Paez que lo más fácil ye divertise, pero que toos se puedan divertir n’Uviéu acaba convertise coles últimes fiestes de San Mateo nun problema políticu. Aquello de “Xente d’Uviéu, tambor y gaita” foi posible, pero yá nun lo ye aparentemente. Un problema que diz el PP ye “de modelu”, como si fuera un debate estéticu o económicu, cuando de lo que se ta falando ye d’ética y moral. Tamos falando d’estética y d’economía, ye verdá, pero per detrás ta la ética y la moral.
Nós, la xente socialista, les y los militantes del PSOE y muchos otros de la redolada ideolóxica de nuestro, creemos na democracia participativa y asociativa, de baxo p’arriba, y nun pasamos a creyer que pueda haber democracia nuna sociedá que namás recibe órdenes d’una “élite” — “élite se vuelva”, diría mio suegra — que deciden dende arriba lo que los d’abaxo tienen que pensar.
Nun toi cuestionando nin muncho menos la lexitimidá del PP -partíu qu’algamó la mayoría absoluta nel conceyu d’Uviéu con un alcalde, don Alfredo Canteli, que nun ye militante del PP según él mesmu afirma-. Cuando nos venden -esi ye’l mensaxe del PP- que les fiestes de San Mateo foron un gran negociu tán diciéndolo too.
Consulté a quien sabe d’onde vienen les pallabres ociu y negociu y ye curiosa la rellación etimolóxica.
Ociu vien del llatín “otium”, que significa tiempu pa suañar, divertise, folgar, facer lo que nun se puede cuando tienes que trabayar y esforzate, por exemplu, pa sacar alantre una familia o axuntar unos cuartos pa pagar l’alquiler quitándo-yoslo, igual, al ociu de los tos fíos; negociu vien del llatín «nec otium», quier dicise, onde ye imposible l’ociu, onde tienes que trabayar y esforzate pa que los tos fíos tengan lo que tienen que tener. Cuando tas al negociu nun tas al ociu, ye asina de simple.
L’equipu de gobiernu del Conceyu d’Uviéu confunde economía con ética y estética con moral. El resume que faen ye, por dicilo a la brava, que los hosteleros ganaron munches perres.
Yo alégrome de que los hosteleros, viniendo de la crisis que vienen, ganaran al menos un poco (que nun será tanto nin tan dello); pero’l fechu, que nos afecta a toos, ye que la ciudá ta dividida porque’l modelu de fiestes del PP n’Asturies naz d’una perversión: nun ye un modelu participativu.
San Mateo nun puede ser namás una fiesta gastronómica; San Mateo nun puede ser namás una fiesta etílica; San Mateo nun puede ser del gustu acomodáu d’unos pocos. San Mateo tien que ser eso y muncho más (y fundamentalmente la razón pa coleicionar gustos diferentes, un llugar pal descubrimientu).
Les fiestes de San Mateo son les fiestes d’Uviéu, pero tamién les fiestes de toa Asturies, puesto qu’Uviéu ye la capital d’Asturies. Pregúntome por qué esi afán aislacionista de les “élites” d’Uviéu que nun entienden la responsabilidá cultural de ser la capital del territoriu identitariu más antiguu de lo que güei llamamos España.
Señoras y señores del equipu de gobiernu del Conceyu d’Uviéu: echamos en falta conciertos gratuitos de calidá y bien pagos pa les y los artistes y técnicos que los arropen.
Pa eso tamién tan los impuestos y la montonera de millones d’euros que diz el PP que tienen aforraos n’Uviéu. Tienen que tener en cuenta que setiembre nun ye un bon mes pa les families y una mayor oferta cultural, adaptada económicamente a precios mui reducíos, ye una obligación de cualesquier equipu de gobiernu seya del signu que seya.
La mio esperiencia, contrastada cola esperiencia de munchos, ye que vi cais desolaes onde nun florecíen les rises, sinon los cactus.
