Les cais n’Asturies glayen por una oficialidá ‘ensin axetivos’

La cita añal de la Xunta pola Defensa de la Llingua Asturiana convocó a un millar de persones que glayaron ‘nun se dar’ pola oficialidá del idioma

Recomendados

Arantza Margolles
Arantza Margolles
Es historiadora.

Amagó tola mañana, pero nun llegó finalmente l’orpín a desllucir la cita de la Manifestación pola Oficialidá qu’añalmente entama la Xunta pola defensa de la Llingua Asturiana. A les doce hores baxo’l reló de la estación de Renfe d’Uviéu, encabezáos pola pancarta marrón y les lletres roses formando la palabra ‘Oficialidá’ de la Xunta, diéronse cita un millar de persones -coincidía un sábadu de males predicciones meteorolóxiques y a tres díes del Primeru de Mayu- tres de pancartes como les d’Aína, Podemos, CCOO, SUATEA, ADAE (Asociación de Docentes d’Asturianu y Eonaviego), ISA, Intersindical, Andecha Astur, Reciella, Mazcaritos d’Uviéu, Iniciativa pol Asturianu o la FSA-PSOE.

Reclamaron la oficialidá del asturianu, que tan cerca se viera n’aquella otra manifestación d’ochobre de 2021 pero que nunca nun llegó, colos eslóganes yá clásicos –‘xa, xa, xa, oficialidá’- y los sones de les pandereteres, que ficieron la banda sonora d’una xornada compartida, anque con severes diferencies na concurrencia, col rezu del ‘Rosariu por España’ que taba convocáu na plaza de la Catedral a les siete y media de la tarde, pero qu’un grupu de fieles, dende un bancu, adelantó a la mañana y al pasu de la manifestación delantre de la Congregación de les Sierves de Jesús de la Caridá, na cai Uría.

Semeya: Kike Gallart
Semeya: Kike Gallart

Nun hebo incidente nengún y los manifestantes acabaron enllenando la plaza de la Escandalera. Ellí, Leticia Baselgas (la metá de L-R) y Pau Santirso glayaron por una igualdá de drechos que, dixo Baselgas, nun tenía de llevar detrás “nengún axetivu”. “Nun hai oficialidaes amables nin oficialidaes gafes nin oficialidaes repunantes. Hai reconocimiento de derechos o nun lu hai. Nun queremos derechos de segunda. Queremos derechos, a cencielles”. Aquello yera “un movimientu de resistencia a desapaecer, de resistencia a que nos roben el futuru”, en boca de Santirso, quien defendió’l derechu de falar les palabres “qu’aprendiemos en casa y que nos xunten cola memoria de los nuesos”. Delantre de la mirada de los cabezaleros gubernamentales, Baselgas pidó la fin de la “discriminación del asturianu y del gallegu asturianu” y d’un “estatutu de segunda, propiu del sieglu pasáu”.

Semeya: Kike Gallart
Semeya: Kike Gallart
Semeya: Kike Gallart
Semeya: Kike Gallart
Semeya: Kike Gallart
Semeya: Kike Gallart
Semeya: Kike Gallart
Semeya: Kike Gallart
Semeya: Kike Gallart
Semeya: Kike Gallart

Ficiéronlo a pocos pasos de la Xunta Xeneral, minutos enantes de que’l periodista Damián Barreiro diera pasu a les actuaciones d’Alicia Álvarez, Ún de Gráu y Fruela 757, y que los pañuelos azul celeste s’axitaren penriba de les cabeces del públicu qu’un añu más “nun se dio” (esi yera’l llema d’esti añu: ‘Nun nos damos’) a dexar de lluchar pola oficialidá. Quiciabes foron sintíos pol presidente del Principáu, porque poques hores dempués de la marcha Adrián Barbón anunció en Twitter, anguaño X, qu’esta selmana diba citar formalmente a los grupos parlamentarios col envís de negociar la reforma del artícula 4 del Estatutu d’Autonomía que permitiera algamar, nesta llexislatura, l’asturianu como llingua oficial.

Semeya: Kike Gallart
Semeya: Kike Gallart
Semeya: Kike Gallart

¿Sedría esta, ensin que naide nun se diera cuenta nella, en verdá la última? Habrá que ver.

Actualidad