El 27 y 28 d’avientu, Rodrigo Cuevas (Uviéu, 1985) presenta ‘La Romería’ nel Teatru Campoamor d’Uviéu. Falamos con él sobre l’espectáculu y la so trayectoria, escontra la que nun pudieron nin el bullying, nin los hackers turcos
Llega ‘Romería’ a Uviéu, al Campoamor, el 27 y el 28 d’avientu. Y yo tengo que preguntate, lo primero…
¡Polos hackers turcos!
¡Eso! ¿Ye que te reconciliaste yá con ellos? ¿Llegáistes a un alcuerdu? O… ¿nun sedrá que nunca nun esistieron?
[Rises] Yo creo que nunca esistieron los hackers turcos, ¿eh? Defecho salió esi informe real de que los hackers turcos foron una invención de la persona que lleva les redes del Ayuntamientu…
Y que nun te quería bien.
Y que nun me quería bien, al paecer. Nun sé. A min nun me llamó nadie del Ayuntamientu pa decime: “Oye, Rodrigo, disculpa por esti malentendíu”. Nun me llamó nadie oficialmente, pero bueno… como tampoco me llamaron pa felicitame’l Premiu Nacional. Entós… tampoco pasa nada. Nun me llamen nin pa lo buenu, nin pa lo malu.
Con hackers o ensin ellos, van ser dos conciertos; tuviste que doblar feches, que nun ye la primera vez que te pasa. Les places pal del 27 taben escosáes en mayu. Y esta ye la típica entruga que te facemos toos: tú, ¿siénteste profeta na tu tierra?
Pues sí, la verdá, porque n’Uviéu anque nun me programen pa les fiestes; anque tenga yo qu’alquilar el teatru, pues mira: llenamos el Campoamor. Que pa dalguien que ye d’Uviéu ye… Anque la mi ilusión de tocar n’Uviéu de tola vida ye tocar na plaza de la Catedral. Pero ya nun se faen conciertos ehí, y el añu que lu fice yo fuése’l soníu y quedé coitus interruptus. Entós… ¡yo yá nun tengo ilusión por ná!
“El públicu d’equí fáeme trabayar más”
Una xira como esta, que ya anduvo por medio mundu: tuviste en México, en París… nuna montonera de sitios. ¿Préstate volver a casa? ¿Ye lo mesmu volver equí? Les sensaciones sedrán bien diferentes: ver a dalguien al otru lláu que conoces, o a dalguien al que non.
A ver, ye mui distinto. Pa mi ye más difícil tocar en casa que perhí, porque perhí ¿qué más te da, si ye xente que nunca más vas a ver? Ye como nestos sitios que son tan turísticos que traten mal a los clientes porque dicen: “total, como nun van volver per equí”… [rises] A min pásame lo mesmu. Cuando andes perhí nun paso nengún tipu de nerviu, porque siento como que ye xente de fuera. Que nun ye que la quiera menos nin que quiera facer les coses peor, pero en casa ye como que me da más respetu. Y tamién el públicu de casa dígote que ye un pocu más duru, nun se regalen tanto. Yo creo que ye un pocu “bueno, que nun se creya que porque seamos asturianos o téa tocando n’Asturies vamos a regalanos”. El públicu d’equí fáeme trabayar más.
Conocémoste meyor.
Claro. Saben hasta ónde se puede llegar y dicen: “hasta que nun lo de, nun lo damos nosotros”.
De ‘Manual de romería’ llégame especialmente al alma esi ‘Ramu Verde’. ¿Ye difícil pa ti -o ye una forma de xusticia poética- pensar qu’ente’l públicu del Campoamor puedan tar eses persones de les que tú fales nesi cantar?
Yo téngolo falao con dalguna de les persones que participaben d’esi bullying, y mira: una persona cola que falé una vez, él nun reconocía tener fecho eso. Él nun lo reconocía, nun se daba cuenta de que yera partícipe de tóu eso. Entós, igual, anque tean delantre, nun son conscientes de lo que pasaba. Cuando somos guah.es nun ye que seyamos culpables; tamién somos víctimes d’unes coses impuestes. Tóos somos víctimes, el qu’acosa y el que non. A lo menos hasta llegar a ciertes edáes, claro.
Fálase estos díes del suicidiu d’una neña n’Uviéu, enantes del cual fallara tol protocolu previstu pol colexu escontra’l bullying. ¿Cómo crees que’l tu arte puede ayudar a qu’esti problema espoxigue?
Lo que podemos facer los artistes ye desplicar al traviés de les emociones, xenerar empatía. Eso ye a lo másimu que podemos aspirar; llueu, la parte técnica tien que ser xente especializao n’ello. Pero… yo lo que digo nesa canción ye que si dalguien me tuviera dicho qu’eso ye una etapa… porque cuando tas nuna escuela pienses qu’eso ye infinitu, que nunca van dexar de metese contigo. Y, al final, qu’haya dalguien que te diga “mira, Rodrigo, esto va acabase, en cuantes qu’acabes el colexu esto va ser muncho meyor”, ye importante. Ye importante una implicación de la xente adulto. Y tenemos que trabayar tamién colos agresores, nun solamente colos agredíos, porque los agresores son los que tienen que cambiar.
