Pensar con lluz artificial
Ye miércoles pela tarde n’Uviéu. A les 17.54h yá atapeció. Nes cais d’una ciudá escurez siempre un puquiñín enantes de lo que te diz la to App favorita pa saber el tiempu que va facer mañana, porque la solombra de los pisos quíta-y unes decenes de minutos de lluz a la to vida. Y les ñubes. A eses hores ye fácil que munches y munchos tean entá saliendo d’estudiar o de trabayar, quien tenga esi privilexu. Munches d’eses persones entraren al tayu siendo entá de nueche y tornen pa casa coles lluces puestes peles cais, otra vegada. Pal restu’l día queda’l trabayu de cuidar, d’atender otra xera non remunerao -o hasta de lo pagao- y lo de casa. Too ello, fecho yá de nueche.
Empobínome a los 40 años y pémeque llevo yá más tiempu de la mio vida participando d’ambientes comprometíos socialmente que viviendo al marxe d’ellos, como tantes y tantes persones n’Asturies que, por más que se repita lo contrario, nun son tan poques. De xemes en cuando surden movimientos nuevos y otros amorien porque dexa de ser, aquel, el so tiempu. Pasen de moda hasta la siguiente vegada que se fai necesario dar rempuesta dende la sociedá a dalgo por mor de la falta de soluciones dende lo institucional. Delles vegaes entrúgome si sedría quién a vivir ensin tar metíu en dalgo más qu’en pensar na propia vida diaria. De xuru que nun soi l’únicu, ¿non?
Himnos pa esti tiempu
Nun suelo sentir música en castellán. Va muncho que la mayor parte de lo que siento acaldía ye n’inglés. De lo estatal, siempre reparé naquello que tenía la identidá llingüística y cultural puesta en primer planu, apostando por cantar y pensar na llingua propia. Ye más fácil que conoza bandes que canten n’asturianu, euskera, catalán, gallegu o aragonés, qu’en castellán. Pero Biznaga ye una banda cola que me foi imposible xugar a esta esbilla. Bono, a la fin, Madrid ye Castiella.
La banda madrilana fai música que suena a rock radical y punk de los 80 pero coles producciones más modernes que se puedan sentir anguaño. Lletres comprometíes y desacarnaes que nun afuxen d’un intimismu militante mui interesante y necesariu. A vegaes reflexen emociones típiques de quien ta comprometíu/a y mira pa esti mundu. Asonsañen ser d’otra dómina, pero suenen reales… o ye qu’aquel tiempu ye asemeyáu, cada vegada más, a esti. Nel so discu caberu, Ahora (Montgrí, 2024) atopamos “El Entusiasmo”. Espeten, con tola razón del mundu:
“Cuando el desencanto es tradición el entusiasmo es una disidencia. Contra la sumisión del ánimo que impera, una extraña flor crece en las cunetas”. Y, tamién: “Si el desencanto afecta, con razón, el entusiasmo es la resistencia. La última expresión de radical belleza. Una exaltación. El viento que nos lleva”.
Optimismu o barbarie
Vivimos una dómina de desafección política, de pesimismu. Vese nes manifestaciones, nos espacios militantes, nes redes sociales. Nin aporta la esperanza, nin queda la rabia. Lo bono, prometío, nun llega, lo malo, profetizao, nun s’alloña tanto de lo que vivimos. Guerra, xenocidiu, desastres naturales, inestabilidá económica y falta de proyeutos qu’ufran un horizonte de futuru pol que lluchar. Pol que pague la pena lluchar.
“¿Cómo nun va prestar comprometese, si militando conoces a la meyor xente de la sociedá?”
Va dellos años Anna Gabriel vieno a Asturies y tuvímosla en La Llegra, falando d’activismu. Comentaba cómo, munches vegaes, detectaba que la xente quemaba militando: coses asemeyaes a les que vivimos en cualquier requexu del mundu ente xente que pon los meyores años de la so vida al serviciu de les sos idees. Dicía Anna que, dacuando, pensaba nello y llegaba a una reflexón motivadora: “¿Cómo nun va prestar comprometese, si militando conoces a la meyor xente de la sociedá? Pa quien tien conciencia, militar ye la meyor manera de tar nel mundu, la más prestosa”. Argumentábalo y falaba de quien s’axunta con otres que tienen una visión asemeyada sobre dalgo no que paga la pena echar tiempu, perres y colo que perder hores de cine y sueñu. Una ilusión.
Puxa too
Soi siempre optimista pa too, menos pa col Real Uviéu Sociedá Anónima Deportiva…y esto cabero hasta lo toi camudando. Sábelo quien me conoz. Suelo pensar que tolos planes prestosos y/o obligatorios de la mio vida se puen facer na mesma tarde, anque munches vegaes nun llego o ando afogáu pa llegar a cumplilos toos. Y, si nun lo da, bono, suel tener igua.
