Ensin novedá nel frente

Esti desfile ye una amuesa más de cómo’l nacionalismu español fai evidente la so incapacidá d’afirmación si nun ye al traviés de la contraposición o negación de les identidaes  propies de les estremaes nacionalidaes del Estáu

Recomendados

Va casi cien años qu’Eric María Remarque escribiere la so obra más notable, Ensin novedá nel frente. Una denuncia al militarismu y al absurdu de la guerra. La novela enmárcase nesi suicidiu colectivu que se conociere como la Gran Guerra, na que millones d’europeos perdieron les sos vides atrapaos nos mecanismos de la maquinaria capitalista, naquel tiempu yá protagonista nes rivalidaes imperialistes que Lenin describiere como esa “fase superior” y inevitable a la que se llegaría pol ansia continua del capitalismu.

Na actualidá, la vieya Europa paez tar somorguiada de nuevo nesa histeria colectiva del pasáu; o, pelo menos, los sos dirixentes políticos, cada vegada más obsesionaos pola defensa de plantegamientos belicistes, como si dos guerres mundiales nun fueren abondes llecciones históriques.  Les noticies sobre l’aumentu del gastu militar o la recién carrera d’armamentu pueblen el día a día nes portaes de prensa. Como nel pasáu, son un mal auguriu, que conduz inevitablemente al enfrentamientu entre pueblos, en pro de los intereses económicos d’unes élites globales capaces de llevar el mundu al desastre pol incrementu de los sos beneficios.

La situación nel Estáu español nun ye mui diferente de la del entornu européu. El denomináu  “gobiernu progresista” aumentó considerablemente’l presupuestu militar, amosando ser una pieza secundaria nel sistema OTAN, asina como de los intereses xeopolíticos norteamericanos.

Nesti contestu, dende’l Ministeriu de Defensa anúnciase la celebración del Día de les Fuercies Armaes n’Asturies el 25 de mayu, coincidiendo cola efeméride del Día de la Bandera Asturiana, llenando les cais d’armes y uniformes. Les declaraciones del Gobiernu estatal definen Asturies como una “tierra acoyedora y mui venceyada a les Fuercies Armaes”, y que siempre “amosó munchu cariñu a los sos miembros, que gocen de gran popularidá”.

Resulta complexo adivinar les razones históriques que sostienen eses declaraciones per parte del Ministeriu no referente a Asturies, pero constituyen un agraviu a la memoria d’aquellos  asturianos y asturianes que sufrieron violencia política nel pasáu per parte del Exércitu. Un Exércitu español que, tres el desastre’l 98 y los que tovía taben por llegar nel norte d’África, orientábase cada vegada más a la represión del enemigu internu, que nun yera otru qu’una clase trabayadora n’ascensu.  Nesi sen, Asturies, como ún de los referentes del movimientu obreru nel conxuntu estatal, foi nel sieglu XX sospechosa habitual pa los cuerpos represivos del estáu, incluyendo a los militares, dirixíos a sirvir de muria de contención a la burguesía énte’l peligru que suponía la revolución obrera.

Esiste una retafila d’ exemplos esmolecedores sobre’l llabor represivu desarrolláu polos militares n’Asturies nel sieglu pasáu, como la fuelga xeneral de 1917, que quedó grabada na memoria colectiva de les cuenques mineres. ¿Cómo escaecer el conocíu como “tren de la muerte” que xunía Mieres y L.ḷena disparando a homes y muyeres indefenses, con un númberu de víctimes que nun se conoz tovía anguaño?  

Tamién resulta difícil nun alcordase de la xabaz represión causada pol exércitu tres la mallograda Revolución d’Ochobre de 1934, sobre manera depués de la entrada de les tropes africanes, triste presaxu de los horrores qu’esperaben a miles de asturianos y asturianes mientres la Guerra Civil y la cruel posguerra, que tapecieron Asturies con sangre y muerte.

Agora, Uviéu va ver desfilar a les Fuercies Armaes peles sos cais, y non un día cualesquiera, sinón el 25 de mayu; o, lo que ye lo mesmo, el Día de la Bandera, coincidiendo col llevantamientu de 1808, que supunxo la toma de conciencia política d’Asturies nel contestu de les guerres napoleóniques y que tendría que constituyir un día festivu y d’arguyu pal país.

Esti desfile ye una amuesa más de cómo’l nacionalismu español fai evidente la so incapacidá d’afirmación si nun ye al traviés de la contraposición o negación de les identidaes  propies de les estremaes nacionalidaes del Estáu.  Nel casu asturianu, amás, la construcción del mitu españolista va lligáu dafechu a esa apropiación de los símbolos propios d’Asturies y, polo tanto, a la negación de la singularidá asturiana, como recueye David Guardado nel so ensayu Nunca vencida.

Atísbase un doble propósitu na planificación de los distintos actos militares que van tener llugar n’Asturies el 25 de mayu. D’un llau, el más obviu, promover la progresiva validación ante la población de los valores castrenses, a la par que xustificar l’aumentu del gastu militar, nun momentu nel qu’inclusive tamos volviendo a oyer falar nos medios de comunicación de tornar al serviciu militar obligatoriu o movilizar reservistes.

Pero, per otru llau, detrás escuéndese una función ideolóxica: l’afirmación del nacionalismu español más ranciu, qu’una vegada más resulta incapaz de separtase d’ún de los principales  símbolos del franquismu, como fuere l’Exércitu, al mesmu tiempu que niega los valores inherentes a la identidá asturiana. Estos rasgos constituyen bona parte del corpus ideolóxicu de formaciones ultraderechistes y llévennos a tiempos d’escuridá y falta de llibertaes.

Pa rematar, considero qu’una sociedá madura, como ye l’asturiana, tien de poner en valor la so historia, ser consciente del camín percorríu hasta agora, caleyar con puxu y valentía per Senderos de gloria como ficiere’l coronel Dax (Kirk Douglas) na mítica cinta de Kubrick. Hai, entós, otru camín: el refugar del militarismu y el belicismu, apostando pola resolución pacífica de conflictos y la paz ente pueblos. Hai otru camín, desmontar el rellatu del españolismu más ranciu y escuru. Hai otru camín, reivindicar la conocencia del pasáu y de la nuesa identidá como asturianos y asturianes, col arguyu de lo que fuimos, somos y seremos. Hai camín.

Actualidad