentaron a les elecciones gallegues y de les sos estratexes. De la evidente victoria del PP y del evidente fracasu de Vox falarán otros. De si la non nata amnistía a los independentistes catalanes apurrió o quitó munchos votos tamién. Equí vamos falar de les esquierdes, y de la llectura a facer en clave asturiana de los sos resultaos. Sobre esti tema precediéronme los compañeros Xune Elipe y Alejandro Suárez colos sos artículos, y súmome yo con esti.
Aparte del PP por razones obvies, el gran trunfador de la nueche electoral del 18-F foi el Bloque Nacionalista Galego, el frente multipartidariu de llarga duración (más de cuarenta años) que volvió a quedar en segunda posición recortando distancies col PP y enanchándoles col PSOE. Si usamos la terminoloxía que s’impunxo d’unos años p’acá la victoria del Bloque seríalo de la “vieya política”: un frente ampliu construyíu como un alianza popular de partíos y persones, con una fuercia hexemónica, la UPG, que sigue definiéndose como comunista, con un correlatu sindical, la CIG, que-y disputa la hexemonía con éxitu a CCOO y UGT, con miles de militantes presentes en tolos ámbitos de la sociedá gallega, con cientos de cuadros formaos políticamente nel Bloque y nes organizaciones que lu integren, con un discursu mui trabáu, y valiente, en tolos sectores de l’actualidá del país, con un programa de máximos que desborda l’actual réxime y con una estratexa cimble que lu llevó a compartir gobiernu na Xunta col PSOE y a pautar nes Cortes españoles alcuerdos col gobiernos de coalición de Pedro Sánchez a cambiu de concesiones programátiques. Ye la esquierda clásica de manual, convertida en vieya política polos voceros d’una nueva qu’avieyó anantes de llegar a adulta.
La estratexa del BNG, la que tien dende hai cuatro décades, ye una estratexa frentepopulista mui inspirada na esperiencia uruguaya, especialmente. Básase nel alcuerdu de fuercies polítiques mui a la esquierda que, a fuercia d’enanchar non solo en sigles sinon n’espaciu sociolóxicu, acaben por atropar un segmentu ampliu de la sociedá que va dende la esquierda radical al centru-esquierda, suavizando’l programa sigún s’acerquen les posibilidaes de formar gobiernu pero ensin renunciar a los oxetivos finales, aplazaos poles circunstancies y pol contestu. Sobre si esi aplazamientu ye talu o si son pures renuncies, sobre si ye forciáu poles circunstancies o pol comencimientu, nun voi entrar porque ye otru debate.
L’evidente éxitu del BNG contrasta col tamién evidente fracasu de Sumar y Podemos. El resultáu de Sumar ye mui ruinu porque sacó la mitá de lo que sacó’l so antecesor inmediatu, Galicia en Común, y queda fuera del parlamentu como yá quedara hai cuatro años l’anterior marca. El de Podemos ye catastróficu porque tresmite la sensación de desbandada total nun partíu que, anque en Galicia nunca tuviera la fuercia que sí tuvo n’otros sitios, como Asturies, sí llegó a ser un actor políticu relevante.
Izquierda Asturiana (IAS) lleva trenta años defendiendo la necesidá d’un frente ampliu d’esquierda en clave asturiana, de fuercies non necesariamente d’estricta obediencia asturiana pero sí comprometíes con un proyectu federal auténticu
El fracasu de Podemos, pero tamién de Sumar, yelo de la llamada “nueva política” que tien dos etapes, la que va de 2014 a 2023, cola irrupción de Podemos y la so rápida conversión na fuercia hexemónica de la esquierda, y una segunda que s’abre en 2023 cola apaición de Sumar, que sigue la mesma lóxica que Podemos pero más funcional tovía al papel de fuercia subordinada al PSOE. Si Podemos yera una fuercia política qu’atropaba lo pior del 15M (adanismu, demagoxa a palaes, pensamientu máxicu) y dexaba lo meyor (antagonismu, valentía, participación) pa garrar lo pior d’IU (obsesión polo institucional y rescate al PSOE) dexando a un llau lo meyor (programa, cuadros, articulación territorial) la mutación del espaciu Unidas Podemos implicó atropar lo pior de les zunes de Podemos (institucionalismu, personalismu, centralismu) pa conformar una esquierda dinástica que permita encontar al PSOE y con ello al réxime cuando faga falta, a cambiu de concesiones que, ensin despreciales, tán mui per baxo de les espectatives coles que nació hai diez años esta forma “nueva” de facer política.
Formes nueves de facer política pero qu’en rialidá son mui vieyes. Una fuercia política que nun tien militantes, sinon namás xente apuntao que nun s’aconceya periodicamente y que namás paga una cuota, si la paga, y vota cada x años nes elecciones internes y nes primaries. Un partíu que nun descansa nos sos cuadros, sinon namás nos cargos públicos, que son los que lu financien colos sos xornales políticos, un partíu onde los cambios d’estratexa nun vienen daos pol debate internu sinon pol cambiu d’opinión del cabezaleru o cabezalera carismáticos de turnu nun ye otro que’l partíu de notables del sieglu XIX, el previu a l’apaición de los grandes partíos de mases de la era industrial. La nueva política nunca lo foi pero pasó por selo porque yera tan vieya que naide s’alcordaba de que yá existiera primero de lo qu’había anguaño. Pretender aneciar nesi camín cuando amuesa les sos llendes d’una forma tan evidente ye un error pergrave que n’Asturies nun deberíemos cometer.