Llevando la ‘Romería’ a mediu mundu, quítes-y la razón a quienes dicen que ye de paletos falar asturianu. Tú yes l’amuesa de que col asturianu puede viaxase, conocer mundiu. Triunfar. Dime: fuera, ¿cómo reciben fuera la nuesa llingua?
Recíbenla con un interés total. Quieren saber cómo se fala, l’asturianu fuera d’Asturies xenera munchísima curiosidá. Ye ún de los atractivos que tenemos: la nuesa cultura, y, dientro d’ella, la nuesa llingua. Fáenos súper sexys. Siempres ye munchu más sexy una persona que tenga un acentazu, que fale una llingua esótica o que nun conoces, que nunca sentisti. Date muncha más curiosidá que dalguien que fale inglés, porque inglés, fía… falámeslo casi toos.
“Tenemos que trabayar tamién colos agresores, nun solamente colos agredíos, porque los agresores son los que tienen que cambiar”
Y chapurreando.
¡Eso! Pero l’asturianu xenera munchu magnetismu. Yo creo que somos tolo contrariu de paletos. Cuando la sociedá lleva tola vida diciéndote que yes un paletu, qu’esta ye una llingua d’ignorantes, de burros, d’aldeanos, de probes, y tú, por embargo, sigues falándola, sigues culturizándote, sigues preocupándote por alfabetizate nun idioma nel que nunca t’alfabetizaron porque nunca tuviste’l derechu d’estudialo na escuela… Eso ye que somos persones constantes; curioses, que tenemos un pensamiento críticu. La xente que fala asturianu denota pensamiento críticu, intelixancia y una firmeza na so personalidá. Eso, como mínimo: firmeza na so personalidá.
Entós, nel tu conciertu vamos ser too xente sexy.
¡Buenu! Eso va ser…
Pero oye, ente butaques hai mui pocu espaciu pa baillar. Tú, ¿vas sacanos a baillar?
Ye malo pa baillar, pero ye meyor pa otres coses [rises] Pero yo creo que sí se va poder baillar, ¿eh? Bonu, arriba, nel gallineru, puede ser peligrosu. Eso nun cumple la normativa.
Pues nun vas poder escitanos muncho. Y l’espectáculu, ¿cómo va ser?
Vamos dir tola banda con baillarines, cola escenografía… Hai como dos formes de facer l’espectáculu de la Romería. Una ye cuando ye pa esteriores, pa festivales como Poniente en Xixón, y otra, dempués, pa teatru. Y a min gústame munchu’l teatru, porque ellí ye onde yo puedo putuquear munchu más.
Entre bambalines…
Ente bambalines, ente’l públicu. Puedo olisquear, gusmiar. Ye más cabareteru.
Entós promete.
Sí, home, sí. Vamos pasalo bien.
En 2024 tuvisti de tóu. Tuvisti a xira; tuviste en México representando a Asturies, tuvisti la tu propia esposición… ¿Qué foi pa ti 2024?
¡Munchu trabayu! La verdá, nun paré. Foi una romería. Yo yá pienso que vivo como nuna boda. Tamos tol día de fartures. Cuando vamos de viaxe pa trabayar tol ratu tas comiendo per equí, per allá; como les romeríes, que son como una fiesta… toi como nuna boda, como si tuviera casándome tol día. Más dempués toles histories nes que me meto yo de la Benéfica, de… La verdá ye qu’agotador. El día que pare… ¡el día que yo pare, acabóse Rodrigo!
Tú siempres te defines como un artista multidisciplinar.
¡Defínenme otros! Porque yo, de multidisciplinar… non. Tantes disciplines nun faigo, nin tan disciplináu tampoco soi.
La meyor definición foi aquella que te dieron en Twitter.
¡Transformista supremacista! Eso sí que ye lo que me define a mí bien.
Da como pa título d’álbum
Pero eso, pa cuando acabe colos manuales. Agora tengo que facer un tercer manual, porque sinon dos queden coxos. Dempués, transformista supremacista.
¿Y qué ye lo que-y presta más a esti ‘transformista supremacista? Los conciertos como esti del Campoamor, entamar eventos como La Señora Fiesta, iniciatives como La Benéfica… ¿Qué ye colo que te gustaría más que quedásemos nun futuru mui llonxanu?
Pues, sobre too, como entamador de movides y revolvedor de coses. Eso ye lo que más me gusta. Y lo que más trascendencia tien.
Devolver la vida a los pueblos.
Sí, facer coses y tar metíu pola xente. Coses como Una Señora Fiesta, na que tolos años facemos como un formato; en que cada añu tamos pensando cómo cambiar pa sorprender a la xente; ver cómo responde la xente… el día de la inauguración de La Benéfica, ver tóes eses cares de la xente flipando y dándose cuenta de que podemos facer coses mui guays col poder popular, remando tóos a una. Ver a la xente decatase de tóu eso pa mi ye como… pa min ye colo que, dempués, cuando llego a casa, nun soi a dormir.
