Tanxugueiras y Nuberu nel Festival del Arcu Atlánticu

El festival cellebróse de forma ininterrumpía ente 2012 y 2019 y recupérase esti añu pa cellebrar la que va ser la so IX edición.

Recomendados

Redacción Nortes
Redacción Norteshttps://www.nortes.me
Te contamos lo ocurrido centradas en la periferia.

El Festival Arcu Atlánticu de Xixón va tener llugar ente los díes 30 de xunetu y 4 d’agostu y va cuntar esti añu coles actuaciones de Tanxugueiras y Nuberu, ente otros artistes.

L’avance d’actividáes d’esti programa cultural ñacíu nel año 2012 y entamáu pola Fundación Municipal de Cultura, Educación y Universidá Popular de Xixón diose a conocer esti martes.

El festival cellebróse de forma ininterrumpía ente 2012 y 2019 y recupérase esti añu pa cellebrar la que va ser la so IX edición.

El programa de 2024 asoleya una amuesa representativa de la creación artística d’anguaño, inspirada mesmu na tradición como na vanguardia, asina como de les identidáes culturales de los territorios que formen parte del denomáu Arcu Atlánticu.

El gruesu de la so programación va desendolcase na cai, con música, teatru, baille, artes plástiques y conteníos audiovisuales.

La mayor parte de les actividáes culturales del festival cellebraránse na cai en distintes zones del centru la ciudá y con especial rellevancia nel barriu de Cimavilla.

Nesti sen, los espacios de cai onde va haber eventos van ser les places Mayor, de Xovellanos, de la Corrada, del Periodista Arturo Arias y de Campu Valdés, amás de los Xardinos de la Reina y l’Atalaya.

Yá que dalgunes actividáes, poles sos carauterístiques, nun pueden desendolcase na cai, tamién van formar parte de la programación el Centru de Cultura Antiguu Institutu, la Antigua Escuela de Comerciu, el Museu del Pueblu d’Asturies y la Colexiata de San Xuan Bautista.

Amás, con motivu del centenariu de la ñacencia d’Eduardo Chillida incorporáronse a la programación dalgunes actividáes pa difundir la obra del universal escultor, por casu un espectáculu que va tener llugar al pie del Eloxu del Horizonte el martes 0 de xunetu

Actualidad