La tercer edición de la feria d’empreses y cultura n’asturianu Reguerada Fest va axuntar en Candás a ventidós negocios ente’l 11 y el 13 d’ochobre, col sofitu de la Conseyería de Cultura, Política Llingüística y Deporte.
La cita, puntu d’alcuentru de les distintes disciplines artístiques y el mundu de la empresa y la comunicación, va cuntar con una programación empobinada a tolos públicos qu’inclúi una feria, recitales lliterarios, talleres, charres, esposiciones y conciertos, que van desendolcase na Fábrica d’Ortiz, el Teatru Prendes y la Biblioteca de Candás.
El director xeneral d’Acción Cultural y Normalización Llingüística, Antón García, presentó esti xueves el programa del eventu cuyu nome rinde homenáx a Antón de Marirreguera, ñacíu nel conceyu de Carreño y autor de la que tá considerada la primer obra lliteraria n’asturianu.
La inauguración de la esposición ‘La voz de la nortiada’, una instalación visual y sonora del artista Ánxel Nava, va marcar l’entamu de les actividaes del Reguerada Fest na mañana del vienres na Fábrica d’Ortiz, llocalización que tamién va acoyer el mercáu y la feria de llibros y empreses.
A estes propuestes únense los recitales poéticos, alcuentros con autores y meses redondes, amás de los cuentacuentos con Flaire Doráu, Pintar-Pintar, Hixénicu Papel Teatru y una ruta cultural y lliteraria por Candás.
Coles van desarrollase talleres, con places llindaes, de iniciación al baille tradicional, de bordáu con abalorios, de composición de cantares o de conserves.
Mentres el festival va haber conciertos de Marisa Valle Roso y Skama la Rede, y con un pasacalles a cargu del Grupu de Baile San Félix.
El Teatru Prendes va acoyer les representaciones de ‘Perendi’, de La Compañía del Alba, y de ‘Hasta que to ma nos separte’, del grupu de teatru navetu La Ponte Enriba.
Igualmente, na Biblioteca de Candás l’escritor Xurde Fernández va caltener un alcuentru colos integrantes del Club de Llectura del centru sobre’l so llibru ‘Caledonian Road’.
