Va tiempu, en 2018, titulé un artículu qu’espublicé n’Atlántica XXII “Asturias se salva pensando”. Falaba daquella d’otra frase que se glayaba al altu la lleva nes manifestaciones de Comisiones Obreres contra la reconversión industrial, “Asturias se salva luchando”, simplemente col enfotu d’actualizala.
Ye verdá que les lluches y movilizaciones obreres ficieron posibles meyores sociales impensables ensin elles, incluyendo l’estáu del bienestar, anguaño en peligru y en retrocesu. Pero pa salir de la crisis y facer frente a los retos del futuru, Asturies necesitaba daqué más que resistencia y rebeldía. Lo primero, ponese a pensar en sí mesma ensin complexos nin subordinaciones, pa reinventase y algamar el llugar que-y correspuende na sociedá moderna post-industrial y nel Estáu plurinacional español.
El pensamientu precede a l’acción y marca siempre la fueya de ruta de los pueblos y les sociedaes. Ta bien protestar y espatuxar, la resignación ye complicidá coles inxusticies y el meyor camín pa perpetuales. Pero crear tamién ye imprescindible. Oponese ensin alternatives solo lleva a la frustración.
Hai bones noticies últimamente. Asturies púnxose a pensar, como amuesa’l regresu del ensayu, la crónica y el pensamientu sobre l’autonomía, un llabor desapaecíu dende los primeros años de la Transición. No hay país, crónica política (y sentimental) de Asturias (1975-2022), editorial Hoja de Lata, del mesmu autor que firma esti artículu, foi’l primeru de los llibros qu’acabaron col paréntesis de más de cuarenta años de seca nel ensayismu sobre Asturies. Escritu en castellanu y apaecíu a finales de 2022, ye una crónica personal y periodística sobre l´Asturies de la democracia, qu’apunta a la esclerosis del modelu autonómicu qu’entamó en 1981. Nel llibru, nel capítulu final, a mou d’epílogu, hai un par de frases que podríen resumir el so conteníu:
Con la llegada de la democracia y el Estado de las autonomías, Asturias se diluyó en España incondicionalmente renunciando a su personalidad, a su identidad. No parece que fuese una decisión acertada.
Pocos meses dempués, en mayu de 2023, l’apaición d’otru llibru, Nunca vencida, una historia de la idea d´Asturies (La Fabriquina), de David Guardado, dexa bien nidio qu’esi fenómenu nun ye nuevu y en realidá supón la continuación del pensamientu dominante dende’l sieglu XIX, tres del paréntesis del franquismu, que na II República compartíen progresistes y conservadores. Nun ensayu brillante y monumental, escritu n´asturianu y tornáu más tarde al castellanu, Guardado aporta una teoría esencial pa entender l´Asturies contemporánea: el discursu de la renuncia. Como una madre cola fía, Asturies renuncia a la so personalidá, a un llugar propiu n´España, a la so cultura, a la so llingua, a les sos instituciones históriques y hasta al so nome (tornáu en 1833 por “provincia de Oviedo”) porque ye l’orixe de la nación española, más grande ya importante que l’asturiana. Ye una construcción ideolóxica, hexemónica dende l’apaición de la moderna nación española nel sieglu XIX y divulgada poles élites polítiques y culturales, por personalidaes como Pedro José Pidal, Alejandro Pidal y Mon, José Posada Herrera, Fermín Canella o Ramón Pérez de Ayala.
Una interpretación histórica, esta del cuadonguismu como mitu de los oríxenes de la nación española, que ya refugó cuantayá la historiografía moderna, definitivamente nos caberos años. Otru llibru espublizáu esti mesmu añu, Astures, gens Hispaniae (Trabe), de José Ramón García Fernández, “Monchu’l cura”, afonda con rigor históricu na desmitificación de Cuadonga, una griesca onde nació’l Reinu d´Asturies, orixe de la España plurinacional, una realidá bien alloñada del mitu y la fantasía del cuadonguismu, afitáu nel nacionalismu español más ultramontanu, la Monarquía y el catolicismu.
Astures, gens Hispaniae ye’l llabor de toa una vida d’estudiu, llectures, investigación, viaxes y reflexones de “Monchu’l cura”, un sacerdote heterodoxu, asturianista y críticu cola Ilesia católica, que recuerda a ún de los personaxes meyor trataos na so obra, Prisciliano, que practicaba na actual Galicia una relixón heredera de los antiguos cultos paganos celtes, lo que y-costó la vida. Escritu en castellanu, pero con párrafos n´asturianu y llatín, Monchu, de 88 años, fai nél una llectura tan apasionada como rigorosa de la Historia recién, non solo de la d´Asturies, que col so reinu altomedieval llegó a ocupar bona parte de la Península. El restu yera Hispania, territoriu gobernáu polos árabes qu’entraron per Andalucía.
Tamién en 2024, espublizóse ¡Esperemos! Así nos lo mandan (Trabe). El títulu d´esti llibru del historiador Carlos Gordon fai alcordanza d´un artículu del escritor asturianista Emilio Robles, “Pachín de Melás”, criticando la postura de los socialistes asturianos en 1931 que, cola llegada de la República, taben enfotaos nos trabayos pa una Constitución y pa un estatutu d´autonomía pa Cataluña, dexando pa prau’l proyeutu del asturianu que sofitaben los federalistes. La teoría de la renuncia tamién s’impunxo cola primer esperiencia democrática española, afogada en sangre en 1936. Gordon, gran historiador, como ya dexó constancia cola historia del MCA, espón cómo’l sucursalismu y la subordinación a Madrid peles que caminó l’autonomía asturiana yá teníen precedentes cuando se plantegó mediu sieglu primero, de la que la algamaron Cataluña y el País Vascu.
Tamién s’anuncia pa esti añu un llibru de Pedro de Silva sobre Asturies, lo qu’amuesa que nun tamos énte un fenómenu casual, sinón énte una tendencia. El primer presidente autonómicu salíu de les urnes va zarrar asina un círculu, porque El regionalismo asturiano (Ayalga), de 1976, foi l’últimu ensayu sobre Asturies (con Llingua y sociedá asturiana de Xosé Lluis García Arias, editáu por Conceyu Bable, que ye del mesmu añu) enantes d´estos cuatro llibros de recién. Como Asturies se salva pensando, pamidea que yá tamos viendo la lluz al final de un llargu túnel nel que dexemos atrás reconversiones, a la histórica minería y al grandonismu. Y ye d´esperar que tamién complexos, subordinaciones y renuncies.
