“Palestina nun lo va llograr, pero la voz de los estudiantes ye’l so gran consuelu”

Los hispano-palestinos Riad Ali Al-Aita y Salah Awad el-Sousi visiten Asturies buscando un entendimientu cola Universidá qu’acelere el treslladu d’estudiantes dende Gaza

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

Acelerar la homologación d’asignatures y facilitar el treslladu d’estudiantes y profesores palestinos a les universidáes españoles  ante’l xenocidiu entamáu por Israel en Gaza son los dos oxetivos principales de la visita a Asturies de Riad Ali Al-Aita y Salah Awad El-Sousi, ex decanos hispano-palestinos de la Universidá Al Azhar de Gaza, qu’esta mañana foron recibíos pol rector Ignacio Villaverde nel Edificiu Históricu de la Universidá d’Uviéu y na Xunta Xeneral pol so presidente Juan Cofiño. Un conveniu similar permite, dende vá unos meses, similares estremos pal casu de los estudiantes ucranios pola situación d’urxencia que viven nel so país.  

La visita, na que collaboraron la Plataforma UniOvi por Palestina y la Intersindical Asturiana, llevó a a Al-Aita y a El-Sousi tamién a la Xunta Xeneral del Principáu d’Asturies, onde foron recibíos polos diputáos de Podemos, Izquierda Xunida y PSOE. Los profesores (Salah Awad El-Sousi ye, amás, cónsul honoríficu d’España en Gaza) desplicaron, nuna rueda de prensa onde tuvieron acompañaos por Eva Fernández (InAst), Paco Erice y Beatriz González (UniOvi por Palestina), el trasiegu que-yos llevó a volver a la so tierra natal en 1994, dempués de más de dos décades estudiando y trabayando n’España.

Semeya: Arantxa Margolles

Esi añu, desplicó El-Sousi, entraron en vigor los acuerdos d’Oslo, firmaos por Israel y la OLP (Organización pa la Lliberación de Palestina), y que buscaben ufrir soluciones al ‘conflictu’ palestinu israelí. Una denomación qu’El-Sousi refuga pa falar de lo que ye, braeramente, una ocupación premeditada que vien d’ “un plan imperialista, un plan ocupacional” lleváu a cabu dende 1948 por mediu del “terrorismo armáu por parte de los grupos terroristes israelíes.

“Yo nun lo llamo nunca ‘guerra entre Gaza o entre palestinos e israelíes, porque nun hai exércitu palestinu pa poder llamalo ‘guerra’”. Fallen los medios de comunicación “qu’agora tan diciendo ‘guerra entre Israel y Hamas’, como si fora Hamás una potencia. Mécense los términos pa desviar el tema orixinal, que ye’l tema ocupacional d’Israel en Palestina”. Agora, nin Al-Aita nin El-Sousi son optimistes.

Semeya: Kike Gallart

Magar que los ataques israelís propiciaron la so evacuación a Madrid en 2008 y a Xordania en 2014, ellos volvieron “porque entós teníemos ónde volver”. Non agora. Decíenlo minutos enantes, mirando les muries del Edificiu Históricu de la Universidá d’Uviéu, afuracáes pola metralla na Revolución d’Ochobre del 34. “Anguaño, tolo que queda de Gaza ta asina mesmu”. Borráu de la realidá como mentres décades Israel tamién “borró, dende’l 48, el nome de Palestina del mapa xeográficu. Robáronnos la vestimenta, robáronnos el folclór; robáronnos la comida tradicional palestina. Robáronnos les canciones, robáronnoslo tóo. Quieren borrar la identidá palestina”.

Y va consiguise. Llamentaba El-Sousi que, magar que “la resistencia del pueblu palestinu sigue y seguirá”, “creo que nun lo va llograr. Sicasí, necesita alzarse la voz nel mundu, como tan faciendo los estudiantes nel mundu enteru. Les sos manifestaciones son el gran consuelu, el gran llogru, el gran volcán, el gran tsunami que tan faciendo pa descubrir les mentires históriques qu’Israel difundió mentres xeneraciones (…) Tienen mui buen marketing: el cine, los medios de comunicación, utilizando la cenahoria y el palu”.

Minutos dempués, el rector de la Universidá d’Uviéu recibía a los delegaos palestinos y prometía “declaraciones” bien llueu, menos d’una selmana dempués de valtiar el conveniu con Israel del proyectu Tiche que Nortes sacara a la lluz. Nel aire del edificio firíu pola metralla del 34 columbrábase yá el sentir d’un entendimientu.

Actualidad