L’universu conspira pa que nos paeza inútil; pa que pensemos que nun paga la pena echar una tarde y otra nuna asamblea, o escribiendo un artículu, o faciendo una pancarta pa una movilización d’unos pocos cientos. Sicasí, la historia diznos que si nun fuere pol trabayu de formiguina de tantes millones de persones como tu y yo, güei nun tendría tiempu siquiera de tar equí, emburriando estes pallabres. Mui pocos d’esos millones de persones vieron un Día de la Victoria, o desfilaron pela cai del so pueblu mentanto de les ventanes cayíen flores al so pasu. Pero tuvieron, dando’l testigu. Hasta que nos lu pasaron a ti y a mi.
50 años nun son nada
La tradición política na que nos reconocemos munches n’Asturies naz hai 50 años. En política pue ser un segundu o una eternidá. Quienes emburriaron la creación del asturianismu modernu, movimientu que lleva tando presente en tolo interesante que se fai nesti país política y socialmente nel últimu mediu sieglu, inda viven. Punxeron los finxos pa, garrando lo meyor de la tradición política d’Asturies, da-y forma a una idea propia na que la cultura y l’idioma yeren claves pa crear un suxetu políticu que-y tenía que dar un futuru ilusionante a esta tierra y a esti pueblu. Y, en munches coses d’elles, fueren quién.
Cinco décades dempués, l’asturianismu algamó dellos llogros claves no simbólico. Asturies nun sedría como ye ensin aquelles xeneraciones de militantes…pero fáltanos dar un reblagu: convertir tou esti patrimoniu políticu nuna fuerza qu’entre, ensin intermediarios, nes instituciones pa da-yos un ximielgón, pa poneles al serviciu d’una idea asturiana, popular y tresformadora. Nello tamos, nello siguimos tando.
La ilusión, caleyar dos años y mediu más
En 2027 hai una xeneración de xente que llega nun estáu de maurez óptimu pa poder emburriar un cambiu políticu n’Asturies. La izquierda soberanista tien razón a la d’analizar munchos de los problemes que carez Asturies y la so población, hasta tien igua pa ellos, pero vien faltando-y dar l’últimu emburrión al asuntu: tar presentes onde se redauta’l BOPA y tener capacidá pa editalu.
Pa mayu de 2027 inda queden más de 2 años y da la sensación de que se traviesa’l desiertu hasta l’oasis naguáu. Pero nun ye asina: queda muncho menos de lo que paez. Y fai falta armase d’argumentos políticos y, tamién, crear un ecosistema emocionalmente atractivu alredor d’esta idea. El contestu ye’l que ye: la redolada política a la izquierda del PSOE ta ocupada pensando que va llevar al pexe gordu a les sos posiciones, pero a la fin ye’l pexe grande’l que come al pequeñu en Madrid, na Xunta Xeneral y en munchos conceyos del país onde naden nel mesmu sen.
Hai un camín non andáu entá pel que caleyar hasta 2027, onde les instituciones renueven la so composición: pasa por facer ver a la sociedá asturiana que toca da-y una oportunidá a quien s’enfota no que pasa cerca, quien pisa tarrén conocíu, frente a quien ta ocupao coles noveles d’intriga de les cortes xenerales y fai correa de tresmisión d’elles. La política de l’autoestima y del equí, frente a la de lo que toque que nos llegue n’AVE dende allalantrones.
Un mes pa qu’entamen a medrar los díes
Dientro d’unes 3 selmanes les hores de lluz van entamar a medrar. Quiciabes, nesi intre, entamemos a ver les coses d’otra manera. Toi convencíu de qu’hai un daqué ehí nestos díes d’escuridá que nos manca a toes. Fai falta vitamina D, ensin echar mano de suplementos de botica, de lo que yá receten lo mesmo a la reciella qu’a la xente más mayor. Falando de pautos interxeneracionales: ye hora de facer que fornaes veteranes y nueves d’asturianistes s’axunten, que recuperemos el contautu con esa xente que fexo güerta de lo qu’antaño yera monte, y qu’anguaño nun podemos dexar que quede pa prau.
Como con estos, hai dicires populares pa toles situaciones. Falando de díes, hailu que diz que’l nuestru aportará; falando de lluz, qu’hai una n’Asturies; Andresu aporfiaba: “hai que siguir, asina y equí”. La nuestra, agora mesmo, ye la instantánea del fotógrafu Javier Bauluz nos 90: un trabayador enmazcaráu d’El Naval, llanzando torniellos col gomeru. Embaxo, tien una pintada que diz “Tenemos que ser optimistes”. Imaxinando, con una sorrisa, otru futuru.
Biznaga afita que “el entusiasmo nos atraviesa, con su cuchillo de primavera”. Naguo porque marche esta escuridá. Y que, si nun son de victoria y flores, que los desfiles seyan de miles de persones peles cais defendiendo los sos derechos equí y agora, na nuestra tierra.
