Llevábemos meses viendo les prietes tormentes sobre la industria asturiana a cuenta del gastu inversor pa la descarbonización y la necesidá de les empreses lletrointensives de tener precios estables y curiosos pola lletricidá pa poder operar nunes condiciones amañoses. Les amenaces tapecíes d’Arcelor Mittal de trancar les sos instalaciones n’Asturies, que xeneren el 12% del nuestru PIB, siendo la mayor empresa industrial nel país en volumen de negociu y d’empléu, faen tremar la economía asturiana entera. La idea ta clara: si funde Arcelor Mittal funde Asturies.
Quedaron mui lloñe los tiempos en que n’Asturies yera l’Estáu Español el principal empresariu capitalista del país al traviés de la propiedá de los grandes motores de la economía industrial asturiana: la minería y el metal. Pasaron yá trenta años de lo qu’un presidente asturianu s’atrevió a llamar “crisis positiva”, que consistía en matar la minería adulces y privatizar el sector del metal cola venta d’Aceralia, l’antigua ENSIDESA, a un grupu luxemburgués, Arbed, p’acabar a los pocos años en manes de la multinacional Mittal, llamada asina pol nome del millonariu indiu que ye’l so amu. El Gobiernu d’España desentendióse dafechu de la empresa, renunció a tener nenguna acción na mesma, al contrario d’otros estaos europeos que privaticen padremuñu públicu, y Asturies quedó asina ensin pitu que tocar na principal empresa del país siempre en riesgu de dexar un ermu nes contornes d’Avilés y Xixón. Asina, si la privatización yera, teóricamente, pa que l’estáu nun interviniese na economía, na meyor ortodoxia neolliberal, siguió faciéndolo apurriendo ayudes públiques ensin nengún compromisu concretu a cambiu. El Principáu ta acabante de concede-y 36´4 millones d’euros, que se sumen a los 450 aprobaos por Bruxelles, siendo asina la empresa privada que más ayudes públiques recibe. El capital priváu, por muncho que mos fale de les bondaes del llibre mercáu, nun dexa de ser el máximu esponente d’un capitalismu miagón, que parasita recursos públicos en forma d’obres publiques y ayudes directes, como bien demuestra Juan Ponte nel so llibru “El capitalismo no existe”
Mittal, mientres miaga por más perres, amenaza con marchar, como yá lo fixeron nos últimos años otres multinacionales como Danone y Alcoa, dexando tres d’ellos paru y desarticulacion territorial y social.
La respuesta de la esquierda asturiana a esta situación ye, como mínimo, acomplexada. Sigue habiendo un mieu permanente de falar de la intervención del estáu na economía, y si agora yá salen más voces pidiendo apocadamente la intervención, ye porque les amenaces de colar empiecen a convertise en posibilidaes, col mieu al abismu qu’ello implica. El mantra neolliberal cuayó con tanta fuercia que nin siquiera somos conscientes de qu’unes cuantes de les multinacionales más nomaes del continente tienen tamién capital públicu, dende l’automoción a les llétriques.
N’Asturies regalamos perres a palaes y pancima renunciamos a pidir ser copropietarios d’aquelles empreses que reciben recursos que salen del bolsu del pueblu asturianu. , Dende Izquierda Asturiana (IAS) plantegamos que la intervención del estáu en toles escales de l’actividá económica nun ye’l recursu caberu sinon el primeru. Ye una condición necesaria pa un programa republicanu de redistribución de la riqueza. Por eso facemos un llamáu al Gobiernu Asturianu pa entamar un frente común, xunto col gobiernu del Reinu y la Unión Europea, pa declarar estratéxica la producción d’aceru y tresformala nuna empresa pública, nel casu d’Arcelor y de capital públicu, asturianu, estatal, y de la mesma UE, nel restu de plantes de producción del continente. L’oxetivu ye liderar la producción a nivel mundial, garantizar la so sostenibilidá medioambiental, la descarbonización, la calidá del emplegu y ponese a la cabeza tecnolóxica nel sector. Solo dende la reconversión pública de les empreses productores d’aceru pueden garantizase estes premises. Lo demás ye’l cuentu la bona pipa al que mos ta sometiendo l’amu la empresa, nun tira y afloxa insolente. Ye imposible, diz, algamar los oxetivos medioambientales marcaos previamente, a nun ser que dende tolos ámbitos públicos se-y sigan apurriendo perres un día sí y otru tamién.
