La 46 Selmana de les Lletres va rindir homenaxe al escritor ‘Pin’ Álvarez, fundador del Conceyu d’Asturies de Madrid

Adelantóse cuasi una década al Surdimientu, escribiendo'l so primer cuentu n'asturianu en 1966, con 18 años.

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

La Conseyería de Cultura, Política Llingüística y Deporte yá entamó los trabayos pa iguar la programación que va rindir tributu al autor del llibru de rellatos ‘Fíos de naide’, “ún de los exemplos más sobresalientes de la producción lliteraria de los años 70 y 80 del sieglu pasáu”, destacó esti martes el Gobiernu del Principáu nuna nota de prensa.

D’esta manera, Cultura va reconocer a “ún de los máximos esponentes de la lliteratura asturiana na diáspora”, porque Pin caltuvo viva la cultura asturiana mesmo dende Arxentina, onde emigró bien mozu dende Balmonte cola so má, mesmo dende Madrid más tarde.

Al traviés de la figura d’Álvarez, Cultura quier poner en valor el papel de la emigración na protección de la lliteratura y la llingua asturiana.

Xosé Álvarez ‘Pin’ ñació en Cigüedres, en Balmonte, en 1948, anque emigró de neñu xunto cola so má a Arxentina y volvió dempués a Madrid. El so venceyamientu con Asturies y la so cultura foi fundamentalmente emocional, yá que trabayó nel serviciu de coches-cama de Renfe y acabó la so vida llaboral como emplegáu de banca.

Adelantóse cuasi una década al Surdimientu, escribiendo’l so primer cuentu n’asturianu en 1966, con 18 años. En 1970, la revista ‘Asturias Semanal’, na que cuatro años dempués diba ñacer Conceyu Bable, espublizó-y una carta n’asturianu, y en 1973 ganó’l concursu de cuentos convocáu pol Muséu del Pueblu d’Asturies, escribiendo al rodiu de les iniciatives de l’Asociación Amigos del Bable.

En 1975, na Facultá de Ciencies de la Información de Madrid, entamaron a reunise un grupu d’asturianos que terminaron por formar l’Asociación Conceyu d’Asturies un añu dempués. El colectivu, que llegó a tener llocal propiu en Fuencarral, espublizó dos revistes -‘Restallu’ y ‘El Picatueru’- y convocó siempres concursos de poesía y narración, siempres al rodiu del trabayu de Xosé Álvarez, “alma de l’Asociación”, tal como destacó Cultura.

Foron munchos los asturianistes vinculáos a esti grupu: Neto, Fonsu Velázquez, Xuan Cándano, Xelu Neira, Xicu Yepes, Xulio Llaneza, Pepa Fernández, Xulio Ramos, Xosé María Rodríguez, Roberto González-Quevedo, Javier Cuartas, Carme Tineo, Celia Cardo, Mario Bango, Antonio Palicio, Cándida Domínguez, Maestru Casanova, Alfredo Huergo, David Rivas, Llarina Rodríguez, etcétera.

A partir de 1984, Xosé Álvarez abrió un paréntesis nel so activismu y l’asociación finó la so actividá.

Nos años 80 espublizó trés llibros en Madrid: ‘El bable de Xuanín ia outrus cuentus’ (1980), que ye la primer recopilación narrativa d’un autor del Surdimientu; ‘Fíos de naide’ (1981) y ‘Los tres reis’ (1983), ún de los primeros llibros infantiles de la época.

Hacia l’añu 2000 regresó al activismu llingüísticu y cultural, cola idega de volver a poner en marcha’l Conceyu d’Asturies en Madrid. Sicasí, morrió de sópitu nel so pueblu natal de Cigüedres, onde pasaba unos díes, nel 2001.

Actualidad