Tamos en mitá d’un ciclu electoral que toma tola primera mitá d’esti añu 2024. En febreru fueron les elecciones gallegues, n’abril les vasques, en xunu les del parlamentu européu. El resultáu del mesmu va ser determinante pa ver cómo se reconfigura tol espaciu políticu a la esquierda del PSOE, dientro de la so enorme pluralidá, tanto organizativa como ideolóxica y estratéxica. Pinta mal la cosa pa siguir apostando por caminos que too indica que lleven al fracasu y a la irrelevancia política.
N’Asturies tamién. L’espaciu que foi xuntu a les pasaes elecciones xenerales de xunetu baxo’l paragües de Sumar venía de dir dixebráu en dos bloques a les elecciones a la Xunta Xeneral y a los conceyos de dos meses anantes. Unu d’esos bloques yera Podemos, dividíu en dos pero xuntu tovía formalmente, y l’otru Convocatoria por Asturies, la coalición ente IU, IAS y Más País. A toos mos toca redefinir la nuestra estratexa nesti momentu.
Convocatoria por Asturies (CxA) nació con voluntá de ser un espaciu común d’organizaciones y d’independientes xuntos en base a un programa mínimu y a una estratexa común, pero respetando les organizaciones previes, que mantienen el so proyectu. Nun ye tovía’l frente ampliu qu’Asturies necesita pero sí ye un primer pasu nesa dirección, y pa ello necesita enanchar el so espaciu tanto no organizativo como no sociolóxico. Nació con vocacion de ser una ferramienta al serviciu del pueblu asturianu y ye ehí onde tenemos qu’afondar. Nun ta de mas sorrayar que l’éxitu del BNG non yá nes pasaes elecciones sinon dende hai décades débese a dos factores: a que son la fuercia de la ESQUIERDA, la que meyor representa y defende a les clases populares, y a que son la fuercia GALLEGA, la que meyor defende los sectores productivos del país, la so identidá colectiva y el so territoriu. Y eso ye’l resultáu d’un procesu d’acumulación mui anterior al propiu BNG, que vien del galleguismu anterior a la Guerra Civil y del nuevu galleguismu marxista de los años ’60, del trabayu posáu de miles de persones nel ámbitu cultural, sindical, políticu, asociativu… a lo llargo d’años. Eso conforma un padremuñu colectivu que per años representaron diverses opciones polítiques pero que va cuantayá que cuayaron toes elles nel BNG. Eso ye lo qu’un proyectu adanista y/o personalista nun pue baltar con facilidá, anque paeciera que pasaba en 2012 y 2016 cuando la crisis interna del BNG fixo qu’Alternativa Galega de Esquerda y En Marea paeciera que diben sepultalu. N’Asturies pasó daqué paecío en 2015, cuando Podemos quedó per delantre d’IU nes elecciones autonómiques.
Hai diferencies, obviamente. La IU de 2015 y la d’anguaño nin son nin fueron nunca un BNG. IU sí representa más que naide l’espaciu a la esquierda del PSOE, l’acumuláu históricu de les espresiones de la clase obrera asturiana que nun entraron dafechu nel xuegu del turnismu, pero nunca acabó de vese como la fuercia asturiana per se, la defensora radical de los sectores productivos, la tierra y la identidá colectiva del pueblu asturianu. Hubo bien d’avances nesi sentíu que sería absurdo nun reconocer pero tovía queda un cachu por andar.
Esti ye un elementu central del debate sobre’l camín a siguir, y sería absurdo negase a reconocelo. Izquierda Asturiana (IAS) lleva trenta años defendiendo la necesidá d’un frente ampliu d’esquierda en clave asturiana, de fuercies non necesariamente d’estricta obediencia asturiana pero sí comprometíes con un proyectu federal auténticu. Pretender que nel actual procesu de redefinición de la esquierda ye contradictorio facer un debate en clave asturiana colo que puea pasar fuera d’Asturies ye absurdo, ente otres coses porque esi debate ye un debate a escala europea, non solo española. Si Sumar ta tocáu pero non fundíu, o ta fundíu dafechu, si ye posible reinventalu o si hai que dir a otra cosa nun pue ser condicionante de ver qué se fai cola esquierda asturiana. Habrá fuercies que nun quieran renunciar a formar parte d’un proyectu estatal ca vez más difusu, y ye lexítimo, pero pa formar una federación primero tienen qu’existir los entes a federar, non al revés. Pretender una nueva nave nodriza que venga a conceder graciosa autonomía a la so periferia nun ye aceptable, y por supuesto eso de federal tien mui poco. Nesti añu 2024, nel que celebramos el 200 aniversariu del nacimientu de Francesc Pi i Margall, bono ye relleelu pa dase cuenta de que nun hai más federalismu que’l que naz d’abaxo p’arriba.
Lo contrario sería cayer, otra vez, na eterna maldición non yá de la esquierda asturiana, sinon de la sociedá asturiana entera: el d’asumir otra vez el mitu d’”Asturies la rescatadora”, el de que, cuando les coses tán permal al sur del cordal, tien que despertar la fiera dormida pa poner orden. Y non. Al sur del cordal nun mos espera naide. Cuanto meyor fagamos les coses equí más fuercia tendrá la esquierda non solo n’Asturies sinon tamién fuera d’ella.
Convocatoria por Asturies pue ser el guañu d’una esquierda asturiana reconocible como tala: como esquierda y como asturiana. Pa eso tovía queda un bon cachu por andar que dende IAS queremos entamar cuanto primero. Porque ye posible y porque ye necesario.