Ye evidente que la producción d’aceru ye un sector estratéxicu, y ye evidente que tien qu’asumir el coste de reciclase pa cumplir los estándares ambientales que marca la UE, pero eso val tanto pa Mittal como pa toles demás, y ye verdá tamién que les industries lletrointensives precisen precios estables de la lletricidá. La propia FADE desíxelo, pero cuídase muncho de dicir cómo. Otra vuelta, neolliberalismu p’afuera y defensa del llibre mercáu, pero miagando intervención pública cuando convién. L’alternativa ta bien clara pa nós: intervención pública nel mercáu llétricu al traviés d’una empresa pública asturiana qu’opere n términos de rentabilidá social, apurriendo precios estables pa particulares y empreses ensin ánimu especulativu, financiada por una blanca publica asturiana qu’opere como motor estratéxicu de la nuestra economía, como venimos defendiendo dende la nuestra fundación como partíu. No que toca a Mittal, ye imprescindible desixir la entrada nel accionariáu de toles instituciones públiques que-y dieron perres a Mittal: el gobiernu asturianu, l’español y la propia UE. Ye más: una empresa pública d’esti tamañu y característiques bien podía atrevese a ensayar fórmules de coxestión ente l’alministración y los propios trabayadores, enfilando pela vía non solo de la simple estatalización, sinon de la socialización.
Les costures qu’españaron cola crisis del capitalismu financieru qu’entamó en 2008 y remataron col shock post-andancia que tovía tamos pagando asoleyaron un panorama de desindustrialización y deslocalización suicida pa una Europa onde l’horizonte razonable habría ser non una “vuelta a los oríxenes”, pero sí un apueste pola propiedá pública de sectores estratéxicos, onde los dos más importantes habríen de ser l’enerxéticu y el metalúrxicu. El Reinu d’España foi alumnu aventaxáu na fola neolliberal que llevó a la privatización de les empreses públiques. Agora miramos a los estaos que nun corrieron tanto y tovía caltienen daqué control estatal sobre estos sectores, casu de los estaos alemanes, Luxemburgo, Portugal o la mesma Francia, onde l’Estáu inda tien poder pa facer polítiques estratéxiques.
En xineru el gobiernu italianu anunciaba la renacionalización d’Acciaeria d’Italia, qu’anque se vendiera a Mittal va tiempu, tenía tovía un 38% de capital públicu. L’autor de la operación ye un gobiernu bien poco sospechosu d’esquierdismu. Renacionalización, eso sí, cola idea de volver a privatizar cuando se tope un comprador más fiable. La República Francesa tamién amenaza cola intervención, mientres equí siguimos regalándo-y perres o pensando en cómo regala-y más.
Fuera de la UE, Kazakhstán nacionalizó ArcelorMittal nel so territoriu esti mes d’avientu de 2023, pagándo-y 286 millones d’euros frente a los 3500 que pidía a lo primero.
Échase de menos una postura más valiente de los gobiernos español y asturianu. Échase de menos una respuesta sindical más curiosa, entamando movilizaciones y buscando l’apoyu de la población de los conceyos afectaos, como pasó con ALCOA. Pero esta vez nun tien que ser pa pidir que quede la empresa equí, sinon pa dicir alto y claro qu’Asturies tien que siguir teniendo siderurxa integral, y que si nun hai voluntá y compromisu firmáu de parte de Mittal la intervención pública va ser inminente. Que diga depués la UE por qué nun val equí lo que sí val n’otros sitios. Si nun se dan pasos nesa dirección el riesgu d’acabar como toles empreses que colaron d’Asturies ye pergrande, pero con unes consecuencies muncho más graves.
El dineru público tien que valir pa financiar actividaes que tengan como oxetivu valir a los que les financien, esto ye, a la ciudadanía asturiana. Lo contrario, el lliberalismu de palu, ye saca-y perres al pueblu pa financiar negocios privaos que nun tienen apegu col territoriu que los acueye y, por eso mesmo, tan pronto como lleguen colen. D’eso llevamos viendo muncho n’Asturies estes décades, énte la pasividá de les alministraciones. Y yá valió.
